Izaía 41 - O Mikanda Ikola

Jihova muene ngó o Nzambi imoxi; Izalaiele ua fuama ku mu dielela ngó muene

¹ Enu mu ikolo, dixibhienu bhu pholo iami, enu mu mundu endenu ni kusunga nguzu iobhe. Bhiẋilenu mu zuele: tu zukamienu kumoxi tu di-tetulule.

² Mukuahi ua takanene muthu uaiuka ku thunda, iu ua mu bheka bhu kinama kiê? Mukuahi ua tula o ifuẋi bhu pholo iê, iu ua mu mu bhangesa kutumina o jingana? O muene iu ua a bhakula ku xibhata iê kala fufuta, ua a seiela ku mufula uê mukuâ ni ibhiate ia di-ambatesa ni kitembu.

³ Muene ua a zudidika, anga u bhitʼé kimuanu mu njila nuka a i bhitile.

⁴ Mukuahi-phe ua bhange kiki, uexana o miji phala i kuate o kulaia tunde ku dimatekenu? Eme ngi Jihova; nga dianga, eme-muène ngala ue kumoxi ni iá a sukidila-ku; eme-muène, muene!

⁵ O ikolo ia mu muene anga i kuata kuteketa; o jimbambe kua suku oxi ja teketa; athu a di phopho, a suetuka bhua zukama, ia eza.

⁶ A di-suinisa mudiâ, kala muthu uambela mukuâ, uixi; Kolokota.

⁷ O hete ia ufunu ua suinisa udivi; o mukua kusokelesa ni martelo ua suinisa musudi-a-thumba, kuamba: Kima ki ua sokeka kia uabha. Bhenhobho-phe o kiteka u ki kolesa ni jiphelèko phala ki ki zambe.

⁸ Maji eie-phe, Izalaiele, u selevende iami, eie, u Jakobo, u muthu nga ku tungula, u mbutu ia Mbalahamu dia kamba diami,

⁹ eie u muthu nga ku katula ku maẋokololo maʼxi, eme nga ku ixana bhuʼaxaxi ka ió a ku tundu, bhu ua kexile, ngexi-phe: Eʼmuene u selevende iami, eme nga ku sola muene, ki ngi ku ambudisa, kana.

¹⁰ Kana kukala ni uoma, kuma eme ngala bhuamoxi nʼeie; kana kubhuuama, mbata eme ngala ngi Nzambi ié; eme ngi ku suinisa, hé ngi ku kuatekesa, anga ngi ku fikidila ni lukuaku luami lua kadilu, lua kuiuka kuami.

¹¹ Talesa, oso a ku kala ni luma, ala ku ku langata, sonhi ja-nda ku a kuata, a kakuka muene; a-nda kujimuka, oso a kuata kuzoka nʼeie, a kà jima mbutu.

¹² Né uedi u a kenga, kua-nda ku a sanga; kuma ió oso a bhânga mvunda nʼeie, a-nda kubatuka-ku; kala ue ió oso alua ita nʼeie, a di bhanga kingoho.

¹³ Mbata eme, ngi Jihova Nzambi ié, ngi ku kuata mu lukuaku lué lua dilu; hé ngi ku ambela, ngixi: Ku kale ni uoma, eme ngi ku banda.

¹⁴ Ku kale-phe ni uoma, eie u kabamba ka Jakobo, eie u kakifuẋi ka Izalaiele; eme Jihova, ngi ku banda, kuma Mukudi ué, muene Suke-ku, Dilemba dia Izalaiele.

¹⁵ Talesa, nga ku bhange u kivundilu kióbhe kia songoloka o jisungu; ua kà sengulula o milundu, anga u i titila, o tu thuthulundu u tu bhanga kala isaxi.

¹⁶ Eie ua kà a bhiata muene bhu mbango anga a phephuluka ni kitembu, o kibhungu-phe kia kà a muanga; maji eie-phe ua kà sangulukila mua Jihova, ua kà di-thathela kua Dilemba Dikola dia Izalaiele.

¹⁷ O jiphulungu ni akua-hadi oso a sota menha, o menha-phe ka moneka, anga o dimi diâ di thothuena ni dinhota; maji eme, ngi Jihova, nga-nda ku a evua, eme ngi Nzambi ia Izalaiele, ki ngʼa ehelela, kana.

¹⁸ Nga kà jikula jingiji mu ididi ia di-leka, ni jifiẋi mu makôlo; o kikangalakata nga kà ki bilula majiia ma menha, o ixi ia kukuta nga kà i bhanga jithu ja menha.

¹⁹ Mu kikangalakata nga kà phapha-mu misédulu, ni muẋi ua musita, ni mumurta, ni mudiva; o mu dinhâna ue nga kà ta-mu mufaia, mu-ulumelu ni ma-álmu kumoxi;

²⁰ phala mundu uoso a mone, ejiie, a tongolole, ene-oso ki a tetulukile bhuamoxi kuila lukuaku lua Jihova luene lua bhange kiki, o Dilemba Dikola dia Izalaiele muene ua ki bhange.

Akua-iteka a lémbua kuzambula ima ia bhiti kiá mba iza-ku

²¹ Jihova uedi, uixi: Ngi bhekedienu dimanda dienu kunu, ioso o mitue i mua nomona, muexi bhene bu tu lungila, tulenu-iu bhabha, eme sobha ia Jakobo.

²² Ndokuenu, zenu mu tu kundile ima ioso ia-nda kuiza-ku; tu kundidienu ioso ima ia kexe-ku mu thembu jokulu, nda tu i tongolole, tu ʼijiie o disukelu diê; mba-phe tu ivisienu o ima ia hádia.

²³ Tu kundidienu ima ia xikamena hanji kuiza-ku, nda tuijiie kuila, mu jinzambi muene; mba-phe bhangenu kia uabha, mba bhangenu kiaiibha, nda tu diuane, tu ki mone ku mundu.

²⁴ Talesenu-phe, enu ki mualʼokio, ki mu kima, kana; o kikalakalu kienu, kingoho kialʼé kota; uoso u mi sola enu, u diuana kisunji.

²⁵ Ngi balumuna muthu ku suku, muthu muenhú hé uiza, ua tundu tundé bhu tundila o dikumbi, muene ua-nda kuhingila o dijina diami; muene ua-nda kutula ku thanduʼa jingana kala ku thanduʼa malôua, kala mumbi kia toxa o utuma, kiene kia-nda ku a diota-diota.

²⁶ O kienhiki mukua-hi ua ki tange tunde bhu dimatekenu, nda tu kʼijiie, mba mukua-hi ua ki jimbula, kioso kiluua kʼiza-bhu, nda tu muʼile: Ió muthu uaiuka? Maji lémbue, ki bhuala u ki jimbula, ki bhuala u ki tukulula, ki bhuala ngó muthu uivua maka menu.

²⁷ Eme, eme-muène ngi dianga kutangela Ziione kuila: Talesa, iá bhaná; O Jeluzaleme ngi mu bhana mubokiʼa jinjimbu jambote.

²⁸ Kioso eme ki ngʼedi suí, ki bhuala muthu nga mu mono; katé muene ni bhu jindongixi jenhiji, ki bhuala muthu ngi tena o ku mu ibhula, mba u ngi vutuila kizuelu.

²⁹ Kuma ene oso a di-bhange kingoho; o ikalakalu iâ, ki kima; o iteka iâ ia kuzunza mulenge uahatu, uene kima kia ngó.