Izaía 31 - O Mikanda Ikola

Kubhanduluka ku tunda kua Jihova, ku Ijitu kana, kuma Ijitu muthu ngó, ki Nzambi

¹ Kokolo dia ió oso a kulumuka ku Ijitu mu ku sota-ku dikuatekesu, anga a ta o muẋima ku jikabalu; a dielela o makalu mukonda a di-xala, ni a-mondadi ala i-mazonda ionéne; maji ka xikina kusuua Dilemba dia Izalaiele; ka xikina ku sota Jihova.

² Hanji-phe, muene njimu, o kiaiibha ua kà kʼixana muene, kioso kia zuela kà ki sondolola, kana; ua kà fundumuka phala kubalukila dibhata dia imbokoto, ni kubalukila dikuatekesu dia akua kubhanga ima kubhuma.

³ Kuma akua-Ijitu, ki Nzambi, kana, athu ngó; o jikabalu jâ, xitu ngó, ki nzumbi kana; o kioso Jihova kia kà sunununa lukuaku luê, ku tale o mukuatekexi uixi iú a mu mu kuatekesa, ene oso a kà di bhala bhoxi anga a kà buikila kumoxi.

⁴ Mbata Jihova kiene kia ngʼambelʼiki, uixi: Kala hoji ni monʼa hoji kia zulumina kulu dia mbole iê ia kuata, né-phe kiá a mu bhongolokela kuala kilunga kia abidi, mázui mâ ki ma mu titidisa ni kima; o kuvula kuâ ki ku mu kuata uoma: Kiene ue Jihova dia Ilombo Ieta ua kà tuluka mu zokela mulundu ua Ziione, ni kathuthu-lundu kê.

⁵ Jihova dia Ilômbo Ieta u zenzama mu ku kondeka Jeluzaleme mukuâ ni ki zenzama jinjila bhulu; u mu bhângela, u mu kudila, u mu kondeka, u mu bhulula.

⁶ Bilukenu-phe kua ió a mu bhukumukina kinéne kuala anʼa Izalaiele.

⁷ Kuma mu kizuua kiókio kala muthu ua kà texe mahamba mê ma phalata, ni mahamba mê ma ulu, ma mi iudikila o maku menu phala muende ni kuta ituxi.

⁸ O Asídia ua kà laúka ku xibhata, ki ia dikuenze-phe, kana; xibhata ia kà a jikinisa, maji ki xibhata ia muthu, kana; o xibhata iene, muene ua kà i lenga; o makuenze-mê anga a ka a tolola hé a kala mu ku a bhikisa.

⁹ Muene ua kà di-texila ku ndanji iê ia dilengelu, maji iene ka kà i mona mukonda dia uoma; o ilamba iê ia kà bhondalala ni uoma, kia kà mona mvela: Kiene kiʼambe Jihova, mukua túbhia tuene mu Ziione, ni dijiku diê mu Jeluzaleme.