Izaía 38 - O Mikanda Ikola

Ezekiia ukata, Nzambi phe u bhanga-bhu madiuanu a ku mu ilula

¹ Mu izuua muenhomo, Ezekiia ukata uhaxi ua kúfua; Izaia, monʼa Amoji, o musesedi, anga uiza kua muene, iu ua mu ambela, uixi: Jihova ua-mbe kiki: Lekelela kiá dibhata dié, mbata mu kúfua mu uala, kua-nda kukola dingi muenhu.

² Ezekiia-phe ulunguluila pholo iê ku mutôto; anga u sambela Jihova,

³ anga uila, uixi: Uà, Jihova, tata! lembalala, nga ku diondo, kuma eme ngʼende muene bhu pholo ié mu kidi, ni muẋima uatenena; nga bhange muene ioso ia fuama ku mesu mé. Ezekiia anga u ẋikujuka kiavulu ni kudila.

⁴ Bhenhobho kizuelu kia Jihova kiza kua Izaia, uixi:

⁵ Katuka, uambele Ezekiia: Eme Jihova, Nzambi ia Davidi dia tatenu, uambe kiki: Musambu ué nga u ivu, ni masoxi mé nga ma mono; talesa-phe, ku izuua ié ngi ku bandekeza-ku kuinhi dia mivu niʼtanu.

⁶ Nganda ku ku kudila ue bhu maku ma sobha ia Asídia, nʼeie ni mbanza ienhii, mbanza ienhii ue eme ngi i bhângela.

⁷ Kiki kiene kijimbuete ki ku bhana Jihova, kuila Jihova ua-nda ku kumbidila o kizuelu kiê kiambe muene.

⁸ Talesa, o kilembeketa ku lelójio ia Akaze, iai kiá ku pholo, ngi ki vutula kuinhi dia matala ku dima. Kia vutuka-phe muene, kuma dikumbi dia vutuka ku dima, katé kua tunuka kuinhi dia matala.

⁹ O mikanda ia Ezekiia, sobha ia Juda, iambe kioso kia mu iza o kukata ni kioso kieluka ku uhaxi uê, iambe kuila Ezekiia uembi, uixi:

¹⁰ Eme ngambele, kia ngi-bhu o izuua, ngixi: Nga lungu bhu mielu ia mbila; o mivu ia ngi xedi-ku nga i lémbua kiá.

¹¹ Ngixi dingi: Jihova ki nga-nda ku mu muena dingi mʼoxi ia athu a muenhu. Ki nga-nda kumona dingi muthu kumoxi ni iá a tungu mu ngongo.

¹² O thembu iami ia kulaia ia ngi bhu, a ngi sondolola-iu muene mukuâ ni kia sondolola o muionga ua kafunga. O muenhu uami nga u batula kala mutungi-a-thanga kia batula o lungoji lua fio iê; muene u ngi batula mukuâ ni ua ngi batula ku mulongo ua thanga; uandekela mu kimene, o kutula mu ngoloxi ua ngi zubha.

¹³ Eme-phe nga kinga ni muanu katé mu kalaji, maji o ifuba iami muene ua i bukujula mukuâ ni hoji; uandekela mu kimene, o kutula mu ngoloxi ua ngi zunzumuna.

¹⁴ Kala ki kala o njila iexana grou mba phiáphia, kiene ki nga kexe mu kuẋenja, ngi kuata kukumba mukuâ ni diembe; nga bhetula jinga mesuʼami ni kutala bhulu, katé ala kiá ku ngi suka; Jihova, tata! Nga bhondalala! Kala-phe u ngunji iami!

¹⁵ Ngi zuela dingi kiebhi? Kiene kia ngi polometela, kiene kia ngi bhange; O kiki-phe ngi bhita mivu iami ioso ni kubatama kua muẋima, mbé o kiminhu kia di minha o muenhu uami.

¹⁶ Jihova, muthu uene kulaiela mu ima ienhiʼii; eme ue muẋima uami ua dielela ngó mu ima ienhiʼii, eie-phe, Ngana, ngi sake nda ngi kole muenhu.

¹⁷ Tala-ze, phala kutululuka kuami, nga bhiti-phe ni mavuua a vulu; eie-phe, mu henda ié, ua bhulula o muenhu uami, kua u ehela kulaúka mu kina mua kala o kusekumuka; kuma o ituxi iami iene ioso, eie Ngana, ua i takula ku dima dié.

¹⁸ Mukonda o mbila ki i tena ku ku ximana, o kalungʼa-ngombe ka tena ue ku ku fumanesa; Kuambe dingi athu a seiela mu ʼbòmbo dia kalunga kuila adielela kubhandulukila mu kidi kié.

¹⁹ Kikale o athu ku muenhu, mukonda athu ku muenhu, ene ngó a ku ximana, kala eme ki ngala kubhanga leluʼiki. O tata, ua kʼejidisa o kidi kié-eie, u Nzambi, ku anʼê.

²⁰ Jihova ueza ku ngi bhulula; o kienhiki ngi xika jinga kakoxi kami, ni tuende ni ku mu imbila ku izuua ioso ia muenhu uetu, mʼonzo ia Jihova.

²¹ Izaia iú uambele, uixi: Zangulenu kitabhu kia jifiku mu mu kute-kiu bhu fidila, muene ua-nda kuiluké kiá.

²² Ezekiia ue iu uambele, uixi: Kijimbuete kié kiahi, kuila eme nga-nda kubanda dingi mʼonzo ia Jihova?