Izaía 29 - O Mikanda Ikola

Juda a mu kanena mukonda dia mangonha; polomesa ia ufolo

¹ Adiiele, lamba diê! Adiiele, mua kexile kilômbo kia makuenze a Davidi! Bandekezenu-ku, muvu ni muvu, o izokola iâ iiie ni ku di-bhingajana.

² Hanji-phe, Adiiele nga-nda ku mu ta bhu kíbhidi, bhuà kala ngololo, bhuà kala mukondo; diembuʼidi dia-nda ku ngi kala kiua Adiiele ia kidi!

³ Mbata nga-nda ku ku kondela ni kilômbo kiami, ngi ku kondoloka ni imbaka, ngi ku kandeia jimbonge.

⁴ Bhenhobho a kà ku lundumuna, u kuata kuzuelela koxi a mavu, uzuelelu ué utunda ku mavu ni kuloxalala; dízui dié diene dia-nda kuila kala dia mukua-uanga, dia mu tokomoka mu fufuta.

⁵ O jinguma jé ja-nda kukala nzungule kala fufuta, o isuéia ia-nda ku ku vula kala mvindu ia ibhiate isomboka, kindala u tukumuka kia ku iza.

⁶ Jihova dia Ilômbo Ieta ua-nda ku ku kana ni inuminu, ni kitungutisu kia mavu, ni kixindu, ni kibhungu kia suína, ni kalemba, ni mulengo ua túbhia, hé i ku buikisa.

⁷ Ndumba dia ifuẋi ia-nda kúlua Adiiele, a mu vubuka mukuâ ni nzoji ia kisuma kia usuku, kiene muene kia-nda kukala oso a-nda ku mu lua, kia mu bula imbaka, anga a mu phopheka, a mu bhaka bhu kíbhidi.

⁸ U di fuangana ni mukua nzala, uanjiua kala ua mu dia, o kia balumuka ku kilu, nzala iê iii-ié; mba u di fuangana ni mukua dinhota, uanjiua kala iú unua, o kia balumuka ku kilu, dinhota di dié, o muenhu uê hanji ua botomoka ni dinhota; kiene kia-nda kukala ifuẋi ioso, a-nda kúlua mulundu ua Ziione.

O Kuxi bhaka

⁹ Kokolokenu, mu diuane! Sangulukenu, mu dikole! A kodiua, maji ki vinhu ia a kodiuisa! A bhendujuka muene, maji ki ualende ua ki bheka.

¹⁰ Mbata Jihova ua mu lunduluila nzumbi ia kilu kia muioko-ioko; o jipolofeta ja di bhange ene o mesu menu, a a jika; ni ilôlo ienu, akua-lumono, kiòmuene.

¹¹ Kienhiki kisuma kioso muene kiolambe mukuâ ni ndunda ia divulu diòjike kidimbu, anga a di tambuisa uoso uejiia kutanga, exi: Tanga-diu, muene uà kela: Ki ngi tena, mukonda diòjike.

¹² Mba a di tambuisa ió kejiia kutanga, exi: Tanga-diu-ze, muene uà kela: eme ki ngejiia kutanga.

¹³ Mbata Jihova uambe, uixi: Manhi o mundu iú a ngi zukama, ala ku ngi xila ngó ni dikanu diâ, ni mizumbu iá, maji o muẋima uâ ua di sandula dikanga kokuami, o uoma uâ ua ngi kuatela uala ngó mu ijila ia athu, iejiia mu kilunji.

¹⁴ Uila kiki, eme hanji ngi kolokota ni kukalakala kima kia madiuanu muʼaxaxi ka mundu iú; ngi bhanga kisunji nda adiuane, kuma o unjimu ua jinjimu jâ, ua kà jikinina, o kuijiia kua jingânji jâ kua kà suama.

O kudielela ima ià kʼeza-ku

¹⁵ Lamba dia ió oso a sota kusueka ima iâ ku mesu ma Jihova, nʼende ni kubhangela ima iâ mu kitombe, exi: Mukuahi u tu mona? Mukuahi u tu ijiia?

¹⁶ Enu ima ioso mua i tumbulula! Kala o mumbi ua sokela ni utuma, mba o kima kiòʼbhange kiamba o hete kuma: Kʼa ngi bhange; o kitutu kiamba ngumbi iê kuila: Ió kiximba. Kʼejiia kima.

¹⁷ Kifua nga mono muxitu ua Libano ku u kitula mavu ma idima, muʼanzanzuʼmu, unanga? Inga o mukáu ua kudima, o ku u kitula muxitu, ubhonza?

¹⁸ Mu kizuua kiná-phe o mixilu ia kʼèvua maka mu divulu, o ifofo ia kà ma muena mua vundu ni mu kitombe.

¹⁹ Oso a belesela a kà kala ni ngalasa, kutunda ngalasa, kuiza ngalasa, o ngalasa mua Jihova; jiphulungu ku mundu, a kà tanena kua Dilemba dia Izalaiele.

²⁰ Kuma o kisuéia sai sukilu diê, o semenhi ua kà jikinina, oso a di bhakula mu kubhanga ituxi a kà jima o mbutu;

²¹ ni oso a uabhela kutuika mulonga ku muthu mu diba dimoxi ngó, a sota o ndunge ia kukuata oso a a bazela bhu muelu; o muthu uaiuka a sota kioso kia mu uanuna mu dianda diâ, sè kikuma.

²² Kala kiki, Jihova, muthu ua kula Mbalahamu, uambe kiki bhu kaẋi ni dibhata dia Jakobo, uixi: Kiki kiá Jakobo sonhi ki ja-nda ku mu kuata dingi, ka-nda kusonoka dingi pholo.

²³ Kioso kia kà mona muiji uê, kikalakalu kia maku mami muʼaxaxi kâ, euá, dijina diami a kà di kôlesa; Dilemba dia Jakobo a kà mu xila; Nzambi ia Izalaiele a kà mu kala ni uoma.

²⁴ O oso a tondala mu nzumbi, ia ela kuengi, a kà tambula kilunji; o akua kulongolola, a kèjiia ulongelu, kuma a kà xikina kiá ku a longa.