Izaía 4 - O Mikanda Ikola

¹ Bhu kizuuʼokio, sambuadi dia muhatu dia kà jijila diiala dimoxi, exi: Etu o kúdia, tudia jinga mu konda ietu, kuzuata tu di-zuika jinga etu-ene; hé kima, eie tu xikine ngó, a tu ijiie kuamba tu akajiʼé; katula ngó dilebhu dietu.

² Bhu kizuua kiná o Ndombo ia Jihova ia kà kala ditunda, ni kijingo; oso a subhuka mu Izalaiele a kà mona uuabelu ua kibundu kiaʼxi, kuma kima kia ujitu.

³ Bheneʼobho-phe, uoso u subhuka mu Ziione, ni ió uoso u nangenena mu Jeluzaleme, a kà mu luka Sandu; uoso kiá muʼaxaxi ka athu a muenhu, a kà mu soneka mu Jeluzaleme;

⁴ kioso o Jihova kia kà sukula ufusa uoso ua ana-ilumba mu Ziione, anga uzelesa Jeluzaleme ku kikuma kia manhinga muʼaxaxi kê ni nzumbi ia kuiuka ni nzumbi ia huii.

⁵ Jihova ua kà bhanga ku thanduʼa mabhata moso ma mulundu ua Ziione ni ku thanduʼa mabhongolokelu mâ moso, dituta mu muanha, ni dixi ni mulengu ua túbhia mʼusuku, mukonda ku thandu dia kizunda kioso kua kà kala kukondama.

⁶ Anga bhua kà kala balaka, phala kilembeketa, mbé muzukuta ua muanha; ikala ue dilengelu ni disuamenu mbé kʼiza o kibhungu, ni mvula.