Izaía 39 - O Mikanda Ikola

Ilôlo ia Babilonha, a i tuma ku Jeluzaleme. Ukumbu ua Ezekiia

¹ Bhu thembuʼobho Melodake-Baladane, monʼa Baladane, sobha ia Babilonha, utumikisa mikanda ni ujitu phala Ezekiia, kuma muene uevile kuila Ezekiia ua katele iu ua disanze kiá.

² Ezekiia anga u sangulukanâ, hé u a edikiza onzo ia umvuama uê uoso, ni phalata, ni ulu, ni ima ioso ia mazumba ia tokala kutoua ni kulunga, nguendu ioso iaiuka, ni onzo iê ia ibhakatu ia ita, ni ima ioso ia kexe mu jikofidi jê; ki bhua xedi kima mʼonzo iê mba mu utuminu uê uoso, Ezekiia na kambe ku a edikiza-kiu.

³ Bhenhobho-phe, polofeta Izaia uiza kua sobha Ezekiia, anga u mu ambela, uixi: Mala ianhá a ku ambela kima kiabhi? ene-phe a tundu kuebhi? Kuala Ezekiia: Enhó a tundu kʼoxi ia dikanga, ià eza kokuami, ku Babilonha ku a tundu.

⁴ Muene-phe, uixi: Ihi ia mono mʼonzo ié? Eme Ezekiia: Ima ioso-lolo iene mʼonzo iami a i mono muene, ki bhua subhuka kima mu malundilu mami ki nga kambe ku a edikiza.

⁵ Bhenhobho Izaia uambela Ezekiia, uixi: Ivua kizuelu kia Jihova dia Ilômbo Ieta:

⁶ Talesa-ze, bhua kèza izuua ia kuila ioso iene mʼonzo ié, ni ioso ia lundile jitata jé, katé bhu kizuua kia lelu, a kà i ambata ku Babilonha. Ki bhua kà subhuka kima, Jihova ua ki tange.

⁷ Katé ni ku anʼé, a tundu momué, ni oso u ua-nda kuvuala eie, a kà kuata-ku amoxi-mu, anga a a bhanga jingolambole mu dizemba dia sobha ia Babilonha.

⁸ Bhenhobho-phe, Izekiia uambela Izaia, uixi: Kizuelu kia Jihova ki ua zuela, kia uabha muene. Kuma ua kexe mu banza, uixi: Mbata mu izuua iami mua kà kala kutululuka, ni kidi.