Izaía 22 - O Mikanda Ikola

Muzambu ua mukonda ua Jeluzaleme

¹ Muzambu ua dikôlo dia kisuma. Eie kindala ihi i uala na-iu, kia bhingi o mundu ué uoso a mu lengela bhu jihôngo ja jinzo.

² Mbanza iezala mikolekole, diembu diedi ni díene bulukutu, diembu di tumbujuka ni jingalasa? O imbi ié ioso ki iene kufua ku xibhata, mba ifua mu ita.

³ O ilamba ié ene-oso a di tele ku ndenda, o makuenze a matoma ia a a kuatele anga a a ta bhu mikolo, ió oso a xalele momué, a a kutidile ue bhuamoxi kuma a lémbua kulengela makanga.

⁴ Kala kiki, ngixi: Lungenu o pholo kuengi, eme nga-nda kuẋikujuka ni kudila, ki mu tale hadi ia ku ngi dixibhisa, nga bhondalala mukonda dia kibuika kia mona-kilumba, dia mundu uami.

⁵ Kuma o kiki kizuua kia kibulukutu, kia ku di-lebhula, kia kavanza ka tundu kia Jihova dia Ilombo Ieta, keza, ka tula mu dikôlo dia kisuma; kizuua kia kulundumuna imbaka ni kuia ku milundu ni kudikola-kola.

⁶ Mbata Elame ua nomona kizu kia misongo, mala iá mu makalu, sai ue amondadi; o Kile ua tukulula jingubu.

⁷ Kia-nda kubhita muene kuila, o makôlo mê moso mauabha, ma-nda kuizala ni makalu, o amondadi a kà di-zeleka bhu mielu.

⁸ O divunga dia Juda a kà di katula, mu kizuuʼokio eie ua kà talela ku inzu ia muxitu muala o ikuamu.

⁹ Mua kà mona o misula ia mbanza ia Davidi, mukonda dia kuvula kuê, anga mua kà bhongolola o menha ma dijiia dia luiji.

¹⁰ Mua kʼàlula ue o jinzo ja Jeluzaleme, hé mua kà lundumuna jinzo phala kukolesa o imbaka.

¹¹ Mua kà bhanga ue ditangi bhuʼaxaxi ka imbaka iiadi, phala kubhaka o menha ma dijiia diòkuluʼodio, maji mua tokoka o kutala bhulu, kua ió ua bhange kiki, né ngó kusuua uoso ua iudika o ima iii tundé ku xiahulu.

¹² O Jihova phe, Jihova dia Ilômbo Ieta, mu kizuua kiná ua kà mʼixanena kudila, ni kuta jingololo, ni dikongelu dia mítue, ni kuzuata jisaku.

¹³ Maji o kiki-phe, uamono, muala ku kemba ni kusanguluka, mu jibha jingombe, mu jibha jimbudi, mu-dia xitu, mu-nua vinhu, mu amba muixi: Tu dienutu, tu nuenutu, mungu tu kane o kúfua!

¹⁴ Maji Jihova dia Ilômbo Ieta ua ngʼivisa-kiu mu mátui, uixi: Kikuma kiki, kana, ki nga-nda ku mi loloka-kiu, katé ki ki mi-dia muene o muenhu, eme Ngana, Jihova dia Ilombo Ieta, nga ki tange.

Sebena a mu tununa; Eliakimi a mu zangeleka

¹⁵ O Ngana, Jihova dia Ilômbo Ieta, uambe kiki: Ndé, uie, uzuele ni lundambongo iú, ni Sebena, o kimbadi, u mu ambela, uixi:

¹⁶ Eie uala kubhangaʼhi bhabha? Mukuahi muene uala-nê, ki uala ku kanda o mbila bhabha? ua mu kanda o mbila iê bhu kididi kia di-leka, eie ua mu di sokuela mu ndanji dibhata dia kukala?

¹⁷ Talesa, Jihova ua-nda ku ku takula ni lukuaku lua suina, mukua ni iala dia kindanda anga u ku làmba.

¹⁸ Kia kidi kiene, Jihova ua kà ku nhungisa muene nzé-nzé, kala kia nhungisa o bola bhu kididi kia zanze kia dixala; kuene ku ua kà fuilʼoko, makalu mu ua di-kudisa-nâ a kà buidila kuenhoko, kuma eie ua nuhisa dise mu dibhata dia Ngana iê.

¹⁹ Ku kikalakalu kiê ku uala, nga-nda ku ku kaiesa-ku, anga bhu kibhuna kié a ku langumuna-bhu.

²⁰ Anga bhu kumbi dieneʼodio nga kèxana Selevende iami Eliiakime dia monʼa Hilikiia.

²¹ Hé ngi mu zuika o divunga dié-eie, ngi mu kuatesa ni phonda ié-eie, o utuminu ué ngi mu tula-u bhu maku mê-muene, anga ua kà kala tata ia iá oso a tungu mu Jeluzaleme, u kala ue tata ia dibhata dia Juda.

²² O sabhi ia dibhata dia Davidi, nga kà i tula bhu kisuxi kié; muene kia kà jikula, kana muthu u tena kujika, muene kia kà jika, kana muthu u tena ku jikula.

²³ Ngi mu phapha kala pheleko a i phaphela bhu kididi kia kolo, muene ua kà kala mukua ni kiandu kia ujitu, phala dibhata dia tatʼâ.

²⁴ Kijingo kioso kia dibhata dia tatʼâ, a-nda ku ki tudika kua muene, ni kijingo kia ana ni kia alaúla, ni ingolongondo ioso iòfele, tundé ku jikopho katé ku jingalafua.

²⁵ Mu kizuuʼokio-phe, eme Jihova dia Ilombo Ieta, o pheleko ia phaphele bhu kididi kia kôlo a kà i katula: anga a i vuza, i laúka; o kimbamba kioso kia nhengene-ku kia kà sutunuka, kabasa Jihova ua ki ambe.