Izaía 44 - O Mikanda Ikola

Nzambi muene Suke-ku;

¹ Maji-phe ívua koko, Jakobo tata, selevende iami, nʼeie Izalaiele, u muthu nga ku sola.

² Jihova, ua ku bhanga iu ua kʼumbu tundé mu mala iú ua xikamena o ku ku banda, uambe kiki: Ku kale ni uoma, Jakobo tata, selevende iami, nʼeie Jesulume u muthu nga ku sola.

³ Mbata o uala ni dinhota nga-nda ku mu lunduluila menha, o mukáu uakukuta nga-nda ku u fuafuesa jingiji? nga-nda ku lundulula Nzumbi iami ku thanduʼa mbutu ié, luvualu lué ngi lu tuluila kubhanduluka.

⁴ Anga a fuafuela mu isasa kala misalakelu ku mbanduʼa jihonga ja menha.

⁵ Muenhú ua kèla: Eme nga tokala kua Jihova; mukuá ua kà di-luka dijina dia Jakobo; mukuá dingi uà di-soneka ni lukuaku luê, uixi: Eme ngi mukua-Jihova, muiji uami ua tambula o dijina dia Izalaiele.

⁶ Jihova, sobha ia Izalaiele, Mukudi ué, Jihova dia Ifuẋi, uambe kiki: eme-muène nga dianga, eme-muène nga sukidila; bhu nga kambe eme ki bhu kala Nzambi.

⁷ Mukuahi ua soko ni eme mu kuixana, ni ku dianga o ku lumbolola kiki, anga ima u i ta mu ididi iê, kioso ki ia tokala kubhita, bhu pholo iami, tundé ki nga bhange o muiji ua diangele-ku? Muenhó a tange ima ia hádia, ni ima ioso ia kéza-ku.

⁸ Ki mu bhuuame, ki mu kale ni uoma; manhi tundé ku dimatekenu ki nga mʼivisa-kiu kiá, ki nga mi tangela-kiu? mbata enu muala mu jimbangi jami.

Mahamba kima kia ngoho

⁹ Jihete joso ja kusonga iteka, makutu mâ; o ima iâ ioso ue ia a uabhela ni muẋima uoso, ki i bhandulula ni kima; ene muene ala jimbangi kuma o iteka iâ ienhiʼii kumona ki i tena, kuívua lémbue; phala ene a tandanganhe.

¹⁰ Nanhi u bhanga Nzambi, nʼa zunza kiteka kia kuseta, ki ki bhandulula kima?

¹¹ Talesa-ze ene oso a dinhenga-nâ a-nda ku kakuka; mukonda jihete joso athu ngó mu athu, kuabhu; a di-phophe a balumuke maji ene-oso anda ku tungunuka anga sonhi jʼa kuata.

¹² Musudi-a-thumba u sula dikuua, ukalakela ku makala mauana, u di iudika ni jinzundu, u di bundulula ni nguzu ia lukuaku luê, ki bhua kúdia ki bhua kúnua, nguzu ia mʼubhu kindala iú teketa ni nzala, iu iokojoka ni dinhota.

¹³ O musongi-a-mabaia uta lékoa, u xinda ni lápi ia njilu, u songa ni palana, u xinda ni kompaso anga u bhanga o nzambi ié mu kudifuanganu kia muthu, u i fikisa mu lubhe lua muthu, phala ni i kala mʼonzo.

¹⁴ Kia batula misédulu, u katula muxipre mba mukaluvádiu, anga u suina muene ni kubatula o mixi mu muxitu; u phapha o ulumelu, o mvula anga i u kudisa.

¹⁵ O mixi ienhiʼii, iene o muthu ia uika na-iu o túbhia mʼonzo, mbé o kuota ni kuoha O mbolo: u iudika-ku ue nzambi anga u i diundila, u songesa-ku ue kiteka kia kuseta, hé uenda ni ku ki fukamena.

¹⁶ U katula-ku mbandu u i ta mu túbhia, o mbandu ia mukuá ulamba na-iu o xitu; uoha anga udia, uikuta; uota túbhia, u zumbuka, uixi: Euá, ngʼoto kiá, mbé ki kala o tubhiaʼiki.

¹⁷ Bheneʼobho ku kiximbu kia subhuka-bhu u ki iudika kia nzambi, kiteka kia kuseta; u ki fukamena, u diunda bhoxi, u ki tela jihasa, uixi: Ngi kudile, mukonda eie muene u Nzambi iami.

¹⁸ Kejiia kima, kene ku tongolola; kuma ua a xiti mesu, a lémbue kumona, ni miẋima iâ ue, a lémbue o kuijiia.

¹⁹ Ki bhuala u ki ta ku muẋima, a lémbua kuijiia, a lémbua kilunji kia kuxinganeka, kuila: Mbandu nga i oha mu túbhia, ku makala mê kuene ku ngʼohela o mbolo, kuene ue ku ngohela o xitu, eme nga i di; abha-phe o luhuinhi lua subhuka-bhu mbé ngi lu bhanga kiá kima kia kisunji? Kifua o kima kia tundu ku muxi kiene muene ki ngi fukamena?

²⁰ Lémbue: ukuata ku di-dikila ni uthôkua; muẋima uê ua juuala uene ua mu luezesa; bhua telʼobho ka tena dingi kubhulula o muenhu uê, mba kuila: Mbé bhu lukuaku luami lua kúdia ki bhuala makutu?

Polomesa ia ufofo

²¹ Eie Jakobo ni Izalaiele, lembalala ima ienhiʼii, mbata eie u selevende iami; eme-muène nga kʼumba, eie Izalaiele tata, u selevende iami; eme ki nga-nda ku ku jimba, kana.

²² Ikuma ié ngi i jimuna kala mbundu, o ituxi ié ngi i bhuisa-ku kala dituta: Vutuka kokuami, mbata eme nga ku kula kiá.

²³ Enu, maúlu, imbenu ni ngalasa, mbata Jihova muene ua bhange kiki; tanenu-ku, enu mu ididi ia boloka, enu mu milundu te-nu nzongo ia kusanguluka; nʼenu ue mu mixitu, ni mixi ioso iene-mu; mbata Jihova ua kula Jakobo iú ua tambula fuma mu Izalaiele.

²⁴ Jihova dia Mukudi ué, ua ku bhange ki uala mu divumu, uambe kiki: Eme Jihova ngene kubhanga ioso, diulu eme-muène nga di olekele ubheka uami, oxi nga i zale se muthu ku ngi kuatekesa;

²⁵ Ngi mukua ku tungununa o iphata ia akua kuzambula o makutu, akua kusuma ngó a kituka maioua; jinjimu ngʼa vutula kuema, unjimu uâ ngi u kitula uôua-mu-uôua.

²⁶ Eme-muène ngi kuatesa o kizuelu kia selevende iami, ngi kumbidila ulongelu ua jiphunga jami; ngambela Jeluzaleme ngixi: Eie a kà ku tunga dingi; ngambela madiembu ma Juda, kuma: Enu a kà mi tunga lua mukua, eme ngi some dingi jingundu jâ.

²⁷ O musanza uazongo ngi u ila: Kukuta! Eme hé ngi kukutisa o jingiji jê;

²⁸ Anga ngi tanga Silu kuila: Muenhó kabhila kami, muene ua kà kumbidila o vondadi iami ioso ia ngi uabhela; ngambela ue Jeluzaleme ngixi: Tunga-soma; o Tembulu, ue, ngixi: Tunga dingi o madisesa mé!