Izaía 20 - O Mikanda Ikola

Muzambu ua Ijitu ni Itiiópia kuia ku ubhika

¹ Muvu uejile Talatana ku Ajindode, kia mu tumine Salangone, sobha ia Asídia, anga úlua Ajindode u mu tambula;

² Bhu thembuʼoio Jihova ua tangela polofeta Izaia, monʼa Amoji, uixi: Ndé ka Zule kidinhaji ki ua di-kutu mu mbundʼokio, ni jisabhatu ku inama zula-ju. Muene anga u ki bhanga, anga uenda tuẋi, inama bhoxi dia hatu.

³ Bhenhobho Jihova u zuela, uixi: Selevende iami Izaia, o kuenda kiki ni tuẋi, ni inama bhoxi mu mivu itatu, kia di bhange kijimbuete ni kidiuanu phala Ijitu ni Itiiópia.

⁴ Kiene ue o sobha ia Asídia kia kʼàmbata o jihutile mu Ijitu, ni iá a a balakala a tundu mu Itiiópia, ni minzangala ni adiakimi, nʼa ambata tuẋi-a-thakala, ni inama bhoxi, mataku mu kanga, phala Ijitu sonhi ji mu kuate.

⁵ A kà bhuuama, sonhi ja kà a kuata, mukonda dia akua-Itiiópia, kidielelu kiâ, ni akua-Ijitu, a di bhange ene o thathe iâ.

⁶ Akua-bhata mu ixiʼoio, mu kizuua kiná, a kèla: Enu mala tua mudielelele, bhuezʼobho, ki tualʼiki tua-nda ku di tela dingi kua nanhi, u tu banda, phala ku tu kudila kua sobha ia Asídia? Ki tualʼiki tua kà bhulaka kiebhi?