Izaía 14 - O Mikanda Ikola

O Kuvutuka kua a a Balakalele

¹ Mbata Jihova ua kà kuatela Jakobo henda, u tona dingi kusola Izalaiele anga u a bheka mʼoxi iâ; jinzuángiza ue ja kà di bunda kumoxi ni ene, anga a kà di banda mu diembu dia Jakobo.

² O ifuẋi ia kà a sangesa, anga aia-nâ mu ididi iâ; anga o dibhata dia Izalaiele dia kà a vua, a kala abhika â a mala ni a ahatu, mʼoxi ia Jihova; anga a kà vua oso a a vile ene, a kà tumina o isuéia ia a talesele o hadi.

³ Anga kia kà bhita-phe kuila, kizuua kia kèza Nzambi ku ku zumbula ku midimu ié, ni ku ku-ila ximbakata, anga u ku sukununa ubhika ua kabhikolo u a ku talesa na-u o hadi.

⁴ Kieneʼokio o mukumbi iú ua kà uimba muene mu kuâmba sobha ia Babilonha, uixi; Mbé o kingumba lelu ki zumbukʼâ! Lelu o ungumba uabhu, o mbanza ia kembele ni ulu lelu ia budikʼâ!

⁵ Mbangala ia akua-phulu Muadi Jihova lelu ua i bukula, o mbasá ia atumini-a-jixi ue kiómuene.

⁶ Ió ua kuama jinga o mundu ni ngánji, ni mabhebhu kiene kia kuata kunemeka athuʼiki uakuata, uedile o ifuẋi ua i tumina jinga ni njinda, muene lelu ue a mu tungika, ki bhuala u ki fudisa.

⁷ Iá nhoha kiá, oxi ioso ia ximbakata; ene oso ia a kola ikóue ia ngalasa.

⁸ Katé ni mixi ia faia, ni misédulu ia Libano, ia kʼolela ue, exi: Tunde ki uaii bhoxi, ki bhuala dingi muthu u banda kunu ni usuéia ua ku tu koka.

⁹ Bòmbo dia Kalunga katé ku hole iê, dia titila kioso ki dia ku ivu, phala kuiza ku ku kauidila ku uijilʼoko; madifundu a balumuka kingumba eie; ni ilamba ioso, ia oxi, ua i balumuna; o jinzumbi ja ifuẋi eie ua ji balumukisa ku iandu.

¹⁰ Ene oso-á a kà tambuijila, anga a kuʼambela, exi: Eie ue ua zondo kiá kala etu, a ku sokesa kiá nʼetu.

¹¹ Ulolo ué a u kundumuina kiá muʼalunga, kumoxi ni mbinbi ia tukoxi tué, maminhu a kà biluka izalelu bhoxi dié, o ibamba ia-ndu ku ku vunga.

¹² Ná théthembua ia kimene, tata, mona-kilumba ua tomboka muʼamene-mene, ua laúka kiebhi ku diulu? Eie ua kexe ku bulukutisa akua jixi, mbé lelu a ku lundumuina bhoxi?!

¹³ Eie uambele mu muẋima ué, uixi: Nga-nda kubanda katé mu diulu, kiandu kiami ngi ki tudika kulu dia jithéthembua ja Nzambi, nga kà xikama muene ku mulundu ua kionge, ngi kexila ku mbandu ia suku.

¹⁴ Nga kà banda muene katé ku thandu dia matuta ma suku-ku, nga kà di fuangana ni Suke-ku.

¹⁵ Né kieneʼokio, kia kuié ngó, a kà ku lundumuina muene mu ifélunu bhu holièlele ia mukiukuluku.

¹⁶ Oso a kà ku mona, a ku ila muene suí, a ku tongolola anga a ku ambela, exi: Muenhú na iala ua kexe kuteketesa oxi, ni ku titidisa jimbanza, kuambe?

