Izaía 51 - O Mikanda Ikola

Kubhanguluka ni kubhanduluka kua Izalaiele

¹ Enu-oso mua ku ta muẋima ku ufundisilu ua kidi, ngʼivienu, nʼenu muala kusota Jihova, talenu ku ditadi kuoso ku a mi bamiune, talenu ku dikungu dia dibânda mu a mi kandele.

² Talenu Mbalahamu, dia tatʼenu, ni Sala, ua mi vuala; kuma kia kexi ubhekʼélele uê, eme nga mu ixana, nga mu zediuisa, eme nga mu sokolola.

³ Mbata Jihova ua-nda kukonda malamba kua Ziione, o ididi iê ioso ia sekala muene ua-nda ku i konda malamba; ngûndu iê u i bhanga kala Edene, ngùnzu iê kala ki kala o díbhia dia Jihova; muenhomo mua-nda kukala kutana ni kusanguluka, kusakidila ni mbimbi ia kuimba.

⁴ Athuʼami, ngʼivienunu muene, enu mu kifuxi kiami, ngi bhanienu mátui; mbata kokuami kuene kua-nda kutunda o kitumu, o uiukilu uami nga kà u xikika, ukala mukengeji ua ifuẋi ia athu.

⁵ O uiukilu uami ua zukama; ubhulukilu uami iú tomboka kiá; maku mami mene ma-nda kutetuluila o mundu; ikolo ia-nda ku ngi xikamena ni kukinga, ene a-nda kudielela kubhandulukila ku lukuaku luami.

⁶ Bhetulenu mesu menu ku maúlu, zongolenu mu ngongo bhoxi: kuma maúlu ma-nda kujimuka-ku kala dixi, oxi ue ia-nda kukuka mukuâ ni kizuatu; oso a tunga-mu a-nda ku di-fuila kiòmuene kala ki fua o jihamue; maji o ubhulukilu uami ua kà xalèla-ku, o uiukilu uami ki u xikina ku u buisa-ku.

⁷ Enu, muejiia kioso ki kala o kuiuka, ngʼivienu, enu mu athu mua zalela o ngonge iami mu miẋima ienu; o kizembu kia mundu ki ki mi kuate uoma, o kia mi xinga, ki mu a suue.

⁸ Kuma axikamena ku a kesa kala kabamba ki ka kesa o kizuatu, makèke ma-nda ku a dia kala kia dia o lã; maji o uiukilu uami ua kà xalèla katé ku hádia ni hádia; o ubhulukilu uami kutunda muiji kuiza muiji.

⁹ Phaphumuka, phaphumuka, u maneke ukuenze, eie u lukuaku lua Jihova; phaphumuka muene kala mu thembu ia xahulu, kala ki ua bhanga jinga mu miji iòkulu. Abha, ki eie-muène ua batujula Lahabe, anga unemeka o mudikixi?

¹⁰ Ki eie-muène ua kukutisa o menha mu musanza ua kalunga, o menha ma mukiukuluku uonéne, o mu nzongolo ia kalunga anga u bhitisa-mu njila phala o jihule muene mua bhitila?

¹¹ Kienhiki kiene kia kà vutuka oso a a kula kuala Jihova, anga a kʼèza mu Ziione ni nzôngo ia kutana, ngalasa inangenena ià kala ku thandu dia mítue iâ; a kà bonga kutana ni kusanguluka, o dilamba ni mikemu ia kà a lenga.

¹² Eme, eme-muène ngi muthu ua ku mi konda o malamba; eie-phe u muthu uami, u kala ni uoma ua muthu ni mukuenu, uà xikamena kufua? mba o monʼa muthu u lela kala iangu?

¹³ Anga u jimba Jihova ua ku bhanga, uoleka o maúlu iu ua xikika oxi, anga kumbi dioso dia kambàmba uizalʼé ngó kimbuua kia mubuikixi, kia di iudika phala kubuikisa? o kiki-phe, o njinda ia ió uoso ua ku tatesele, ii kuebhi?

¹⁴ O hutile uoso a mu balakala-phe ka nangʼiê kujituka, ka kà fuila mu kaleia, lémbua; o kúdia kuê ki kuà kamba.

¹⁵ Mbata eme Jihova, Nzambi ié, ngene kutandula o musanza ua kalunga, anga o mabhuku mê ma dizumina. Dijina diê Jihova dia Ilombo Ieta.

¹⁶ Eme-phe ngi ta maka mami mu kanu dié, hé ngi ku vungina ni kilembeketa kia lukuaku luami, phala kuxikika o diulu, phala ue kusoma oxi, ni kuambela ue Ziione kuma: eʼmuène u povo iami.

¹⁷ Phaphumuka, phaphumuka, u balumuke, Jeluzaleme, tatʼeie! Uanu dikáu dia njinda ia Nzambi, dia tundu bhu luakuaku luê; dikáu dia kubhendujuka eie ua di zunzumuna muene, ni iẋiẋi iê ua i xibhi.

¹⁸ Ku ana oso a vuala muene, ki bhuala u tena ku mu batesa kamuanu; o ku ana oso a sase, kana-bhu ua tena ku mu kuata mu lukuaku.

¹⁹ Ima iiadi iii ua bhiti na-iu muene; mukuahi ua ku kuatela o henda? O kubuika ni kusekala, o nzala ni xibhata! Nanhi ua tena ku ku konda malamba?

²⁰ O anʼéambuka kiá, usanga a tandelela mu mabokuenu ma jinjila joso, edi kala jisoko jafu mu uanda; a bhondalala, ni kutema kua Jihova, ni kibazu kia a bazela Nzambi ié.

²¹ Kienhiki-phe, ivua-ze koko, eie ua bhondalala, ua kodiua, maji ki kukodiua kua vinhu.

²² Ngana ié, Jihova dia Nzambi ié, muthu ua-nda kufundila o povo iê, uambe kiki; Eme o dikáu dia kubhendujukʼodio ngi ku tambula-diu kiá, bhu lukuaku lué di tunda-bhu, ni iẋiẋi ia dikáu dia kutema kuami; eie ki mungu dingi u nua-ku.

²³ Inda nga kà di tula bhu maku ma ió a ku tatesele, ambelele o muenhu ué, xi: Bhetama, tua-nda kubhita ku kunda dié; anga eie u ta dikunda dié kala mavu ma kudiata, kifua mbambe ni njila phala jingenji.