Izaía 5 - O Mikanda Ikola

Kifika kia mulenga ua muvide ni dilomboluelu diê

¹ Kiki kiá ngʼimbila kazola kami, o mukumbi ua hate iami, bhu kaẋi ni díbhia dia muvide uê. Kazola kami uene ni díbhia dia muvide uê, bhu kalundu ka mavu a bhana idima.

² Ua di kondoluesa kikanzo, matadi ua ma sengulula-mu, iú ua phaphe-mu mivide ia mbutu iambote; o muʼaxaxi ka díbhia dia muvide ua tungu-mu inzu ia matala, iú ua iudika-mu ue ditangi dia kuketela vinhu; iú uene kudielela kuila muvide uima ji-uva jauabha, maji uene ua bhana ikola-kola.

³ Kiki-phe enu akua-bhata mu Jeluzaleme, nʼenu mu akua Juda, nga mi diondo, tu fundisienu hanji nʼeme ni díbhia diami dia muvide.

⁴ Ihi dingi i nga tokalele kubhanga mu díbhia diami dia mivide, iii nga kambe ku i bhanga? Kia bhiti-phe kiebhi, nga dielelele kuila uima ji-úva jauabha, ni kuà keza mu bhana ikola-kola?

⁵ Ngi mʼijidise-phe kindala kioso ki nga kane kubhanga o díbhia diami dia muvide: Kikanzo kiê ngi ki muanga, nda di kale kiá dikêla dia ibhaku; o kipena kiê ngi ki lundumuna, nda a ki titidile.

⁶ Ngi di bilula kikangalakata; ki bhua-nda kukala dingi ku di sola jithangu; ku di tela ue mavu bhu ixina, kana dingi; inda mu sabhuke kiá isasa ni misonge ia minha; ngʼa mbela ue matuta, phala ka noke dingi mvula ku thandu diê.

⁷ Mbata o díbhia dia muvide ua Jihova dia Ilombo Ieta phe, o dibhata dia Izalaiele; o athu êne mu Juda, ene o phaphu iambote ia phaphe-mu; Jihova phe ua dielelele kuila ende ni kubhanga ima ia kuiuka, maji talesa hanji o ungumba uâ! Bhua kingile o kidi, o kuiuka, bheza ngó jingololo!

O ima ia iibha i bhanga Athu

⁸ Lamba diâ oso a bandekeza jinzu ku thandu dia jinzu ku mukombo, mábhia ku thandu dia mábhia, katé ididi ioso a i tambula, nʼa kale ene ngó a tungu mu ixi.

⁹ Nga kʼivu ni mátui mami, kia ki zuela Jihova dia Ilombo Ieta, uixi: Kutanga o kidi, nga-nda ku sengulula muene jinzu janzungule, katé ni mazemba mʼònene ma-ndu xala jingundu.

¹⁰ Kuinhi dia kibelebele dia mivide, dia kà bhané ngó kizongelu kimoxi kia batu; o ua kunu homele ia mbutu, u munʼé ngó efa imoxi, toka!

¹¹ Lamba dia ió oso akua ku dimeneka mu kusota uhólua; anga a nangenena kueneʼoko katé mʼusuku, katé kia zezuka ni vinhu!

¹² Mu izokola iâ usanga ni tukóxi, ni tumbânza, ni tungoma, ni jingaieta ni vinhu; kene kusuua kikalakalu kia Jihova, mba ku tongolola ufunu ua ikalakalu ia maku mê.

¹³ Kala kiki, mundu uami a kà uambata muene ku ubhika, mukonda kala ni kilunji! Ilâmba iâ a kà di-huha hanji ni nzala, kifuxi kiâ kia kà kala muene ni kikaku kia menha.

¹⁴ Kiene kia bhangesa o mbila kuvudisa o hánji iê, ni kujikula dikanu diê sé mbambe; ni kijingo kiâ ni kifuxi kiâ uâ, ni makembu mâ, ni oso a kexe mu kutana muʼaxaxi kâ, a kulumuka mu bòmbo dia kalunga.

