Izaía 48 - O Mikanda Ikola

Nzambi utetulula, ulongesa, ubhana Izalaiele jipolomesa

¹ Diembu dia Jakobo, ivenukiu, enu oso a mʼixana akua Izalaiele, enu mua tunda mbutu bhu otho ia Juda, muene kulokela mu dijina dia Jihova, muene kutumbula Nzambi ia Izalaiele, maji ki muene mu ki bhanga mu kidi ni mu uiukilu.

² A di-luka muene o dijina dia mbanza ikôla, anga a xamenena kua Nzambi ia Izalaiele; o dijina diê Jihova dia Ilombo Ieta.

³ O ima ioso ia diangele-ku, tundé mu xiahulu, nga mi tudila-iu kiá; kiene muene, ia tundile mu kanu diami, eme nga mʼivisa-iu; nga lenguluka ni ku i bhanga ii ia bhiti.

⁴ Mbata eme nga kʼijidile kuamba eie u ndaxi, ua thathamana o xingu kala muxibha ua felu, o dibhomo dié mukua ni dia ngôndo.

⁵ Kiene ima iii ki nga ku tudila na-iu tundé mu thembuʼomo; kioso kiluua i bhita, eme-phe nga ku ivisa-iu kiá, phala ku ile, uixi: O dilemba diami diene dia bhange ima ienhiʼii, mba o kiteka ki nga songesa, mba mukixi (o mukôko) u nga zunza, uene ua i tumikisa.

⁶ Ua kʼivua jinga kiá; tonginina ima ioso ienhiʼii kiambote; abha-phe, imʼei ki mua i kundila-hi? Tundé ue kindala, ngandeka-phe kiá ku ku ivisa, ima ii ki mu i kundila-hi? Tunde ue kindala, ngandeka-phe kiá ku ku ivisa.

⁷ Iòbhange kindala, ki ia xiahulu kana, eie-phe lelu ngó ua ivu, phala ku ile uixi: Tala, eme nga i ijiia kiá okulu.

⁸ Iene-phe eie kuaʼivua, kua ʼijiia, kana; né ngó o dítui dié ki dia jikukile luua, kuma nga kʼijiia kuila ueje kubhanga ufe, mukonda u muxibhaki, u mutondadi, tundié mu mala.

⁹ Mukonda-phe dia dijina diami, o njinda iami nga-nda ku i kokolokesa, mukonda dia diximanu diami, nga-nda ku ku lendukila, phala ki ngize mu ku ku katula.

¹⁰ Talesa, nga ku zelesa kiá, kana kala kia zunza o phalata; eie nga ku lolela mu muzukuta ua dilamba.

¹¹ Mukonda dia Dijina diami, mu Dijina diami, muene mu nga ki bhange, abha-phe ngʼehela kiebhi o dijina diami ku di-kasanesa? Kijingo kiami ki nga kà ki bhana ku muthu uengi.

Silu a mu solo kuala Jihova kukala Dikota

¹² Ngi bhe mátui Jakobo, tata, nʼeie u Izalaiele, u muthu nga ku ixana; eme-muène umoxi-ú, eme nga dianga, eme ue nga sukidila.

¹³ Lukuaku luami ue luene lua te o madisesa ma oxi, o kadilu kami kene ka zonga o maúlu ku makandʼa maku; kioso ki nga kà exana ene hé a kʼejiia bhuamoxi.

¹⁴ Bhongolokenu enu-oso, mu ivue: Mukuahi mudiâ uene mu kunda o ima iii? Ió Jihova ua mu zola, muene ua-nda ku kumbidila o vondadi ia muene, bhu kaẋi ni Babilonha, lukuaku luê lu balukile akua Kaldeia.

¹⁵ Eme, eme-muène nga kiambe; muene ue nga mu ixana kiá, nga-nda ku mu sunga nʼeza, o njila iê nga-nda ku i zediuisa.

¹⁶ Ngi zukamienu, muivue kiki: Tundé mu dimatekenu ki ngi fueta, kana; maji tundé bhaná bhu kia di-bhangela, eme bhene bhu nga kexe; kindala-phe Muadi Jihova, ua ngi tumikisa o Nzumbi iê.

Ixinganeku ia Jihova phala Mundu uê

¹⁷ Jihova, Mubhuludi ué, o Dilemba dia Izalaiele, uambe kiki: Eme Jihova Nzambi ié, u ku longa kioso kia uabha, hé u ku endesa mu njila i ua fuama kuenda mu ku di-tela.

¹⁸ Uaué! Tamanu ua bhele mátui ku ijila iami! O paze ié ieje kuila kala ngiji, o kulunga kué kueje kuila kala mabhuku ma Musanza ua Kalunga.

¹⁹ Katé ni mbutu ié ue, ieje kuila kala kisèkele; o oso a tunda mu vumu dié, ela kala jimbundu ja museke; o dijina diâ ki dieje ku batuka mba kujimuka ku mesu mami, lémbua.

²⁰ Tundenu mu Babilonha, muʼaxaxi ka akua Kaldeia lengenu-mu. Kolenu-kiu ni nzôngo ia kikóue; kiki ivisenu-kiu, mu ki ambate muene katé kua suku oxi, muexi: Jihova ua kula selevende iê Jakobo.

²¹ Ene ka tatele ni dinhota, kioso kia endesa mu kikangalakata, ua a tubhuilile menha mu ndanji. Kioso muene kia budile o ndanji, anga o menha a buabumuka, a mu tunda muenhomo.

²² Maji o athu abhumu, kala ni kutululuka; Jihova ua ki tange.