Izaía 50 - O Mikanda Ikola

¹ Jihova ua zuela kiki, uixi: Lubongo lua kusenga na-iu mamʼenu luala kuebhi, lu nga mu senga na-iu? mba mukuahi nga mu dia dikongo, o ki nga lémbua ku mu futa, eme nga mi sumbisa-ku? Talesa, ikuma ienu iene ia mi sumbisa, o itondalu ienu iene ia sengesa mamʼenu.

² Mukonda diahi, kioso ki ngeza, ki ku moneka muthu? ngʼexana, ki bhuala muthu uetaia? mbé lukuaku luami lua kotanana kiavulu, lú lua lémbua kukula muthu? Inga momuami kana-mu dingi nguzu ia kubhulula? tala-ze, eme se ngi bazela lumoxi ngó, Musanza ua kalunga u kukuta, jingiji jithothuena kala oxi ia kisèkele, anga jimbiji jê ji nuha kibuzu, kuma se ja lémbua menha ji di-fuila ni dinhota.

³ Eme maúlu ngene ku a zuika kitombe bui, anga ngi ma vunga kidinhaji, kiene o divunga diê.

Selevende ia Jihova a mu lebhula hé a mu banda

⁴ Jihova Nzambi ua ngi bhana dimi dia uanji, phala uoso ua bhuila ngʼijiie ku mu tela tumaka tua mbote tu mu nhohesa bhu thembu ia tokala; muene mukua ku ngi phaphumuna imene ioso, uphaphumuna dítui diami ni dʼivue, kala ki kala a-di-longi.

⁵ Jihova Nzambi ua ngi xitununa mátui, eme ki nga ẋinuka; ki ngi xikina kuvutuka ku dima.

⁶ O dikunda diami ngi di bhakuila ió oso a ngi beta, oso a ngi vuza o muezu eme ngʼa ehela o matama; bhu kala o ku ngi tembula ni ku ngi thuthuina mathe, pholo iami ki ngi i sueka, kana.

⁷ Kuma Jihova Nzambi muene u ngi banda, kienhiki-phe ki ngi kalʼami ni jisonhi; mukonda dia kiki, nga kolesa pholo iami kala ditadi dia holotôto, eme nga kʼijiia kuila ki nga kà kala ni jisonhi.

⁸ Muene u ngi lungisa iú-ue bhua zukama; nanhi u ngi ta mulonga? Tu tukulukile bhuamoxi; nguma iami nanhi? a bhixile bhabha kokuami.

⁹ Mua mono-ze, Jihova Nzambi, muene u ngi banda; o u ngʼelesa mukuahi? Tala-ze, ene-oso a kà kuka mukuâ ni kizuatu, a kà diua ku tubamba.

¹⁰ Mukuahi mudienu uambe kuxila Jihova, ni kusuua dízui dia selevende iê? Muenhó se uala kubhita bhua vundu, anga bhu kamba ngó ni kamukengeji, a dielele mu dijina dia Jihova, a kuatenene kua Nzambi iê.

¹¹ Talesa, enu oso mua bambula túbhia, mua di-ẋiẋika jisoso ja túbhia tu mua uika, endelenu mu milengo ia túbhia tuenu, ni muʼaxaxi ka jisoso jenu ji mua bambula; bhu lukuaku luami bhene bhua tundu ima iosuʼiii, hé mua kà zeka mu kialala kia kalunga.