Izaía 53 - O Mikanda Ikola

¹ Nanhi ua xikana o maka metu? Nanhi muene kua mu tukulukila o lukuaku lua Jihova?

² Kuma muene uaii ni ku kula bhu pholo ia Nzambi mukuâ ni luthangu lu fuafua, kala lundanji lua xoxouela mu mavu ma kukuta; o ku mu tala, ka kexi ni kidifua mba uuabhelu ua pholo; o ki tua mu idi sui, ki tua mu muene ni kuuabha kua kima, kuila tu mu inda.

³ Kia kexi, a mu di tunu, muene o muthu a beta o ku mu tènda ni ku mu sebulula mu athu oso; mukua misusu; muthu uejidila o kutala hadi; uedi kala ió athu a mu bhana jinga dikunda ni ku mu suekela o pholo; kia kexile a mu ehelela, ki bhuala dingi muthu ua mu suu.

⁴ Kidi kiene, muene ua tambula makukata metu, o misusu ietu ua i ambata ku thandu diê; etu-phe tua mu kitile mukua-mázui, a mu bhubhidila kuala Nzambi, mukua phaxi muene.

⁵ Maji muene a mu kuama mukonda dia itondalu ietu, a mu tutujula mukonda dia ikuma ietu; O hadi i tu bhekela o kutululuka ni kubatama ia kexile ku thandu diê, o italakanha iê iene ia tu sake.

⁶ Etu oso tua kexi mu kuenda kala jimbudi ja jimbidila; kala muthu u di-texila ni njila iê; maji-phe o mulonga ua tu tokala etu-oso, Jihova ua mu xina-u kiá muene ku thandu diê.

⁷ O kia mu tatesele, ia a mu sebulula, muene ka jikula dikanu, kuma muene ka vutula kima; a mu sunga-sunga kala mbudi iia mu ku i jibha; uila mbudi kua ió u mu bhuta, idixibha, ni muene ue ka jikula ngó dikanu diê.

⁸ Tembu ia mu tobhesa mu kufunda, a mu fudisa o kulunga. Mu phaxi ni milonga ki bhuala ua mu katula-mu; o izuua ia muenhu uê nanhi ua-nda ku tanga? Kuma muenhu uê a u batula mu ngongo; mukonda o kitondalu kia mundu uami kiene kia mu jibhisa.

⁹ Mbila iê a i te bhuamoxi ni ingumba; ni mvuama bhu kufua kuê; mbata muene ka bhangele phulu, mu kanu diê ki mua kexile mangonha.

¹⁰ Maji kiene-phe kia uabhelele Jihova, o ku mu tutujula ni ku mu katesa; kioso o muenhu uê kia u bhanga kiamenga kia kituxi, muene ua-nda kumona o mbutu iê, ua-nda kuvula izuua ia kulaia, o kioso kia uabhela Jihova, kia kà Zediuila bhu lukuaku luê.

¹¹ Kienhiki, muene ua-nda kumona kikalakalu kia lukuaku luê, anga u tana; Selevende iami, Muthu Uaiuka, mu kuijiia kuê kuene na-ku, ua-nda kulungisa athu a ndumba; mukonda muene ua-nda kuambata o ikuma iâ ku thandu diê.

¹² Mukonda dia kiki, nga-nda ku mu katuila dikânda diê ku athu a vulu, sumbala muene ua-nda kuuana o madibhundila kumoxi ni mazonda; mbata ua lundulula o muenhu uê muʼalunga, a mu bundile kumoxi ni ifumbe; maji muene ua di tuika o ituxi ia athu avulu; iú uala kudiondela akua-ituxi.