Izaía 37 - O Mikanda Ikola

Ezekiia usasumuka ni uoma, u tuma kusota Izaia

¹ Anga ki bhita kuma, sobha Ezekiia kia zubha kuívua kiki, utandula o izuatu iê, hé u di vunga kidinhaji, iu ua bokona mʼonzo ia Jihova.

² U katula Eliiakime dia kimbadi kiê, ni Sebena, musoneki, ni ikulakaji ku jinganga, a di vungu idinhaji, u a tuma kua Izaia, monʼa Amoze, o musesedi.

³ Ene anga a mu tudila, exi: Ezekiia uambe kiki: Kizuua kiki kizuua kia jingongo, kia malebhu, kia jindaka; kuma ana a bhixila ku isènda, maji o nguzu ia ku a vuala ki tuala na-iu.

⁴ Manhi, o Jihova Nzambi ié, maka ma Labesaki ua mʼèvué, muthu a mu tumikisa kuala ngana iê, sobha ia Asídia, phala ku xinga Nzambi ia muenhu, ni ku mu lebhula ni maka ma dʼivila Jihova Nzambi ié. Sambela-phe tumasubhu tua xala-bhu.

⁵ Jiselevende ja Ezekiia anga eza kua Izaia.

⁶ Izaia iu ua ambela, uixi: Ngana ienu kà mu jimbuidienu kiki: Eme Jihova uambe: Ku kale ni uoma ua maka mu uevu, ma ngi lebhula na-u abhika a sobha ia Asídia.

⁷ Talesa, nganda ku bokuesa nzumbi momuê-muène, muene ua kʼevua kinuminu anga u alukila kʼoxi iê; eme-phe nga-nda ku mu jibhixila mʼoxi iê-muene ku xibhata.

⁸ Kia vutuka Labesaki, ua sange sobha ia Asídia iu u lua ita ni Libina; kuma muene ua kʼivile kuamba ku Lakiji ua tundu-ku kiá.

⁹ O kievu kuma Tilaka, sobha ia Itiiópia, uala kuiza ku mu lua muene, uedi ngó u kʼivua, ua katula dingi jiphunga u ji tuma kua Ezekiia, uixi:

¹⁰ Ezekiia, sobha ia Juda, mua kà mu ambela kiki: Nzambi iê ka ku tobhese, ki ua mu dielelʼokio, kuila: Jeluzaleme ka tena ku mu bhakula bhu lukuaku lua sobha ia Asídia.

¹¹ Talesa, eie ua kʼivua kiá kioso kia bhange jisobha ja Asídia mu jixi joso, kioso kia ji buikisa, taka-taká! Mbé eie u bhulaka?

¹² Manhi, jinzambi ja ifuẋi iná, ja bhulula jixi joso jʼòtolole kuala adiami, Ngozane, Halane, Lezefe, ni ana a Edene oso a kexe mu Telasale?

¹³ Sobha ia Hamate, iú kuebhi? Ni sobha ia Alapade, ni sobha ia diembu dia Sefalavaime, ni Hena ni Iva, iá kuebhi?

¹⁴ Ezekiia-phe, kia tambula mikanda iii ku maku ma jiphunga, o kia zubha ku i tanga, u banda na-iu mʼonzo ia Jihova, u i futunuina bhu pholo ia Nzambi.

¹⁵ Anga Ezekiia u sambela Jihova, uixi:

¹⁶ Jihova dia Ilômbo Ieta, u Nzambi ia Izalaiele, ua tunga muʼaxaxi ka jixelubí, eie-muène ngó u Nzambi, Eiemuène ngó ubheka ué, uavu mautuminu moso mu ngongo; eie ua bhanga o diulu nʼoxi.

¹⁷ Jihova, tata, bhana dítui dié kunu, uive; tona mesu, Ngana, utale; ivua jindumu joso ja Senakedibe, ni mondo ua ku te eie, u Nzambi ia muenhu.

¹⁸ Kia kidi kiene, eie Jihova, o jisobha ja Asídia ja bhiti ni kubuikisa ifuẋi ia nzungule, ni jixi jâ,

¹⁹ jinzambi jâ ja iteka a ji oha mu túbhia; mukonda ki jinzambi, kana; ikalakalu ia ufunu ua maku ma athu, mixi ni matadi; kiene-phe kia ji jikinisina.

²⁰ Ki tualʼiki-phe, eie u Jihova, Nzambi ietu, tata, tu kudile ni lukuaku luê; phala mautuminu moso mu ngongo a kʼijiie kuma eiemuene ngó u Ngana.

