Izaía 43 - O Mikanda Ikola

Nzambi muene ngó ukula Izalaiele

¹ Kiki, kia zuela Jihova ua ku bhanga, eie Jakobo, tata, iu ua ku umbu, eie u Izalaiele, uexi: Ku kale ni uoma, mbata nga ku kula muene; nga ku tumbula muene mu dijina, eie u muthu uami.

² Kioso ki ua kà bhita mu menha mua zongo, tuà kala kiiadi; kioso ki uà bhita mu jingiji, kua-nda ku boba; ki uà kà bhita mu túbhia, kua-nda kujikata; o mulengo ki ua kà tena ku kuata kokué.

³ Mbata eme-muene Jihova Nzambi ié, Dilemba Dikola dia Izalaiele, Mubhuludi uê; nga bhana Ijitu mu ku kukula, ni Itiiópia ni Seba, bhu kididi kiê.

⁴ Kuma eie ua te kiavulu ku mesu mami, uala-phe ditala dia ujitu, eme nga ku zola; kiene ki nga bhela athu bhu kididi kiê, nga bhakula athu avulu mu kula muenhu ué.

⁵ Ku kale ni uoma-phe, kuma eme ngala bhuamoxi nʼeie; nga-nda kuia ku thunda ku takana-ku o mbutu ié, anga ngi bhita ku luiji ni ku ku ongeka.

⁶ Ngambela mbandu ia suku, ngixi: Bhana! Anga ngambela mbandu ia sulu ngixi: Kana ku a bhaka; ngi bhekedienu anʼami a mala ene dikanga; ni anʼami a ahatu ene kua suku oxi.

⁷ Oso a exana mu dijina diami, ni oso nga a bhanga phala o diximanu diami, eme-muène ngʼa ombu, kidi muene, eme muene ngʼa iudika.

⁸ Ngi bhekedienu o mundu ua ifofo, maji ala ni mesu; ngi bhekedienu o mixilu, maji ala ni mátui.

⁹ Ifuẋi ioso iòngame bhuamoxi, jipovo ji di-phophe; mukuahi mudiâ u tena ku tu tangela kiki, nʼa tu ivisa ima ia xiahulu? a tuie-bhu jimbangi jê, phala mundu a kʼivue, nda a ki xikine kuila, kidi kiene.

¹⁰ Enu-enu mu jimbangi jami, eme Jihova, ni selevende iami, nga mu solo bhene bhu mu kʼijidila, nda mu ki xikane, mu tongolole kuila, eme-muène Nzambi, ki kua kexidié Nzambi iengi ua ngi diangela iu ua di-iudika, o ku pholo ue ku tuia kana-ku nzambi iengi ua kà ngi bhingana eme.

¹¹ Eme, eme-muène ngi Ngana, kana-ku Mubhuludi uengi, kale eme ngó.

¹² Eme, nga kʼijidisa, eme nga kudila, eme nga kʼivisa, muʼaxaxi kenu ki mua kexile Nzambi iengi, enu-ene mu jimbangi jami, eme Jihova; Kuma eme ngi Nzambi.

¹³ Mʼokulu, kioso kiluua ku kala ngó kizuua, eme ngeniami kiá; ki bhuala u tena kukatula muthu bhu lukuaku luami; o ki ngi bhanga eme, mukuahi u ki fudisa?

Polomesa ia ku kudila Izalaiele mu Babilonha

¹⁴ Jihova, Mubhuludi ué, o Dilemba Dikola dia Izalaiele, uambe kiki: Mukonda dia enu, kisuéia nga ki tumikisa ku Babilonha, ene-oso anga nga kà kulumuisa kala jingômbo, kiene muene, o jingana ja Kaldeia nga a longesa mu jinaviiu mua kexe ku di hanzela.

¹⁵ Eme ngi Jihova, Lemba dienu dia Vumu, Mubhangi a Izalaiele, ngi sobha ienu.

¹⁶ Kiene kia zuela Jihova, ua iudika kikoka mu kalunga, o muʼaxaxi ka mabhuku ma temanana iu ua iudika-mu hoka ia kubhitila;

¹⁷ Muene ua bhiẋika dikalu ni kabalu, ua bhiẋika o kifuxi kia ita ni ukuenze ua kúlua; uambe kiki: ene-oso a buila bhuamoxi, ki mungu dingi a kà balumuka; a a jimi muene; mukua ni muanga kiene ue kia a jimi.

¹⁸ Ki mu banze o ima ia bhiti kiá, ki mu kuate mu ndonda ia ima ia xiahulu.

¹⁹ Talesenu, nga-nda kubhanga kiá kima kiobhe, kia-nda ku di-monekena muene; mbe ki mua-nda ku kʼijiienunu? nga-nda kujikula njila mu kikangalakata, ngi ta jingiji mu dinhana.

²⁰ O iama ia mukáu ia-nda ku ngi bhikila jinga, ni jinhoka ni anʼa kihendembumba; kuma nga-nda kuta menha-mu-menha mʼoxi ia kisekele, ni jingiji ji kunguluka mu dinhana, phala kunuisa povo iami, o mundu uami u nga tungula.

²¹ Povo ienhiʼii nga i solo phala ende ni ku ngi ximana.

²² Maji-phe, Jakobo, eie kua ngi hingila, maji eie u Izalaiele ua ngi bhuidila.

²³ Hombo ni mbudi ia jisata jê, ku ngi bhekela-iu; ua lémbua ku ngi xila ni maujitu mé; eme-phe ki nga ku jijidika ku ngi satela, ki nga ku bhuidisa ni kututa uasu ua mazumba.

²⁴ Kua ngi sumbila lumbungu lua uasu ua dizumba mu kitadi, ku ngʼikutisa ue ni matheka ma jisata jé; maji ua ngi kumisa ngó ni ituxi ié, eie ua ngi bhuidisa ni ikuma ié.

²⁵ Eme, eme-muène ngi jimuna o itondalu ié mu henda iami; o ituxi ié ki ngi i banze dingi.

²⁶ Ngi lembalese-phe hanji; tu bokuene bhuamoxi mu kufunda; ngi tangele hanji o maba mé moso ma kubhekela o kulûnga.

²⁷ Tatʼenu ua diangele-ku uate kutuxi, o alombolodiʼê a ngi tondalela.

²⁸ Kienhiki ue o makota ma thembulu nga a sebulula; o Jakobo nga kà mu bhubhidila, o Izalaiele nga kà mu ta mondo.