Izaía 35 - O Mikanda Ikola

Unéne ni fuma ia utuminu ua Mixiia

¹ Ni kikangalakata ni ididi ia kukuta ia kà sangulukila kienhiki; dinhana dia kà tana, anga ditulula kala diloza.

² Dia kà tulula muene kiavulu, di sanguluka ni kutana kuonéne, dia kà tumbujuka ni ngalasa; a mu bhe kijingo kia Libano, ni makembu ma Kalamelu ni Salone; ene a kà mona o fuma ia Jihova, kioso kiene o unéne ni kujinga kua Nzambi ietu.

³ Suinisenu o maku ma bhuila, kulokotesenu o jiphuna ja teketa.

⁴ Ambelenu a botomoka o miẋima: suinenu, ki mu kale ni uoma; talesenu, o Nzambi ienu iu uiza mu vutula o phonzo, ni futu ia Nzambi uiza na-iu; muene ua kʼèza hé u mi bhulula.

⁵ Bhenhobho-phe o mesu a ifofo a kà jikuka, ni mátui a maxilu a kà xitunuka.

⁶ Kizuuʼokio-phe, inema ia kà tuka-tuka, kala jimbambi; o dimi dia mabubu dia kʼemba; mbata mu kikangalakata mua kà fuafua menha, o mu dinhana mua kà fuafua jingiji.

⁷ O ixi ia kukuta ia kà di-bhanga izanga ia menha, o mikáu ia thothuena muiza majiia a fuáfua menha; o mu ididi muoso mua tungile o mabheku, mua kà sabhuka iangu ni madianga, ni jimbamba.

⁸ Anga mua kà jikuka o kikoka ni njila, a kà ʼixana Njila Ikôla kifusa ka kà tena ku bhita-mu, maji ia kà kala ngó phala o mundu uê; o jingenji né-mbé kiá ioua, se a i tondala, vondadi iâ.

⁹ Muenhomo ki mua kà batuila hoji, né kiama kia makandaʼ ngu ki ki kutuka-mu, o kiene ue ku ki sange-mu; maji ió ngó oso a a kula ene à kendela-mu.

¹⁰ O jihule ja Jihova a kà vutuka, hé a kèza mu Ziione ni kuimba mimbu ia kutana; o kusanguluka, ki kuene kúbhua kua kà kala ku mítue iâ, a kʼèzala ni kutana ni kusanguluka, o dilamba ni mikemu ia kà a lenga kiá!