Izaía 28 - O Mikanda Ikola

Ifalaimi ni Juda a xikamena ku a bha njumbu (kaxtiku) mukonda dia kukamba kudiela

¹ Lamba dia kitundu kia ukumbu ua jihólua mu Ifalaíme! a bhingi o makembu mâ, ma matunda, mukua ni kitulu ki lalumuka, kiala ku sungu ia dikôlo dia kimise dia iá a a tolola kiá kuala o vinhu.

² Talesa, Jihova ua kà tuma dizonda diê, kusuina kuvula; mukuâ ni ki sonoka mvula ia matadi, mvula ia kibuika, mukuâ ni imenha i bhanga jihungulule ji kungulukila mu jimbandu, muene ue kitundu kiâ ua kà ki zubila ni nguzu ioso bhoxi.

³ O kitundu kia ukumbu ua jihólua ja Ifalaimi a-nda kuà ki titidila muene bhoxi ni inama.

⁴ O kitulu kia lalumuka ku makembu mâ ma fuma, kiala ku sungu ia dikôlo di bhana idima, kia kà kala mukuâ ni kibundu kia mufiku, kia mutômo, kioso o kixibhu kiluua ngó ki bhixila, uoso u ki mona, uila u ki kuata ngó bhu lukuaku, u ki minha lusolo.

⁵ Mu kizuuʼokio, Jihova dia Ilômbo leta, u di bhanga kitundu kia fuma ni dilènga dia iuka di kembesa o masubhu ma mundu uê;

⁶ Jihova u kala ue muene unjimu ua uoso u xikama bhu kibhuna kia kufundisa milonga; muene o kimbaka kia oso a sota kuvutula jinguma katé bhu muelu ua sanzala.

⁷ Maji ni athu enhá ue, a tondala mukonda dia vinhu; a lueza o njila mukonda dia uhôlua ua lulu kinéne, enda ni ku bhendujuka; katé o nganga ni musesedi a tondala ue, mukonda dia uhôlua ua lulu kinéne; o vinhu ia a jikinisa; a jimbila o njila, kingumba o kúnua uhôlua ua lulu; a tondala mu ixinganeku, a di bhukajana mu kilunji.

⁸ Mukonda ni meza mâ moso mezala induxila, a nuha ni dise; kana-bhu ngó kididi kia subhuka ni kuzela.

⁹ O kiki-phe unjimu a u longa nanhi? Kima kia dʼivisa kiá, kia tokala ku kʼijidisa dingi mukuahi? Ió uoso uasumuka kiá ku lete, inga uoso a mu thathumuna ku mele a mamʼâ?

¹⁰ Kuma ngonge ku ngonge, ngonge ku thandu dia ngonge; phangu ku phangu, phangu ku thandu dia phangu; kama bhabha, kama bhobho!

¹¹ Mukonda dia kiki, o mundu iú muene ua-nda ku u tela maka ma tunda ku mizumbu ia athu engi, ni ku akua madimi engi.

¹² Athu enhá ua ambela: Didi diene o dinhohenu, bhanenu-diu uoso ua bhuila; o kuku kuene o kutululuka; ene-phe nguâ kuívua.

¹³ Uila kikiphe, o kizuelu kia Jihova kua ene, kia kà kala ngonge mu ngonge, ngonge ku thandu dia ngonge; phangu ku phangu, phangu ku thandu dia phangu; kama bhabha, kama bhaná; nda aie, a dibhale ni dima, o kia-nda kuila a zoza, a fue bhu mubhetu, nda a a bhange jipelezo.

¹⁴ Kala kiki-phe, ivuenu kizuelu kia Jihova, enu mu akua kubhanga kasekelelu, mu jinganga ja kutumina o mundu iú uene mu Jeluzaleme.