¹⁵ Bheneʼobho o muthu ua kà tunuka, o kilamba ua kà sebuluka, o mesu ma akua izala a ka a tululula.

¹⁶ Maji o Jihova dia Ilômbo Ieta, mu kufundisa kuê, muene u tambula fuma; Nzambi, Ukôla, ua-nda ku di-tungula muene mu kulunga kuê.

¹⁷ Kieneʼokio-phe o ana a jimbudi, kúdia kuâ kua kalé, mukua ni mu makèla mâ; akua makanga a kèza mu dia ima ia xie mua titidila o mazonda.

¹⁸ Lamba dia ió, oso o kubhuma a kusunga ni mikolo ia izala, o ituxi a i sunga ni mikolo kala makalu.

¹⁹ Exi; A lenguluke, a zubhe kikalakalu kiê, nda tu ki mone; o phangu ia Dilemba dia Izalaiele, ize, idi-tukulule, nda tuʼijiie.

²⁰ Lamba dia ió oso o kuzanga a ku ixana mbote, o mbote aʼixana kuzanga; o kitombe a ki kita mukengeji o mukengeji a u kita kitombe; o kialulu exi, kiatouala, o kiatouala exi kialulu!

²¹ Lamba dia ió oso a di mona kuijiia ku mesu mâ ene, a di fika kudimuka ku mesu mâ-ene muene.

²² Lamba dia ió oso a di bhanga indanda mu kúnua o vinhu, o bhuala o kuketa makiákia, usanga a handamana,

²³ ni ió oso a lungisa mukua phulu, kabasa ua a bhana diminhinu; o ua lungu anga a muʼelesa!

²⁴ Kienhiki-phe, kala ki kuata o dimi dia mulengu ku ibhiaẋi, kala ki uama iangu ku mulengu, kiene ue kianda ku lukuta o lundanji luâ, mukuâ ni kubola; kuuabha kuâ, mbambe ni kitulu, kua kà jimuka kala fufutila: mbata o ngonge ia Jihova dia Ilômbo Ieta a i tènde, o kizuelu kia Dilemba dia Izalaiele a ki sebulula.

²⁵ Ki kia bhangesa o njinda ia Jihova ku uama ku thandu dia mundu uê, iú ua sunununa lukuaku luê, iú ua a bhana kaxitiku, katé ni milundu ia teketa; o imbi iâ iedile kala maxita muʼaxaxi ka nzunga; ku thandu dia iosuʼiii, njinda iê ki ia suku, maji lukuaku luê hanji ua luʼoleka.

²⁶ Muene ua kà leka Dibandela diê muʼaxaxi ka miji ia makanga, hé u a kà exana ni muixi, tundé ku maẋokololo maʼxi; anga a kèza ni malusolo.

²⁷ Muʼaxaxi kâ, ki muà kala muthu ua bhuila mba u tenguna; ki muà koxila muthu, mba uia ku kilu; ka kà mu jituna phonda mu mbunda, o mbâla ja haii jâ, ki ja kà batuka.

²⁸ O matoma ma mifula iâ, ma kà songoloka, ni mifula iâ ioso, muene, iolama; o ikoto ia jikabalu jâ, ufika kala ʼtadi dia holototo, o malola ma makalu mâ malenga mukua ni ngumba ia kitumba.

²⁹ O mutendu uâ kala ua hoji, a kà koma muene kala anʼa hoji, xi, a koma anga mbole aia na-iu, o u i kudila ka moneka.

³⁰ A kà a tela nzôngo bhu kizuua kieneʼokio, kala kinuminu kia menha a kalunga, se bhu kala muthu u tala mu kanga, ua kà mona ngó kuvunda, ni mukondo; o mukengeji ua kà biluka kitombe mu jingundu jâ.