Izaía 46 - O Mikanda Ikola

¹ Bele uabhi-ku kiá, Nebo uatoloka, nga diuana! o mahamba mâ a ma tudika ku makunda ma ibhaku iâ; o imbamba ia makuba menu ia di-bhange kinemenu ngó phala o ibhaku ia bhuila kiá.

² A kotama, a lembuela bhuamoxi; a lémbua ku di katula o kimbamba kia ílumbua iâ, maji o muenhu uâ ua bokona mu ubhika.

³ Ngʼivue kunu, diembu dia Jakobo, tata, nʼenu mu masubhu ma diembu dia Izalaiele; enu mu athu nga mi ambatela bhu maku tundé mu mala; eme nga mi lela tundé mu divumu.

⁴ Ki tualʼiki katé ni ku jimvi; mukonda eme nga mi vuala, nga-nda ku mi sasa, nga kà mi ambata anga ngi mi langa.

⁵ Mukuahi mu ngi di-fuanganesa-nê eme, mu ngi sokesa ni nanhi, mu ngi fikisa-nê, nda tu di-fuangane?

⁶ A zanga o ulu mu ngonga, o phalata bhu pezo; a futila na udivi; muene anga u iudika-ku nzambi; hé a i diundila, a i bheza.

⁷ A i ta bhu ixusi, hé a i ambata, na i tula bhu kibuta kiê; i kala bheneʼobho, ku sondoloka-bhu ia lémbua; o ki bhu kala muthu u i tela hasa, iene ki i tena kutambuijila, ki i tena kukudila muthu bhu jiphaxi jê.

⁸ Kienhiki xinganekenu-kiu kiambote, mu sunge kilunji, lundenu-kiu ku muẋima, enu mu atondadi.

⁹ Lembalalenu ima ia bhita tundé mu xiahulu; Kuma eme-muène ngi Nzambi, kana-ku Nzambi iengi, kana-ku ua soko nʼeme,

¹⁰ ngi mukua kutanga o dizubhilu tundé kiá bhu dimatekenu, tundé mu xiahulu muná ngi tanga ima kiluua iiza-ku; ngixi: Phangu iami inangenena, ngenda ni kubhanga vondadi iami ioso;

¹¹ ngʼixana holokoko tundé mu thunda-mbulu, o muthu ngi ta-nê phangu iami, u tunda ku maẋokololo; mukonda kiene ki nga tange, kiene ki kia kà bhita; eme nga ki xindi, nga kà ki bhanga muene.

¹² Ngivienu, enu mua kola o muẋima, enu o kuiuka kua mi kala dikanga.

¹³ Nga kà ku zukamesa o uiukilu uami; ki ua kà sanduka, kana, ni ubhuluilu uami ki ua kà kokoloka; nga kà xikika kubhuluka mu Ziione, ni kizunda kiami mua Izalaiele.