Izaia u bheka mvutu ia Jihova kua Ezekiia phala ku mu suinisa

²¹ Bhenhobho Izaia, monʼa Amoji, ua tumu kuambela Ezekiia, kuila; Jihova Nzambi ia Izalaiele, uambe kiki: O ki ua ngi bhingi bhu kaẋi ni Senakedibe, sobha ia Asídia,

²² kizuelu kiambe Jihova phe ku mbandu ia muenʼió, kiki: Kilumba mona Ziione, ka ku suu, iu ua mu ku bhanga kusekelu; mona-kilumba kia Jeluzaleme u ku kubuakesela o mútue kuema dié.

²³ Eie mukuahi ua mu lebhula, ua xingi nanhi? Ua mu mu handekela kiókio ni mesu bhulu, nanhi muene? Muenhó, Lemba dia Izalaiele.

²⁴ Eie ua tumu o jiselevende jé kule-bhula Jihova, uixi: Ni nzungule ia makalu mami, nga bande bhu thalʼa milundu katé mu jihotʼèlele ja Libano; nga kà batula misédro iê ioso ialebha-mu ni mifaia ioso ia uabha-mu, anga ngi bokona muene katé bhu thalʼélele, bhu muxitu ua vundu bhuene o mavu a idima.

²⁵ Eme nga kande, eme ngʼanu menha; eme nga kukutisa menha mu jihonga joso ja Ijitu ni makànda a inama iami.

²⁶ Nzambi phe, uixi: Manhi kua kʼivu kuila nga bhange kiki mʼukulu hanji uila kiluua kʼiza-bhu, tunde mu izuua ia xahulu eme nga ki xinda kiá? Kiki-phe, nga ki kumbidila, phala eie u buikise jimbonge ja di-fikidila, nda u ji bhange maxita.

²⁷ Kiene-phe kia bhangesa akua bhata diê kuenda ni maku ma botomoka, ezala ni uoma ni jisonhi; edile kala mvunde ku mábhia, mukuâ ni iangu ia uisu, kala iangu i sabhukila bhu hongo, mukuâ ni masa maúka ia a seluka kuila ene kiluua ngó a kola.

²⁸ Eme-phe nga ku ijiia ni uxikamenu ué, ni utundilu ué, ni Ubokuenu ué, ni njinda ioso i ua ngi kuatela.

²⁹ Mukonda-phe dia njinda i ua ngi kuatela eme, mukonda ue o izala ié ia ngi bhixila ku mátui, tala-phe, nga-nda ku ku ta nzolo mu mazulu, anga ngi ku ta o freio iami mu kanu, hé ngi ku vutukisa mu njila mu uejiia.

³⁰ Eie-phe o kijimbuete kié, kiki: Muvu iú mudia hanji ioso i di sabhukila, o mu muvu uiza-mu mudia kioso kia sabhuka ku ngolongo; maji mu muvu ua katatu kunenu, mu mune, phaphenu mivide, nda mudie o ibundu iê.

³¹ Mbata kioso kia bhulaka mu dibhata dia Juda, kí kia subhuka-mu, kianda kuta dingi jindanji bhoxi, anga ki bhana o ibundu bhulu.

³² Kuma ku Jeluzaleme kua-nda kutunda masubhu, o ku mulundu ua Ziione kutunda oso a bhulaka; o muanu ua Jihova dia Ilômbo Ieta uene ua-nda kubhanga kienhiki.

³³ Kala kiki Jihova uambe, bhu kaii ni sobha ia Asídia, uixi: Mu mbanza mumu, ka-nda kubokona-mu, né ngó; ka-nda kuasa-mu ditoma dioso-dioso, né ngó kuila uzukama-ku ni ngubu, mba o mbanza iii u i kandeia mbonge.

³⁴ Uanda kuvutukila ku njila kuene kuejiia; maji mu mbanza mumu ka-nda kubokona-mu, Jihova ua ki tange.

³⁵ Mbata eme nga-nda kubhângela mbanza iii, phala ku i kudila, mukonda diami ememuène, ni mukonda ue dia selevende iami Davidi.

³⁶ Bhenhobho anju ia Jihova ua tundu, iu ua nemeka mu kilômbo kia Asídia, hama ni makuinhi-nake a jimidi ni midi jitanu ja makuenze; o kuila muene a balumuka mu kimenemene, talesa, iimbi mu iimbi kiá!

³⁷ Kia bhingi-phe Senakedibe, sobha ia Asídia, ua lenge iú uaii, ua vutuka, anga u kala mu Ninive.

³⁸ Anga ki bhita-phe kuma, kia bokona iu ua fukama mʼonzo ia Nijiloke, o nzambi iê, Adalameleke ni Salezele dia anʼê-muène, a mu jibha ni xibhata; ene-phe hé alengela kʼoxi ia Alalate, o Ezaladone monʼê, anga uhinga bhu kididi kiê.