Izaía 24 - O Mikanda Ikola

Izalaiele ua-nda kubhita ku njumbu (kaxitiku); iene ia-nda ku mu muesa o mbote. Polomesa ia ku mu kudila; ni kusenguluka kua jinguma jê

¹ Talesa, Jihova, ua kà kukumuna oxi anga i xala ngoho, ua kà i bhanga ngundu, o ku thundu diê u tandanganhesa-ku, u i bonguesa, oso a tunga-mu ua kà a muanga.

² Kioso kianda kubhita na-kiu o mundu, kiene ue kia kà bhita na-kiu o nganga; kikala o selevende, kiene ue kià kala ngana iê; kikala o kahatu, kiene kià kala ngana iê ia muhatu; kikala o musumbi, kiene ue kià kala o musumbixi; kikala o musobhexi, kiene ue kià kala o musobhi; kikala u bhana dikongo ni kuvualesa, kiene ue kià kala uoso u futa dikongo ni kuvualesa.

³ Oxi ia kà kukumuka muene, ki mu xala kama, a kà i bhûnda, mbata Jihova ua tange kizuelu kiki.

⁴ Oxi ia-nda kuta jingololo, anga i xoueta; ngongo isekala, hé i xoueta; ilamba ioso iònene mu ixi, ia kà iokojoka.

⁵ Kuma kia kidi kiene oxi ia kasana, mukonda dia iá oso a tungumu; mbata o ijila ka mu i aiuka, o jingonge a ji lungulula, o kikutu kinangenena a ki bulu.

⁶ O kienhiki, kiene kia bhekela o mázui kusekalesa oxi; o ió oso a tungu-mu a-nda ku di-kota; mukonda dia kiki, a-tungi-a-xi a-nda kua oha, mua kà subhuka ngó athu òfele.

⁷ Maluvu ia dila, muvide iù lela; oso a tanene miẋima, kiki ia a di tula mienhu.

⁸ Kuxika o jingoma kua suku, mixindu ia akua-kutumbujuka ni ngalasa iabhu-ku, o kusanguluka kuijiia ku kakoxi ue kua nhoha.

⁹ Kʼanda kúnua dingi vinhu ni kuimba; o uhôlua u kodiuisa kinéne oso a u nua ua kà a ludila.

¹⁰ Mbanza ia xala ngundu, kiki ió bula-bule, jinzo joso muene ja ku jika, ki bhuala dingi u tena kubokona.

¹¹ Hanji kiabhu o vinhu, tuala kuívua mutendu uaʼlamba mu jinzunga; o kutana kuoso kua himbi, o ngalasa moxi iòsondolole-mu.

¹² Mu mbanza mua xala ngoho ngunzu mu ngunzu; o mabhitu a budijika ni kubanza.

¹³ Mbata oxi kiene kia ia-nda ku kala, ni ku matutu, ni muʼaxaxi ka mundu iú, mukua ni muvide kia u lalumuna ibundu, mukua ni jisuênge, kʼibhua o kumuna jiuva.

¹⁴ Iá a-nda kuzangula dízui diâ, anga emba ni ngalasa; a-nda kuta nzôngo, tunde ku musanza, mukonda dia fuma ia Jihova.

¹⁵ Kala kiki, jingisenu dijina dia Jihova, ni mu ibôlo ni mu isanga ia kalunga, jingisenu dijina dia Jihova, Nzambi ia Izalaiele.

¹⁶ Ku maẋokololo maʼxi tuevu-ku ià emba mikumbi ia kufumanesa Muthu Uaiuka; maji eme ngedi: Uaué, enu malʼé! Nga bhele, nga tunuka! Akua-mangonha a bhange ufe! kiene muene, akua-mangonha a bhange muene ufe ua nzungule!

¹⁷ Eie, ua tunga mu ngongo, kuala ku ku kana kibulukutu, ni diela ni mùkala.

¹⁸ Kienhokio-phe, uoso ua kèla, iza ngi lenge kibulukutu, ua kà laúka mu diela, o kiela ngi tunda mu diela, utudila mu mùkala, ua naminina; mukonda bhulu jinjanena a ji jikula, bhoxi, madisesa ma tunguta.

¹⁹ Oxi ioso ia kà budika, ia kà sekala kuene kuoso; i setuka muene, bhu kididi kiê ki i kalabhu.

²⁰ Oxi ia kà bhendujuka muene kala hôlua, itunguta, itona, kala kitelembe a ki nhikisa mʼusuku; mulonga uê a kà u xina ku thandu diê; anga idibhala; o ki iia kiá bhoxi, ki ia kà bhetuka dingi.

²¹ Anga kia kà bhita mu kizuua kieneʼokio kuila: Jihova ue ua kà zungila o ilômbo ia bhulu, mu dinga ni dinga, ni ku jisobha jaʼxi kulu dia mundu.

²² Anga ene-oso a kà a lunjika mu ngenda kala jipelezo, à kala ku upelezo mu katutu; o ki bhita dingi nzungule ia izuua, a kà a zungila luamukuá.

²³ O mbeje ia kà sonoka pholo, dikumbi dia kà kakuka, kioso Jihova dia Ilombo Ieta kia kà hinga o ungana ku mulundu ua Ziione, ni mu Jeluzaleme; kienhokio bhu pholo ia ikulakaji iê bhua kà kala fuma.