Izaía 21 - O Mikanda Ikola

Muzambu ua kusenguluka kua Babilonha

¹ Muzambu ua tokala kiphenza kia kizanga kia kalunga. Kala o ibhungu ia kitembu kia sulu ki kungulula ioso, kiene ue kia kà tunda muene ku kikangalakata, ku mukáu u kuatesa uoma.

² Kisunji kiaiibha kia ngi londekeza; mukua-ufe u bhanga o ufe uene, o mubuikixi uenda ni ku buikisa; banda, eie Elame, konda kuene kuoso, eie Mediia, kuma mikemu iê nga i bhuisaku kiá.

³ Kienhiki miongo ia ngi kate kiavulu muene; kua ngʼiza misusu kala misusu ia ió uala ku isenda; lamba dia ngi kondo ni kuívua nga lémbua; nga iokojoka katé nga lémbua kumona.

⁴ O miẋima iala ku ngi titila kiavulu, kua ngiza kubhuuama ni kuteketa; ngendile kuma kuvunda, o ki kua mateka ngó o ku fefetela, uoma ua ngʼiza.

⁵ Ene ia a zala meza, ia a langidila, ia a dia, ia a nua. Balumukenu mu jingana, uaienu maji ku jingubu.

⁶ Mbata Jihova ua ngʼambela kiki: Ndé, ta mulangidi; o kioso kia mona, a ki tange.

⁷ O kioso ki a mona kibuka kia masoladi a mondala jikabalu, kiiadi-kiiadi, kibuka kia jibulu, mba kibuka kia jikamelu, muene evidile muene kiambote ni masunga.

⁸ Muene iu ua di kola kala hoji: Ngana! Ngedi o mu muanha ngemana bhu ditala dia kilangidilu ni kutala, ngi langa ngi tona, o mausuku oso ngala ku a zubhila mu kulangidila.

⁹ Talenu! Kindala kù kuiza kifuxi kia mala, ni iá a mondala, ala kuiza ku kiiadi-kiiadi. Muene-phe ua kumbulula, uixi: Babilonha ia jimi, ia senguluka muene! Ni iteka ioso ia kusonga, ia jinzambi jê, ia di-vundu bhoxi ii ia bukujuka.

¹⁰ Uaué, tata, kibetelu kiami; Uaué taté! Tiliku ia kibhâmba kiami kia kuvundila! Nga mi tudila kioso ki ngevu kua Jihova dia Ilombo Ieta, muene Nzambi ia Izalaiele.

Muzambu ua kukanena Nduma

¹¹ Muzambu kua Nduma. Nzôngo ia ngi bhixila ia tundu ku Seíle, exi: Mulangi, ola iahi kiá i tuala mʼusuku iú? Mulangi, kua bhiti kima kiahi mʼusuku?

¹² Eme mulangi: O kimene kí kiza, o usuku ue iu uiza; se muandala kuibhula ebhulenu; Vutukenu, zenu.

Muzambu ua kukanena Alábia

¹³ Muzambu ua Alábia, a mu kanena. Mu matutu ma Alábia muene mu mua kà zekela usuku, enu mu jingenji ja Dedanime.

¹⁴ Tundenu ni menha mu kauidile akua-dinhota; akua-bhata kʼoxi ia Tema tundenu ni jimbolo mu kauidila o jingòmbo oso a lenge.

¹⁵ Kuma a mu lenga jixibhata, a mu lenga xibhata iôfomone, ni mufula uʼo oleke, ita ni kuene xiki-xiki.

¹⁶ Mbata Jihova ua ngʼambela, uixi: Mu muvu umoxi, midila ia muvu ua mukua-nganhu, kijingo kioso kia Kedale kia kà jikinina.

¹⁷ O a subhuka ku mundu ua iá a kuatele mifula, o ilôlo ia anʼa Kedale, a-nda kutunuka muene, kuma kiene kia kiambe Jihova, Nzambi ia Izalaiele.