Izaía 49 - O Mikanda Ikola

Selevende ia Jihova muene mukengeji ua akua matumbu

¹ Ngʼivienu, mu ikolo, enu mu athu muene ku makanga batekelenu: Jihova ua ngʼixana hanji kioso ki ngala mu mala, eme hanji mu divumu dia manhiʼetu, muene-phe ua tumbula kiá o dijina diami.

² Dikanu diami ua di kitula xibhata iatu, ua ngi vungina ni kivule kia lukuaku luê; ua ngi bhange ngi ditoma dia seke kiambote; iu ua ngi sueka mu kizu kiê.

³ Iú ua ngʼambela: Eie u selevende iami; u Izalaiele, momué muene mu nga-nda kutambuila o fuma.

⁴ Eme-phe, ngixi: Nga tale ngó hadi mu ku kalakala, nguzu iami nga i zange mu kingoho, i ia di-boto. Maji né kieneʼokio, kulûnga kuami kuala kua Jihova, o kisakidilu kiami kiala ni Nzambi.

⁵ Kiki-phe, Jihova, ua ngʼumbile ki ngala hanji mu mala, phala kukala selevende iê, uixi: Ngi bhekele dingi Jakobo, uize-nê bhabha; maji o Izalaiele-phe ka diehela ku mu bhongolola; maji-phe bhu pholo ia Nzambi a kà ngi jingisa, Nzambi iami muene uà kala nguzu iami.

⁶ Muene uambe dingi: O kukala ngó u selevende iami, phala kubhangulula ibuka ia Jakobo, ni ku ngi bhekela dingi o masubhu ma Izalaiele, ki kia soko; maji nga ku xikika, nʼu kale u Mukengeji ua akua-matumbu; ua a bhekela kubhuluka, katé ku maẋokololo aʼxi.

⁷ Jihova, Mubhuludi ua Izalaiele, Dilemba diê Ukôla, uambela muthu uoso a mu buangidika, a mu zemba kuala o mundu, o mubhika ua atumini, uixi: Muenhó a-nda ku mu balumukina bhu iandu kuala o jisobha, kia mu mona, ni ilamba uê, anga a kà diunda bhu pholo iê, mukonda dia henda ia Jihova, mukua kitongola, Dilemba Dikola dia Izalaiele, muthu ua ku tungula (ua ku sola).

O Kutunga dingi Jeluzaleme

⁸ Jihova ua zuela kiki: Sai thembu ia tokala i nga kuividila, sai kizuua kia kubhuluka ki nga ku kudila, nga-nda ku ku langa, nga-nda ku ku bhanga u kikutu kia mundu, phala u bhangulule oxi, maubhinganu ma buikisile u ma bheka dingi bhu maku ma athu oso ma a tokala.

⁹ Phala uambele iá a a kutu, uixi: Jitukenu; oso ene mua vundu uixi: Tukulukenu mu jinjila ja kuenda; a kala ni huta ia ku di-dikila; o mu ididi ioso ia matala, aia ni kusanga-mu sabhèlela ia kúdia kuâ.

¹⁰ Ka kala dingi ni nzala, kà kala dingi ni dinhota, né muzukuta né muanha ki ua kà a kuama dingi; kuma muenhó mukua ku a lendukila, ua kà endesa, anga ua kà a batesa kilendu katé ku jifiẋi ja menha.

¹¹ Anga milundu iami ioso ngi i bhanga njila; o ikoka iami a kà i zangumuna.

¹² Talesa, o iá a kà tunda makanga, o ianá a kà tunda ku suku ni ku mazanga, amukuá a kà tunda kʼoxi ia Sinime.

¹³ Imbenu, mu maúlu, eie ue u ixi, sanguluka; enu mu milundu tenu nzôngo ia kutana, kuma Jihova lelu ua tululula o povo iê, jihukunhu jê ua ji lendukila.

¹⁴ Maji Ziione, uixi: Jihova ua ngʼehelela kiá, Ngana iami ua ngi landuka.

¹⁵ Manhi muhatu u tena kujimba monʼê ua mu vuala, katé kia suka muene bhu kuehelela, mona ua tundu mu mala diê? Né-mbe bhu kala mama u landuka monʼê, eme-phe kana, kuma eie ki nga kà ku jimba, lémbue!

¹⁶ Talesa, nga ku soneka bhu mákanda a maku mami; o imbaka ié ia ngi kala ku mesu usuku ni muanha.

¹⁷ Anʼê a-nda kuiza lusolo kokué, maji o isuéia ié ni iluami ia ku zemba, momuʼé a-nda kutunda-mu kiá.

¹⁸ Bhetula-ze o mesu mé u kengelele mbandu ni mbandu, tala: ene-osoʼâ a bhongoloka a mu kuiza kokué; nga di-lokela muene, eme Jihova, kuila ene-osoʼâ ua-nda ku a zuata kala kizuatu kia makembu, anga u di-ẋiẋika-nâ kala u díbhanga.

¹⁹ Kuma ni mu ikangalakata ié, ni mu manhana mé, ni mʼoxi ié ioso ia buika, muene muoso mua-nda kutunga athu a vulu, katé a di xina-xina, o ió a kexe ku ku kunha, a-nda kuendelela dikanga.

²⁰ Katé ni ana a uhukunhu ué a-nda ku ku ambela mu dítui, exi: Kididi kia phophama kiavulu, suetuka-ku dingi, ngi mone bhu ngi tunga.

²¹ Eie-phe ua-nda kuila ni muẋima ué, uixi: O kiki, ana enhá mukuahi ua ngi vualela-u? eme nga kexile sé ana, uhukunhi uvula; ngele ku ubhika, eme nga tundu-ku; o iá-phe mukuahi ua ngi sasela-nâ? Talesa, ua kʼèla: eme nga subhukile ubheka; o iá-phe a kexe kuebhi?

²² Jihova uambe kiki: Nga kà zangula lukuaku luami, ngi lu lungisa ku ifuẋi, ngi futununa mvela iami ku ifuẋi ioso; ene-phe a kà ku bhekela anʼé a mala bhu maku, o anʼé a ahatu ejiia bhu isuxi.

²³ O jisobha a kà ku sasela ana; ana ilumba a jisobha a kala iledi ié; a kà ku diundila jinga ni pholo bhoxi, a kà ku lesa jinga o fufuta ia inama ié, bhene bhu ua-nda kuijidila kuma eme-muène Jihova, oso a ngi dielela eme, ka tena kukakuka.

²⁴ Manhi dizonda a tena ku mu tambula o mbole iê ia unhanga? Anga ió a a kutu mu kikuma kia kidi, a tena kubhulaka?

²⁵ Maji, Jihova uambe kiki: Kidi kiene, ió a a kutu, a-nda kutunda muene bhu maku ma dizonda, o mbole ia kuata o kisuéia, ia-nda kubhulaka muene; mbata nga-nda kuzoka ni ió oso a zoka nʼeie, o anʼé nga-nda ku a kula.

²⁶ O ió a ku bhondeleka ngʼa dikila niʼxitu jâ-ene, a kà kodiua ni manhinga mâ kala maluvu; anga xitu ioso ia kejiia kuma eme ngi Jihova, ngi Mubhuludi ué, Ngi Mukudi ué, ngi Dizonda dia Jakobo.