Izaía 19 - O Mikanda Ikola

Muzambu ua kukanena Ijitu

¹ Muzambu ua Ijitu. Talesa koko, Jihova iu uiza, ua di-longo mu dituta dia ngelephephe, ua-nda ku tula mu Ijitu; mahamba ma Ijitu a kà ma tungutisa bhu pholo iê, anga muẋima ua akua-Ijitu ua kà botomoka mʼoxi diâ.

² Kuma akua-Ijitu nga kà a zokesa ni akua-Ijitu; kala muthu ua kà bhânga ni phangʼiê, kala muthu u di-balukila ni mukuá, o mbanza ibalukila mbanza ia mukuá, o utuminu iú ubalukila utuminu ió.

³ Muenhu ua akua-Ijitu ua kà bhuamu moxi diâ; o ki ata phangu, eme ngi i sengulula; bhenhobho a-nda kuia kuibhula phangu ku mahamba mâ, ni ku imbanda, ni kutaha jingômbo, ni akuauanga.

⁴ Eme-phe nga kà bhakula akua Ijitu bhu maku ma ngana iatemanana; sobha i kala ndaxi, muene ua kà a tumina; kiene kiambe Ngana, Jihova dia Ilômbo Ieta.

⁵ O menha ma kizanga kia kalunga a kà bhuinhina, o ngiji ia Nilu ià kamba menha, ia kà kukuta.

⁶ Jingiji ue ja kà bola anga ji bhuinina; o mixinji ia ngiji ia Ijitu ia kà kukuta; ni madianga ni jimbamba ja kà xoueta hé ji xoxouela.

⁷ O iẋoka ku mbanduʼa ngiji ia Nilu, ni ku ibumu iê, ni ioso i a kuna-ku, ia kà kukuta, a ka i vuza, a i texe dikanga, anga iendelela.

⁸ O atona a jimbiji a kà kema, oso ene kuta jinzolo aia ngó ni ku di-kumana, akua kuzaia ni kuta manda a kà bhuila.

⁹ Oso a bhotele jinge linho ia fina a kà kakuka, kumoxi ni ió akua kuleka thanga ja nzela.

¹⁰ Oso a kexe kufutila athu phala ku a kalakela, a kà a bhuidisa; o ió oso a kexi ku a kalakalela, a kà kala ni lamba dia muẋima.

¹¹ Mu kidi, makota mu Zouane ioua muene; a kituka malaji a hatu, ni kaiula ka jingànji ja tetuluka ja Falaó, lelu, ka zuzuma; Falaó-phe mua ka mu ambela kiebhi, muexi; Eme ngi mona ku jinjimu, a ngi vuala kuala jisobha ja xiahulu?

¹² Kindala-phe o jinjimu jé, iá kuebhi? A ku jimbuile kiá, mba-phe a ku tetuluile kioso kia kane Jihova dia Ilômbo ia ita mu balukila Ijitu.

¹³ Kiene ki ngambe, ngixi: O makota mu Zouane a kituka ioua, o ilamba ue mu Nofe a di-nganala; enhá a kà tondalesa Ijitu; ene a a kitile ditadi dia thungi dia fikidila ibuka iâ, ia miji.

¹⁴ Jihova ua a lunduluila kiá nzumbi ia mudiangu, ene ia a bhangesa Ijitu kutondala mu ibhangelu iê, mukuâ ni hôlua kioso ki i di-kundumuina mu induxila iê ia lusu.

¹⁵ Ijitu ka kà tena kukatula-ku kima ku kikalakalu kià bhanga mútue, mba mukila, mba luthangu, mba lumbamba.

¹⁶ Mu thembu iná akua-Ijitu à kala mukuâ ni ahatu, a kà ueua, a kà teketa mukonda dia lukuaku lua Jihova dia Ilômbo Ieta, mu ku a huha ene.

¹⁷ O ixi ia Juda ia kà kala kidiuanu kua akua-Ijitu, uoso ngó u kiʼvua ki mu bhekela kubhuuama, mukonda dia kikanenu kia Jihova dia Ilombo Ieta, kia xindi phala ku a balukila ene.

¹⁸ Mu thembu muná kua kà kala mbonge jitanu mʼoxi ia Ijitu, a kà zuela dimi dia Kanana; a kà ta hasa kua Jihova dia Ilombo Ieta; mbonge imoxi a kà ixana: Buidila-mundu.

¹⁹ O mu thembuʼomo, Jihova u kala ni kalatódio kê mu kaẋi ka oxi ia Ijitu; anga Jihova a muʼimikina kimaku ki nangenena mu mbambe iê.

²⁰ Kiene ki kala kijimbuete ki bhana umbangi kua Jihova dia Ilômbo Ieta, mʼoxi ia Ijitu; kuma kioso kia kèza kingumba, ene a kà dikola kua Jihova, o muene ua kà a tumikisa Mukudi, ni Mubhangedi, ua kà a kudila.

²¹ Jihova muene ua kà didikiza ku akua-Ijitu, o akua-Ijitu mu kizuʼokio, a kèjiia Jihova; kiene muene, nʼa kuata ku mu bheza ni jisata ni mibhaku; a ta jihasa kua Jihova anga a ji kumbidila.

²² Jihova anga ua kà kuama akua-Ijitu, hé u a saka ue; anga ene a kà bhiluka kua Jihova, o muene ki evua misambu iâ, henda i mu kuata, hé u a bhana o kudisanza.

²³ Bhu kizuuʼokio kuà kala kikoka ki tunda ku Ijitu kiia ku Asídia; akua Asídia eza ku Ijitu, o akua Ijitu aia ku Asídia; anga akua-Ijitu a kà bheza Jihova kala kia mu bhanga akua Asídia.

²⁴ Mu thembu ieneʼoio Izalaiele muene ua kà kala tatu ku konda ia Ijitu ni Asídia, mu ku kala dibesá mu tumbu ni ngongo.

²⁵ Mbata Jihova dia Ilombo Ieta, ua-nda kua kà a Zediuisa, uixi: Mundu uami ua Ijitu, a tunge a some, Asídia kikalakalu kia maku mami, a tunge a some, Izalaiele undundu uami, a tunge a some.