Izaía 23 - O Mikanda Ikola

Tilu a-nda ku mu bula-bula, anga a mu bhangulula dingi

¹ Muzambu ua Tilu. Enu mu jinaviio ja Talxixi, kumbenu, kuma muene a mu buikisa kiá, katé ki mu mu subhuka dingi inzo, momué ki mu bokona dingi muthu; kienhiki a a londekeza na-kiu tundé mʼoxi ia Kitimi.

² Dixibhienu, enu mua tunga mu kikolo, enu a mʼizalesa kuala jingenji-ja-kufuna ja Sidone, ene kutabhula mu musanza ua kalunga,

³ ni kubhandulukila ku mbutu ia Sidolo ienda ni kuijiia ku hungulule ionéne ia Nilo, bhu thembu ia kumuna jindombe jê, muene Tilu iú ua di bhangele kitanda kia akua jʼixi.

⁴ Sonhi jé, Sidone, tata! Kuma o mbonge ia musanza ua kalunga, iambe muene, ixi: Eme ku isenda ki ngèle-ku, kuila ngi vuala mona, ki ngi sase ue minzangala ia mala, mba ngi bhana kikombo kua ana-ilumba.

⁵ Kioso kianda kuiza njinbu ia Tilu, bhua-ndu kala misusu kala kiejile jinjimbu ja divuua dia Ijitu.

⁶ Bhitenu mu Talxixi; kumbenu, enu muà tunga mu kikôlo.

⁷ Didi diene o diembu dienu, dia kexe ku tumbujuka ni ngalasa? Diene diembu dia tunda xiahuluʼidi? A-nda ku diambata, di-endela ku inama iê muene katé ku makanga, kuene kuà kala mu tunganena.

⁸ Mukuahi muene ua funha kima kala kiki, phala ku balukila Tilu, o mbanza iòzuike kitundu? Ua bhingi jingenji jê ngó ilamba, anga akuakufuna a kala makota ku ungana uaʼxi?

⁹ O Jihova dia Ilombo Ieta, muene ua ki bhange, phala kutununa o izala ia makembu osuʼó, ni kusebukisa oso a beta ulamba bhoxiʼabha.

¹⁰ Bhita kala o ngiji ia Nilu mu ixi ié, eie monʼakilumba kia Talxixi, kuma kana-ku dingi kima ki ku phopheka.

¹¹ Muene ua senununa lukuaku luê ku musanza ua kalunga, mautuminu ua ma titidisa; Jihova ua bhana ngonge ia kúlua Kanana, phala o jimbonge jê jiie bhoxi.

¹² Iu uambe, uixi: Eie kilumba, monʼa Sidone, a ku bhondeleka, ki mungu dingi ua kà tumbujuka ni ngalasa; balumuka-bhu, somboka, uie ku Kitimi, o kuenhoko ue kua kà mona-ku dinhohenu.

¹³ Talenu o ixi ia Kaldeia; o mundu iú ki u di bhangele luua mundu; Asídia ua i andekela phala oso a tungile mu kikangalakata; a iudika jimbonge jê, ia a tungu o mazemba mê; maji kindalʼiki-phe ioso muene ia budika kiá.

¹⁴ Dilenu mukua ni imbungu, enu mu jinaviio ja Talxixi, mbata uzonda uenu a u sengulula.

¹⁵ Bhu kizuuʼokio-phe, kia kà bhita kuila Tilu a kà mu landuka mu makuinhi-sambuadi a mivu, kala kiene o izuua ia sobha, maji, kioso kia kà bhua makuinhi-sambuadi a mivu, Tilu ua kà kala mukua ni muimbu ua kidianzunga.

¹⁶ Zangula kakoxi, u kondoloke o mbonge, eie u kidianzunga, a ku jimbi kiá; xika uhete, u tambuijile kiambote; vudisa o mimbu, nda aie ni ku ku xinganeka, a ku lembalale dingi.

¹⁷ Kuma Jihova, kíbhua makuinhi-sambuadi a mivu, ua kà zungila dingi Tilu, o muene-phe uà kʼalukilʼé dingi nganhu iê ia udianzunga, o mautuminu oso ene kulu-dia-mundu ua kà bhanganâ undumbu.

¹⁸ Anga o uenji uê ni futu iê ia undumbu a kà i bhakula kua Jihova; ku i lunda kana, ku i bhaka ue kana; maji uenji uê ua kà tokala ió oso ene ku nanga bhu pholo ia Jihova, phala adie katé ki ekuta, a kale ni kizuatu kia kolo, kinanga, kia makembu.