Izaía 36 - O Mikanda Ikola

Senakedibe ukonda Jeluzaleme. Musambu ua Ezekiia. Kilômbo kia ita ia Asídia a ki buikisa

¹ Anga ki bhita mu muvu ua kuinhi ni uana ua sobha Ezekiia kuma Senakedibe, sobha ia Asídia, u banda kúlua madiembu moso ma jimbonge ja Juda, iu ua ji tambula.

² Sobha-phe ia Asídia ua tumukisine Labesaki, u mu katula ku Lakiji aie mu Jeluzaleme, kua sobha Ezekiia, ni kilômbo kionéne kia makuenze; anga u tula bhu mulombo ua menha ma dijiia dia thunda, bhu mbanduʼa njila i bhita mu mukáu ua musukudi.

³ Bhenhobho-phe Eliiakime, monʼa Hilikiia, dia kimbadi, u tunda phala ku mu kunda, ni Sebena dia musoneki ni Joá, monʼa Azafe, ngolambole.

⁴ Labesaki iú ua a ambela, uixi; Tangelenu Ezekiia, kuma sobha ia dikota, sobha ia Asídia, uambe kiki: O kudielela kuahi kuosuʼoko, ku ua mu londekeza?

⁵ Eme-phe ngi kuambela, kuila: O phangu ni ndongo i ua mono phala kúlua o ita, ia di bhange maka ma kingoho; eie-phe uadielela nanhi, ki ua ngi bhukumukina kiókio?

⁶ Kifua nga mono kuma ua di-fiiala mbangala ia dianga dia tandukʼodio, Ijitu, uedi, se muthu uxamenena-ku kisuelele ki mu bokona bhu lukuaku anga ki tundidila; kiene kia soko ni Falaó, sobha ia Ijitu, kua ene oso a dielela kua muene.

⁷ O ki u ngʼambela, uixi: tua dielela Jihova Nzambi ietu; abha-phe, ki muene ua tokala ni matala ni jikalatódio ja katula Ezekiia, iú uambela Juda ni Jeluzaleme, uixi: Mu sambela jinga ngó ku pholo ia Kalatódio koka?

⁸ Hé kima-phe, bhana ilôlo kua muadiami, i kale ku ungunji, kua sobha ia Asídia, eme-phe ngi ku bhana midi jiiadi ja jikabalu, se eie utena kusanga makuenze a ji mondala joso.

⁹ Utena-phe, kiebhi, se ua lémbua kukaia kilolo kimoxi ku ilôlo iôfele ia muadiami, ni u dielela Ijitu mukonda dia makalu mê ni amondadi a jikabalu?

¹⁰ O ki ngezʼeki mu lua oxi iii ni ku i buikisa, mbé ngeza ngó, sè Jihova ku ngi tuma? Jihova muene ua ngʼambela, uixi: Banda, ulue oxi iii, u i buikise.

¹¹ Eliiakime-phe ni Sebena, ni Joá, ambela Labesaki, exi: Tua ku bhingi kuma, abhikʼé, a zuelese mu dimi dia sidiiaku, kuma tua dʼijiia kiambote, ku tu zuelele mu dimi dia Judeia, ku mátui ma mundu iú uemena ku thanduʼa kimbaka.

¹² Kuala-phe Labesaki: Manhi muadiami ua ngi tumu ngó kua ngana ié ni kokué, mu ku zuela maka iá? Inga ni ku athu ió ue a xikama ku thandu dia kimbaka, phala mu die-nâ tuji tuâ, mu nue-nâ o masu mâ?

¹³ Labesaki bhenhobho uimana, anga u dikola ni dízui dia suina mu mbimbi ia Juda, uixi: Ivenu maka ma muenexi ua dikota, sobha ia Asídia.

¹⁴ Sobha uambe kiki: Ezekiia ka mi tobhese, mbata ka-nda kutena ku mi kudila.

¹⁵ Kana ue ku mi longesa kuala Ezekiia kudielela kua Jihova, kuamba: Ki bhuala phata, Jihova ua-nda ku tu kudila muene, o diembu-phe didi ka-nda ku di bhakula bhu maku ma sobha ia Asídia.

¹⁶ Ezekiia ki mu mu bhane mátui; kuma sobha ia Asídia uambe kiki: Bhangenu paze ni eme, mu ngi bhekele mibhaku, mu ize kokuami, nda mu tene kúdia, kala muthu, ku muvide uê, ni ku mufiku uê, mu tene kúnua ue kala muthu ku kixima kiê.

¹⁷ Katé ki nga kèza anga ngi miʼambata mʼoxi iedi kala oxi ienu; oxi ia masa, ni maluvu, oxi ia mbolo ni mivide.

¹⁸ Ezekiia ka mi tobhese, ni kuila: Jihova ua-nda ku tu bhulula. Manhi o jinzambi ja ifuẋi ja bhuluile kiá oxi imoxi ku maku ma sobha ia Asídia?

¹⁹ Jinzambi ja Hamate ni ja Alapade, jiʼkuebhi? Jinzambi ja Sefalavaíme ja suku bhebhi? Mbé ja bhulula Samádia bhu lukuaku luami?

²⁰ Mu jinzambi joso ja jixi jiji, jinzambi kuii ja kudila kiá oxi iâ bhu lukuaku luami, phala kuila o Jihova ue ukudila Jeluzaleme bhu maku mami?

²¹ Maji ene-oso a dixibha, ka mu kumbulula né ngó diba dimoxi; mbata kiene kia tumu muenexi, kuila: Kana ku mu vutuila kima.

²² Eliiakime-phe, monʼa Hilikiia, dia kimbadi, ni Sebena, dia musoneki, ni Joá, monʼa Azafe, ngolambole, eza kua Ezekiia, ni izuatu ia tandujula, anga a mu jimbuila maka ma Labesaki.