Izaía 17 - O Mikanda Ikola

Muzambu ua kukanena Damasku ni Ifalaimi

¹ Kinemenu kia Damasku. Talesa, Damasku a kà mu katula, phala ka kale dingi mbanza, maji ubiluka dixita dia utôkua.

² Jimbanza ja Alouele ja kà xala ngùndu; ja kà xalela kiá makêla ma ilunga ia ibhaku, diene dinangu diâ, ki bhu kala muthu u i kaiesamu.

³ O mbonge ia Ifalaíme ia kà suka bhenhobho, ni mbanza ia Damasku, ni masubhu ma Sídia; a kà kala mukuâ ni kijingo kia anʼa Izalaiele, kiene kiambe Jihova dia Ilômbo Ieta.

⁴ Bhu thembu bhenhobho kijingo kia Jakobo kia kà tunuka, o kuneta kua jixitu jê kua kà mu-bhua.

⁵ Mukonda kia kà bhita kala mumuni u muna idima mʼóbhia, u bukula mítue ia masa ni lukuaku luê; mukuâ ni muthu uoso u bhongolola masa mu dikôlo dia Lefaíme.

⁶ Maji hanji mua kà subhuka tumasa tua jinjonjombolo, tu tokala o kubonga, mukuâ ni kia nhikisa ibundu ku muvide, anga njotona jiiadi mba jitatu jinamininé hanji ku jithangu ja suku-ku bhuluʼobho, ni njotona jiuana mba jitanu jixalela mu jithangu joso ja bhoxi jemine kia soko, Jihova, Nzambi ia Izalaiele, ua ki zuela.

⁷ Bhu kizuua kieneʼokio, muthu ua kà ta muẋima kua Mubhangi uê, mesu mê ma kà talela kua Dilemba dia Izalaiele.

⁸ Ka kà suua dingi jikalatódio, ja kikalakalu kia maku mê; ka kà landukila dingi ue ima ia kalakala o milembu iê, né ku mixitu, né ku iteka ia lumbila dikumbi.

⁹ Mu kizuua kieneʼokio o jimbonge já ja nguzu ja kà kala uila ididi ia xala jingùndu mu ditutu mba bhu mazokozoko a milundu, makuâ ni ididi mua tungile o Mamodi ni Mahivi ia xala ngó kiene-okio, kia mono anʼa Izalaiele ala kubhiẋila; anga kua kà kala kibuika.

¹⁰ Mukonda o Nzambi ié ia Kibhamuenhu ua mu jimbi, kua te dingi muẋima ku Ditadi dié diene ku ku xitila. Kienhiki né uedi u phapha mixi ia uabha kiambote, hé u i tela kikanzo kia kathathala,

¹¹ o mu kizuua ki ua kà i phapha, u i bhangesa kusabhuka ni kukula, o ki kúkia mu kemene hé ua ká bhangesa kuila mbutu iê ime; hanji, o idima iòbhongolole ia kà di bota mu kizuua kia malamba ni misusu ia vulu ki i xikina ku i saka.

Miji ia jinguma a i tolola

¹² O ilunga ionéne ia mundu, lamba diâ! mukonda a numina kala kiene kunuma mabhuku ma kalunga; o akua jixi uê, lamba diâ! mukonda dia kuzuma kua miji kala menha ma suína ma dibhubha mala kunumina!

¹³ Akua jixi a kà numina kala kiene kunumina dibhubha dia menha, maji Nzambi ua kà a bazela, anga a kà lengela dikanga; ene a kà a kaia kala ibhiate ku mulundu, kia i bhitula kuala o kitembu, mukuâ ni fufutila ia mavu, kia i nhangumuna kuala o kitembu kia nguzu.

¹⁴ Ku ola ia ngoloxi, ki kua-nda kulèmba, talesa kimbuua kia bokona kua akua jixi, maji kuma kuandeka ngó kúkia, ene ka kà moneka dingi. Didi diene o dikânda dia futu ia tokala ió ene ku tu bhûnda, ni uíndua ua fuama ió oso ene ku tu nhana.