¹⁷ Ua kitula jinga oxi kala kikangalakata, o jimbanza jê iú ua ji sengulula jinga? O jihutile jaʼxi muene ka ji ehela jinga kuiá ku mabhata mâ.

¹⁸ Jisobha joso ja ifuẋi, xi, jene joso muene, ja zeka ni ujitu, sobha ni sobha mu sanzala iê.

¹⁹ Eie-phe mbila ié ia ku lusu kala thangu ia bolo, mukuâ ni kizuatu kia iimbi iafu ku xibhata; uedi kala athu a seiela mu phudi ia matadi, ua di-fuangana mukutu ua muthu uafu ia a mu u diota-diota.

²⁰ Enhá ka-nda ku ku fundila-nâ kumoxi mu kina kia kalunga; mbata eie ua jikinisa oxi ié, o mundu ué èʼmuene, ua u jibha-jibha; o mbutu iʼakua ikuma ʼjina diâ dibhua-ku muene nzaká.

²¹ Monenu phangu ia kijibha kia anʼâ, mukonda dia ikuma ia adiʼâ, phale ka bhetuke nʼeza muvua oxi, ngongo nʼa izalese ni jisanzala.

²² Kuma eme, ngi Jihova dia Ilômbo Ieta, nga kà a balumukina, anga ngʼa mona bhu-aia; o ki ngi tula mu Babilonha, nga kèla, dijina dia Babilonha nga di tukula bhoxi, ni masubhu, ni mona, ni mulaula, buíi, eme Jihova nga kiʼambe.

²³ Muene nga kà mu kitula undundu ua tuhombo ni inzunzu, u di bhanga izanga ia menha; anga ngi kuata kiezu kia dibuikilu ngʼa kombela mu dibuikilu, eme Jihova dia Ilômbo.

Muzambu ua kukanena akua Sídia

²⁴ Jihova dia Ilômbo Ieta ua loka, uedi: Kioso ki nga banze, kiene kia kia-nda kubhita; o ki nga xindi, kiene kia kà di-bhanga muene.

²⁵ Asídia nga kà mu huhila moxi iami muene, nga kà mu titidila ku milundu iami, phala o kànga iê ia tula mundu uami ngʼa sondolola-iu, o kimbamba kiê ki tunde bhu isuxi iâ.

²⁶ ʼKâ kene o kaiula kòxinde phala oxi ioso ienhoio, o lulu luene lukuaku luami nga lu sunununa ku thandu dia ifuẋi ioso.

²⁷ Kuma Jihova dia Ilômbo Ieta ua ki xindi, u ki selula mukuahi? Lukuaku luê ua lu sunununa kiá, mukuahí-phe u lu vutula kuema?

Muzambu ua kukanena akua Fidíxia

²⁸ Mu muvu uafu sobha Akaze, kueza kinemenu kala kiki:

²⁹ Eie Fidíxia ku sanguluke, kuile uixi, mbangala ia kexe ku ku kuama lelu ia bukujuka; kuma bhu kixina bhua tundu o nhoka, bhua kà tunda dizuua-mbinga, o kibundu kiê-phe, njiiu i tukila kuása.

³⁰ Jiphandekumbi ja jiphulungu a-nda kukala ni abidi, o akua-hadi azeka kilu kiambote; maji muiji ué, Fidíxia, nga kà u fuisa ni nzala, o masubhu mâ a kà ma jikinisa muene.

³¹ Eie u dibhitu, dila kala kimbùngu; eie u diembu, dikole; kiene ki ualʼokio, eie Fidíxia, ua sengumuka muene; mbata ku suku kua-nda kutunda dixi, ki bhua-nda ku kala muthu ubhulaka.

³² O jiphunga ja tundu ku mundu-phe, tu a vutuila kiebhi? A vutuile kiki: Jihova ua tunga Ziione, nda o jihukunhi ku athuʼê, muene mua sanga o dilengelu.