Izaía 42 - O Mikanda Ikola

Selevende ia Jihova

¹ Talesenu, selevende iami iú, nga mu fikidila eme, muthu uami nga mu solo, ua ngi uabhela ku muẋima; Nzumbi iami nga i te ku thandu diê; muene ua kà fundisa mu kidi akua matumbu.

² Muene ka kà dikola, mba u di zangeleka, né o dízui diê ka dʼivua mu nzunga.

³ Dithethele dia bukuka muene ka di sasujula, o muanga u xongota ka kà u jima; maji mu kidi, muene ua kèza ni ufundisilu ua iuka.

⁴ O muene ka kà fula, ka kà mu tolojola katé kia bheka o uiukilu mu ngongo; o ikolo ia kà kingila o ulongelu uê.

⁵ O Nzambi, Jihova uà bhanga maúlu, iu ua ma zala, ua futununa oxi ni ima ioso iene-mu; mukua ku bhana o kubhuima ku mundu uoso uala-mu, ua bhana o nzumbi kua ió a-lu nhungina-mu, uixi:

⁶ Eme ngi Jihova, nga ku ixana mu kuiuka kuami, nga-nda ku ku kuata mu lukuaku, anga ngi ku bhaka, hé ngi ku bhana u kale u kikutu kia akua jixi joso ni u kale u mukengeji ua akua-matumbu.

⁷ Phala u tonese o mesu a ifofo, ni ku jituna oso a a kuika, ni ku katula muʼaleia oso-a xikama mu kitombe.

⁸ Eme ngi Jihova, didi diene o dijina diami; o fuma iami ki ngi i bhana muthu uengi, kana, mba o diximanu dia ngi tokala eme ngi di ehela ku iteka ia kusonga.

⁹ Talesenu o ima iòtange mʼokulu ia bhiti; ngi mi tangela kiá ima ia ubhe, ngi mʼivise-iu kiá kiosuʼiki kiluua i tomboka ku mukengeji.

Muimbu ua Diximanu

¹⁰ Imbilenu Jihova mukumbi uobhe, o diximanu diê diende muene ni ku tokomoka tundé kua suku oxi; teketenu enu ue mua mu kuendela ku thanduʼa kalunga mu jinaviiu ni ima ioso iene-mu, nʼenu ue mu ikolo ni oso a tunga-mu.

¹¹ Iphenza ioso ni madiembu mê Zangulenu dízui, ni tusanzala tuoso tua Kedale; oso a tunga ku matadi ele muene bulukutu ni ngalasa; nzôngo iâ a i tele muene ku thala-a-milundu.

¹² A bhane fuma kua Jihova, o diximanu diê a di tange mu ikolo.

¹³ Jihova ua-nda kutubhuka mukuâ ni kindanda; ua-nda ku di-ambatesa ni huii kala ki bhanga o dikuenze dieta; u kola, u ta kibulukutu kionéne, anga u tolola o jinguma jê.

Nzambi u bhana Polomesa ia kukuatekesa o Mundu uê

¹⁴ Muene, uixi: Nga dixibha kiá thembu ia vulu; ngʼedile hudí, nga di kondeka; maji kindala-phe ngi ta kiá mitendu kala ia muhatu uala ku isènda, ene-oso ngʼa buikisa hé ngʼa minhina kumoxi.

¹⁵ Ni milundu ni tuthuthu-lundu ngʼi bilula oxi ia kisèkele, o isasa iê ioso ngi i kukutisa, o jingiji nga kà ji kitula ikolo, o mazanga ngi ma thothuenesa.

¹⁶ Anga ngi batesa o ifofo mu njila kiluua a ijiia, nga kà a bhitisa mu njila ia musanu; o kitombe nga kà ki bilula mukengeji bhu pholo iâ, o njila jala matadi nga ji iukisa. O ima ienhiʼii iene i nga-nda ku a bhanga, ki mungu dingi nga ehelela.

¹⁷ Oso-phe a dielela iteka ia kuseta, a-nda kuzuzuta ni jisonhi; ió ene mu ku ambela o iteka iozunze, exi: Enu mu jinzambi jetu.

O uindua ua Izalaiele mu kukamba kudilonga

¹⁸ Mixilu, ivenu: enu ifofo tonenu, phala mu tene kumona.

¹⁹ Kifofo nanhi, oko mueniʼé selevende iami; mba muxilu, kala o phunga iami; ngi mu tuma nanhi muene? Kifofo nanhi, kala ió a mu bhana o futu? O kifofo kala o selevende ia Jihova, nanhi?

²⁰ Eie u mona muene ima ia nzungule, maji ku i lundu; né-mbe u kala ni mátui a jikuka, kuivu kima.

²¹ Jihova ua mu zolela ngó mukonda dia henda ia kuiuka kuê; ua mu jingisila ku kitumu, iú ua mu fumanesa.

²² Maji o athu iá, athu ònhane, óbhunde; ene oso a a kutila mu jingenda, ia a a sueka mu jinzu ja makuikilu; a a bhange mbole, u a kudila ka moneka; ela kala imbamba ia kubhunda, ki bhuala uila: Vutula, nguetu!

²³ O kienhiki mudienu, mukuahi u xikina ku kʼivua? mukuahi u batekela nʼevue kioso kʼiza ku hádia?

²⁴ O Jakobo nanhi muene ua mu bhakula mu madibongela? Izalaiele mukuahi ua mu bhakula ku ingumba? Abha ki Jihova muene, ió a mu tele ene o ituxi, anga a dituna kuenda mu jinila jê, hé a di tuna kuívua o ngonge iê?

²⁵ Kiene kia bhangesa Jihova ku a lunduluila o kutema kua njinda iê, ni kusuina kua ita, iu ua a te mukonda ua milengo mu jimbandu; maji hanji-phe a ẋinukʼâ; iu ua a oha-phe, maji ene-phe ki kia a kuatela kima, a lémbua ku ki ta o muẋima.