Izaía 2 - O Mikanda Ikola

Fuma ia kidi ia-nda kutambula Izalaiele ku hádia. Maulongelu a ku a iudika; kizuua kia Jihova; Jeluzaleme a mu iẋika

¹ Kisuma kia muene Izaia, monʼa Amoji, kia tokala Juda ni Jeluzaleme.

² Anga kia kà bhita-phe kuila: Mu izuua ia kà sukidila-ku, o mulundu kua tungu o inzu ia Jihova, ua kà beta kuzangalala o milundu ioso ni tumilundu tuofele, ndenge; o ifuẋi ia jixi joso ia kà lengela kué muene.

³ Miji iavulu, ia kèza anga ia kà zuela: Zenu tu bande ku mulundu ua Jihova, kuʼbhata dia Nzambi ia Jakobo, phala a tu longese kioso kiene o jinjila jê, nda tuendele mu jihoka jê; mbata kitumu kia kà tunda mu Ziione, maka ma Jihova ma kèjiia mu Jeluzaleme.

⁴ Muene ua kà tetuluila akua-jixi, ua kà bazela miji ia nzungule; enhá, kuila a xikina kia a bazelʼiki, jixibhata jâ a kà ji kitula matemu, jisosa jâ a kà ji kitula jimvo; ki bhua kà kala dingi ku-di-zengela jixibhata kifuxi ni kifuxi, né ku di-longa dingi kúlua ita.

⁵ Enu mu dibhata dia Jakobo, zenu; tuendedienu mu mukengeji ua Jihova.

O Ukumbu anda ku u bhuisa-ku

⁶ Maji eie uehelela o mundu ué, o diembu dia Jakobo mukonda a dʼizalesa ni ífua ia akua thunda; ala azambuidi kala akua Fidíxia; ia a di-fungisa kumoxi ni akua jixi jengi.

⁷ Oxi iâ, iezala ni phalata ni ulu, jimbongo jâ ki jene mbambe; oxi iâ ue iedi ni jikabalu jinzungule, o makalu mâ kuvula kuahi.

⁸ Oxi iâ ue iezala ni iteka; a fukamena ima ia kalakala o maku mâ; bhu pholo ia kima kieneʼokio kia bhange o milembu iâ-ene.

⁹ Bheneʼobho bhene bhu sebukila o mundu, bhene ue bhu di-tunuina o makota a jinganga; kala kiki, eie, Ngana, kua ká a loloka.

¹⁰ Ndé, u bokone mu mabanda, ku matadi, nda u suame mu fufuta, phala ulenge o pholo ia Jihova ia madiuanu, ni kujinga kua unéne uê.

¹¹ O mesu ma bhumu, ma athu, a kà a tululula; o kuzangalala kua makuenze kua kà tunuka; bhu kumbiʼodio Jihova muene ngó a kà mu zangeleka.

¹² Mukonda o kizuua kia Jihova dia Ilômbo Ieta, kuila kieza-bhu, ni mukua ukumbu, ni mukua katènda, ni ió uoso mukua izala, ene-oso a kà a tululula muene.

¹³ Ni mixi ia sédulu ia Libano, ia lebha í ia di-zandelʼoio, ni mikaluvadiu ia Baxane;

¹⁴ ni milundu ioso ialebha, ni malundu mʼònene;

¹⁵ jinzu ja matala, ja di-leka ni imbaka iakolo, iia muene bhoxi.

¹⁶ O jinaviiu joso ja Talxixi, ni jifikula ja fumana, jiia bhoxi.

¹⁷ O kungangamana, ni kuolama kua muthu, a kà ku tununa; ni ku di zangeleka kua makuenze, a kà ku tululula té bhoxi mu mavu; bhu kumbi diodio Jihova muene ngó, ua kà zangalala.

¹⁸ Ni mahamba oso a kà jikinina muene, nzaká!

¹⁹ Kieneʼokio athu a kà bokona mu mabanda a matadi ni mu makungu bhoxi, mukonda dia kutukuluka kua Jihova kukola, ni mukonda dia fuma ia unéne uê, kioso muene kia kà balumuka phala kudiuanesa oxi.

²⁰ Mu kizuua kieneʼokio, o muthu ua kà takuila ku jiphukulu ni ku madima o iteka iê ia phalata ni iteka iê ia ulu, ia bhangele phala ene ku i diundila.

²¹ Anga a kà di-suetesa ni ku di xinjika mu misula ia matadi, ni mu mitanji ia matadi a makota, mukonda dia kutukuluka kua Jihova kukola, ni mukonda dia fuma ia unéne uê, kioso muene kia kà balumuka phala kudiuanesa oxi.

²² Kala kiki-phe, o muthu uala ngoho ni mulenge ua kubhuimina mu dizulu diê, mu sondolokienu. Mukonda muene ue a mu ximana ni kima kiahi?