Izaía 3 - O Mikanda Ikola

O Kusekala mu Jeluzaleme

¹ Talesa-ze, kuma Jihova, Nzambi ia Ilômbo Ieta, o mbangala ni dikoue mu Jeluzaleme ni mu Juda ua-nda kua kà i katula-mu, ni huta ioso ia kúdia, ni kixima kioso kia menha a kúnua.

² U katula-mu ue o dizonda, ni disoladi, ni mufundixi, ni polofeta, ni muzambuidi, ni kikulakaji ua kuka kiá,

³ ni kabhitangu ka makuinhi atanu, ni muthu ua kijingo, ni ndongixi, ni hete muʼaxaxi ka akua ma-unfunu, ni ngânji ia maka,

⁴ anga ngʼa bhana minzangala bhu kididi kia ilamba, o tuana tua ndenge tuene tua kà a tumina.

⁵ Mundu phe a kà u bhondeleka; bhua kà kala ku dikuata jimvunda, kala muthu ua kà lungulukila mukuâ; Mona ndenge, ukitukila muadi-akime; o sébhue, u balukila mona-ngana bhu kididi.

⁶ O ki bhu kala muthu uia mu ku di kunda ni phangʼiê, ua tokala mʼonzo ia tatʼâ, uixi; Eʼeie uala ni kizuatu, kala u kilamba kietu, nda u mone ki u bhanga, mukonda dia kusenguluka kuku.

⁷ Mu kizuuʼokio muenhó ua kà di kola, uixi; Ki ngi tena kukala kimbanda kia kusaka; ki ngi moneka mbolo mʼonzo iami, mba ngó kizuatu kioso-kioso; ki mu ngi hingise ukota ua kutumina o mundu.

⁸ Mbata Jeluzaleme ua di-bhukana, o Juda ua di-bhale; mukonda o uzuelelu uâ ni ibhangelu iâ, ia kubalukila Jihova; mbé o kubheka njinda ku mesu a Jihova ni fuma iê.

⁹ O ki u tala jipholo jâ, usuéia uâ ua di monekena; ituxi iâ a i kola muene, kala mu Sodoma; ka i sueka, kana; kokôlo dia muenhu uâ! mukonda ene muene a di bhange o phulu!

¹⁰ Athu a iuka a tangedienu, kuma alunguʼâ; mbata ku ibundu ia ikalakalu iâ, a-nda kua kà dia-ku.

¹¹ Mukua phulu-phe, lamba diê, ua-nda kutala hadi; mbata a-nda ku mu vutuila kioso kia tokala mu ikalakala ia muku mê.

¹² Akua kubhondeleka o mundu uami ana-ndenge, o ala ku pholo ia utuminu uê, ahatu; Uaué, mundu uami, tata! akua ku ku songuela ala ku ku tobhesa; o njila ia fuama kuenda, a ku zangela-iu.

Jihova u fundisa o Mundu ué

¹³ O kiki, Jihova u balumuka mu kuzokela, anga u tunda mu kufundisa o miji.

¹⁴ Jihova iú uiza phala kufundisa o ikulakaji ia mundu uê ni ilamba iâ; mukonda enu muene mua jikinisa o dibhia didi dia mivide; o ima i mua nhana ku jingadiama, iii mu jinzo jenu.

¹⁵ Jihova, Nzambi ia Ifuẋi, uixi; Ihi ia mi kuata, enu mua mu kuenda ni kutatesa o mundu uami, ni kututujula o pholo ia jingadiama?

Kudimuna o Ahatu mu Jeluzaleme

¹⁶ Jihova phe uambe dingi, uixi: O kiedi ana-ilumba mu Ziione a di zangeleka, mu kuenda jixingu a jʼimanesa, ala ni utalelu ua ufusa, o kienda, ela kala a mu kina, inama aia ni ku i sesembesa bhoxi.

¹⁷ Kala kiki, Jihova, anailumba mu Ziione ua-nda ku a ta ingûmba mu mítue, Jihova ua-nda ku a zula, a kala tuẋi-a-thâkala muene.

¹⁸ Bhu kizuua kieneʼokio, Jihova uanda ku a zula makembu a malenge, ni ivunga-mítue ia ma-uandanda, ni makembu ma kidífua kia mbeji ia thethama.

¹⁹ Ni jinzenzela, ni malenge a maku: ni izuatu ibenha,

²⁰ ni itundu, ni makembu a maku, ni misanga ia malubhambu ni tungonga tua maji ma dizumba, ni jibixa,

²¹ ni jinela, ni malenge a kunhenga mu mazulu,

²² ni izuatu ia kizokola, ni jithanga ja ndômbe, ni kukembesa jindemba, ni jifunete,

²³ ni malumuenu, ni tu-mavunga tua linho ia makembu, ni matoka, ni jimvéu, ima ioso iii ibhuaku.

²⁴ Kieneʼokio, o bhua kexe dizumba dia uabha, bhua kà bhingana kibuzu; bhu kididi kia phonda, mukolo kiá; bhu kididi kia kuinda kindemba, kuiza kiá dibhala; bhu kididi kia kizuatu kia dixala, bhu kala kiá ku di-suikika kidinhaji; bhu kididi kia kuuabha o pholo, a kà kituluka kala a jokota mu túbhia.

²⁵ Makuenze mê a kà buika ku xibhata, o mazonda mê ku ita.

²⁶ Ziione mielu ié ia kà kema, ia kà ta jingololo; o muene, ua kà xikama bhoxi mu mavu ni ku di kota.