¹⁵ Enu, kuma muambe, muixi: Kalungʼangombe tua bangana-nê, o inferno tuate na-iu kikutu kia ukamba; kioso kia-nda kuiza divuua dia kibeto kala mvula ia dilúvio, etu ki kia-nda ku tu bhixila, kana; kuma dilengelu dietu o makutu, disuamenu dietu o kudinga o kidi.

¹⁶ Kala kiki, Jihova dia Ilômbo Ieta uambe, kuma: Talesa, nga xikika ditadi mu Ziione, ditadi di zubha o phata, ditadi diate kiavulu, diene di kuatesa bhu thungi, nga di xikika dia kuata dia kolo; uoso u xikana ka kale ni kisuka.

¹⁷ Ubatuilu ngi u ta mu dinha, o kulûnga ngi ku zonga ni pulumu, anga bhuà kala mvula ia matadi ia kà kungulula o dilengelu dia makutu, o menha anga a kà bobesa o disuamenu diâ.

¹⁸ O kubangana kuenu ni kalungʼangombe, a kà ku selula; o kikutu ki mua te ni inferno ki kia kà nangenena; o kioso ki bhita o kibetu kala mvula ia dilúvio, kia kà mi tatesa muene.

¹⁹ Dilúvio dia-nda ku mi bhituila bhu dimatekenu bhene, kuma dilúvio diodio di bhita jinga imene ioso, muanha ni usuku; mu kuívua ngó o fuma iê, ki bheka kubhondalala kua dikota.

²⁰ Mbata o hama ia kuzeka ia kà buta, kana muthu ua kà tena kutandelela-ku; o divunga dia kà tola o lubongo, kana muthu ua kà tena ku difuta-na-diu.

²¹ Mbata Jihova ua kà balumuka kala ku mulundu ua Pelazime, anga ua kà thathamana kala kia bhangele mu dikôlo dia Ngibiione, phala kubhanga kikalakalu kiê, kia di tungula kene kuvudila ku ki bhanga, phala kuzubha o kibhangelu kiê kiokio kene ku vudila ku ki bhanga.

²² Kala kiki-phe, ki mu bhange dingi kasekelu, sumba mikolo ienu a beta dingi ku i kolesa; mukonda eme ngʼevu Jihova dia Ilômbo Ieta uala ku kanena kiá ku bheka-ku kibuika, o kienhiki ua ki xindi kiá, ki tuluka ku thandu diaʼxi ioso.

²³ Bhetekenu mátui, mu ivue dízui diami; batekelenu kiambote, mu ivue kioso ki ngi mi jimbuila.

²⁴ Mbé o kidimakaji u dima mavu mu kumbi dioso dia kambàmba, nʼeza kiua mu kuna? Inga o mavu mê u ma kanda kizuua kioso, nʼa ma bula-bula ngó?

²⁵ Manhi ka bhangiê kiki: Kia zubha kiá o kubula mavu ni ku ma sokelesa, u kuua-mu ji-eleviiaka, u kuna jikominhu; mba u kuua-mu tiliku ioso ia beta o kuuabha, mba sevada, mba senteio, ia nona kiamboteʼoio, kala mbutu ni kididi kiê?

²⁶ Nzambi iê u mu longa, u mu tetuluila kioso kia tokala kubhanga.

²⁷ Kuma ji-eleviiaka kene ku ji beta ni muxi ua kuvundila; o kominhu ue kene ku i bhitisa malola ma dikalu ku thandu diê; hé kima, ji-eleviiaka u ji vunda ni mbangala, o kominhu-phe u i beta ni kamuẋi ngó.

²⁸ O tiliku ene ku i zuka, maji ka i zuku luavulu, kana; kene ue ku i zuka ni malola ma dikalu diê, mba ku i tutula ni jikabalu jê.

²⁹ Ima ioso iii muene, i tunda kua Jihova dia Ilômbo Ieta; kuma kulongesa kuê-muène kua madiuanu, o kikalakalu kiê u ki bhanga ni kuijiia kuavulu.