Izaía 52 - O Mikanda Ikola

Ziione a mu suinisa ku tunda ku Babilonha

¹ Phaphumuka, phaphumuka eie Ziione, u zakele uzonda ué; Jeluzaleme, u diembu diangene, zakela kuma momué nuka dingi mua ká bokona muthu kʼa mu saie mba kifusa.

² Dikukumune o fufuta, balumuka u xikame, Jeluzaleme, tata; mona-kilumba mu Ziione uene bhu lubhambu di-jitune o mukolo mu xingu.

³ Mukonda Jihova Nzambi, uambe kiki: A mi sumbisa mu kingoho; a kà mi kula ue, sè kitadi.

⁴ Mbata Jihova Nzambi, uambe kiki: Mu thembu jòkulu mundu uami ua kulumukine ku Ijitu, phala kunhunganena koko; o Asídia ue hé u kuata ku a tatesa sè kikuma.

⁵ Kiki-phe ngi bhanga kiebhi, eme Jihova? Kuma o mundu uami a u bhundile sè kikuma; O oso a mu u tumina aia ni kuhunza, Jihova muene ua ki tange; o dijina diami a kuata ku di lebhula kumbi dioso dia kambàmba.

⁶ Mukonda dia kiki, o mundu uami ua kʼèjiia dijina diami, mu kizuua kiná; kuma ememuène nga-nda kuila: Emeʼamiʼú.

⁷ Inama iê kuuabha kuahi, ku milundu kuná, ia ió ueza kutula njimbu ia kubhanduluka, ni kuivisa kioso ki bhulukisa muthu; ueza kuambela Ziione kuila: Nzambi ié muene uala ku ungana!

⁸ Ivua dízui dia alangidiʼé, iá kola, a mu tanena kumoxi; mbata a-nda ku ki mona mesu ni mesu, kioso Jihova kia kà vutuka dingi mu Ziione.

⁹ Uenu bulukutu ni kuimba, tumbujukenu bhuamoxi, enu mu jingùndu ja Jeluzaleme; mbata Jihova ua kondo malamba ku povo iê; iu ua kula Jeluzaleme.

¹⁰ Jihova ua funha lukuaku luê lu kôla bhu pholo ia ifuẋi ioso; o maẋokololo moso maʼxi ma-ndu mona ubhulukilu ua tundu kua Nzambi ietu.

¹¹ Tundenu-ku, tudenu-ku, sondolokenu-bhu, kana kubabata kima kia ufusa; tundenu muʼaxaxi kâ, di-zelesienu enu oso muambata ingolongondo ia Jihova.

¹² Kuma ki mua-nda kutunda ni lusolo, kana, ki mua-nda kuila kala mua lenge; mbata Jihova muene ua-nda ku mi tuamenena ku pholo, O Nzambi ia Izalaiele anga ua kà kala kuema dienu.

O Kutukuluka kua Mexiia, ni jiphaxi jê, ni kijingo kiê

¹³ Talesa, Selevende iami ua-nda ku kalakala ni unjimu; a-nda ku mu zangeleka anga u banda ditala dia kota dia kijingo.

¹⁴ Kala kia sasumuka athu a vulu mu ku mu mona, kuma o pholo iê ia kitulukile kiavulu, kedi ngó kala kiene o athu nʼakuá, kidifua kiê ku ki fikisa ni kia anʼa athu mu ngongo.

¹⁵ Mu kiki, muene uà kʼeẋika ifuẋi ia ndumba ku dibônzo, o jisobha a kà jika makanu mâ mukonda diê-muène; kuma kima ka a tangelele na-kiu a kà ki mona, kima ka kʼivile luua, kia kà a jimbulukila muene.