Izaía 40 - O Mikanda Ikola

O ubhulukilu a u dielelesa ku ana a Izalaiele

¹ Athu ami a kondienu malamba, a kondienu malamba, kiene kiambe Nzambi ienu.

² Jeluzaleme mu tedienu maka ma mu kuatekesa muẋima moxi; mu tangedienu kuamba dinhengena dié diabhu-ku, kikuma kiê kiololoke kiá; o ituxi iê ioso, ua i tambuila kiá luiadi ku lukuaku lua Jihova.

³ Dízui dia ió u dikola mu ditutu: Iudikenu njila ia Jihova, iukisenu ikoka mu dinhana phala Nzambi ietu.

⁴ Jihonga a kà ji lamba, milundu ionéne ni iòfele a kà i sengulula; Kioso kia bhengalala a kà ki iukisa, o kia kundamana a kà ki sokelesa.

⁵ O fuma ia Jihova anga i tukuluka, o xitu ioso kumoxi ia kà ki mona, kuila Dikanu dia Jihova dia ki tange.

⁶ Dizui-phe diambe: Dikole; muene-phe uixi: Ngi kola kima kiahi? Xitu ioso mukuâ ni iangu, o kuuabha kuê kuoso mukuâ ni itulu ia iangu mu mukáu.

⁷ O iangu ilela, o itulu i lalumuka, kioso muha ua Jihova ki u bhuselela-ku. Kidi kiene, bá! O athu mukuâ ni iangu!

⁸ Iangu Ilela, o itulu i lalumuka, maji o maka ma Nzambi ietu-phe, ma xalela-ku, kuma ene a kalé kiá, katé ku hadia ni hadia.

⁹ Eie, tata u muboke-a-njimbu iambote kua Ziione, banda-phe, ku mulundu ua di leka. Eie, tata, u muboke-a-njimbu iambote kua Jeluzaleme zangumuna dízui dié ni nguzu ioso; zangula-diu muene, ku kale ni uoma, u tangele o madiembu ma Juda, uixi: Talesenu, Nzambi ienu iú bhabhʼú!

¹⁰ Talesa, muadi Jihova ua-nda kuiza kala dizonda, o lukuaku luê-phe luene lua-nda kutumina. Tala-phe o futu iê uiza na-iu, o kisakidilu kiê ua ki tuamekesa ku pholo iê.

¹¹ O kilunga kiê, ua kà ki disa kala mubidi; O tumbudi ua kà tu ongeka bhu maku, hé u tu akata bhu jihata jê; o joso javuala, muene u ji endesa kilendu.

Nzambi ia Izalaiele ka moneka soko diê

¹² Nanhi ua zongele menha bhu kànda dia lukuaku luê, anga o diulu u di zonga ni makànda a maku, iu ua bhake o fufuta mu kitutu kia kuzongela anga o milundu ni tu thuthulundu u i pezala?

¹³ Mukuahi uendesa o Nzumbi ia Jihova? Ndongixi kuẋi, ua mu longesa?

¹⁴ Ua xikamene ni nanhi ku kaiula, phala ku mu bhana o kheku, nʼa mu longe o jinjila ja unjimu ni kuijiia?

¹⁵ Ku pholo iê, o ifuẋi ioso, mukuâ ni dibêbe di láuka ku mbi-nda ia menha; mba mukuâ ni mvindu ia di-kuua-kuua bhu longa dia pezo; talesa-phe, o ikolo u i kuua mu ididi iê, mukuâ ni fufutila iò takule.

¹⁶ Talesa-ze, ditutu dioso dia Libano ki di soko phala túbhia, o iama iê ioso ue iene-mu, o ku i bhakula, ku jisata ja kuoha, iatolo.

¹⁷ O ifuẋi ioso bhu pholo iê ki kima; o muene athu ua a kita kingoho.

¹⁸ Enu-phe mukuahi mu mu di-fuanganesa ni Nzambi? Mba mu mu fikisa ni kima kiahi?

¹⁹ O hete ia ufunu uzunza kiteka, o udivi anga u ki folala ni ulu, hé u ki zunzila malubhambu a phalata.

²⁰ O ngadiama ka tena kubhana kia soko, u sola muxi ua kithèndele; u sota ue uoso hete ia kusonga, anga u mu songela o kiteka kila hudí, ki kiene ku di-zambesa.

²¹ Manhi ki mu kʼijiia? Manhi ki mu kʼivua? Inga tundé ku dimatekenu kienʼiki muene kiluua a mi tangela-kiu? Mbé madisesa ma oxi ki mu ma tongolola?

²² Muene muène ua xikama kulu dia dikende dioso diaʼxi, o athu a tunga-mu ia edi kala mahoho ku mesu mê; muene muène uoleka maúlu kala thanga ia lona, iu ua ma futununa kala balaka, phala kutunga-mu.

²³ O ilamba u i kitula kingoho, o afundixi mu ngongo u a tumbulula, kindala ku a di-tela manhí.

²⁴ Kiene ngoho kia-nda kuila a zubha ku a phapha ni ku a kuua, o kixina kiâ anga kiandeka kuta jindanji ji kudila koxi a mavu, kindala a lela a kukuta kiá, kioso muene kia a bhusa anga kitembu kia suina kia a ambata kala ibhiaẋi.

²⁵ Mua-nda ku ngi sokesa-phe ni mukuahi, ngi tena ku di fuangana-nê? Kiene kiambe Nzambi Ukôla.

²⁶ Bhetulenu-phe o mesu menu bhulu, mu talese. Nanhi ua bhanga o ima ioso iii? Ió u tena kubhangesa kuila kifuxi kiê kutunda mu imʼiii hé u kiʼalula; Ió u tena kuixana o jithéthembua joso ku majina mukonda dia unéne ua nguzu iê, kuma-phe o mu kutena ni mu ku suina muene Ngungu-a-Nzumba, kana-bhu kima ki tena ku di nhunga.

²⁷ Eie-phe, Jakobo, u ki tangela-hi, nʼeie u Izalaiele, u ki zuelela-hi, ni kulongolola kuamba: Manhi bhu ngala kubhitʼabha, Jihova kejiia-bhu; o mulonga uami uala ku di bhitila, Nzambi iami ua lémbua ku uijiia?

²⁸ Manhi kua kʼijiia, kua kʼivua kuila o Nzambi ió uà kaiela-ku, muene Jihova, o Mubhangi a ixi ioso Katé ni jihota jê, kene kuzônda, kene kubhuila? O kilunji kiê ki bhuene muthu utena kuzubha ku ki ijiia?

²⁹ Muene ubhana huiii kua ió uazôndo, o ua kambe nguzu u mu bhana kusuína kuia ni ku di bandekeza.

³⁰ O minzalngala a zonda, a bhuila; o makuenze a mala ni kidi muene a di bala, a lémbua muene toko-toko.

³¹ Maji oso a kinga kua Ngana-phe, a tambula nguzu iobhe, a di-leka ku mabhabha kala jiholokoko; alenga sé kuzônda, enda muene sé ngó kubhuila.