Izaía 13 - O Mikanda Ikola

Kibuika kia Babilonha; Izalaiele a mu kudila

¹ Kisuma kia Babilonha, kia diuana Izaia, monʼa Amoji.

² Tudikenu mvela ku mulundu uoso ua di-leka, a handekedienu; lekenu lukuaku mu a bhalule, phala a bokuene bhu mielu ia Ilamba.

³ Nga uanena kiá jingonge ku mundu uami uòsole; kiene muene, o mazonda mami ue, ngʼa exana kiá, ene ku ngi banda kioso ki ngi kuata njinda, ió ene mu sanguluka mukonda dia ungana uami.

⁴ Milôlo ia kifuxi ia dʼivisa kiá ku milundu, kala kibulukutu kia mundu uavulu; diene o dízui dia minumango ia jimbanza ni ifuẋi ia di-phopho kiá. Jihova dia Ilômbo Ieta iú bhita ni kukindana o ilômbo ia ita.

⁵ Iú uiza kiá ku ixi ia dikanga ni kuxindumuka tunde kua suku o diulu, muene Jihova ni falamenda ia njinda iê uiza na-iu, phala kusengulula oxi ioso ieneʼoio.

⁶ Endenu kiá ni kukumba, mbata kizuua kia Jihova kia zukama; ki kiza kua Muteni-a-ioso kala kibuika.

⁷ Kieneʼokio-phe o maku oso a kà botomoka, ni muẋima ua athu oso ua kà zonda.

⁸ Bhuà kala kubhondalala, misusu ni malamba, kikote, mukua ni muhatu uala ku mika ia kuvuala; kala muthu kià mona mukuâ ua kà sasumuka; jipholo jâ, ja kà lekujuka.

⁹ Talesa-ze kizuua kia Jihova kí kiza, kikôla, ki kuata uoma! Kizuua kia njinda iatemanana, mbé o kusengulula oxi, ni kubuikisa-mu akua-ituxi oso.

¹⁰ Mbata o jithéthembua ja diulu ni ibalaʼkumbi iê, ia kà lémbua kumuika ni mukengeji uâ; dikumbi dila di mateka kutunda, dia vunduʼé kiá, o mbeji ue ki ia kà bhana dingi mueji.

¹¹ Kuma nga kèza kufuta o phulu ia mundu, akuaphulu nga kà a futa kikuma kiâ; akua kudikaka nga kà a bhuisa o izala; o ingulungumba ukumbu uâ ua kà bhua.

¹² Nga kà bhangesa kuila, o diiala dimoxi di beta kuta o ulu uòzunze ndenge; u beta kota muene, o ulu ua Ofidi ndengiʼèlele.

¹³ Kienhiki, maúlu nga kà a tungutisa; o ixi ia kà sondoloka bhu kididi kiê, mukonda dia njinda ia Jihova dia Ilombo Ieta, ni mukonda dia kizuua kia njinda iê ia muzukuta.

¹⁴ Kala muthu-phe, ua kèla kala mbámbi ia mu lenga, mukuâ ni mama ia mbudi ia kambe uoso u i bokuesa; kala muthu ua kʼalukila kokuâ, muthu ni muthu ua kà lengela kʼoxi iê.

¹⁵ Uoso-uoso a mu sanga mu jila, a kà mu asa; o uoso a mu kuata, ua kàbua ku xibhata.

¹⁶ Tuana tuâ a ka tu sasujula ku mesu mâ ma kumona; mabhata mâ a kà ma bhûnda, o akajiʼâ a ka a bhanga ufusa.

¹⁷ Talesa, nga kà a vulumuina akua Mediia, ene-phe ka kà suua phalata, o ulu ue, né ngó bhuôfele, ka kà u bhindamena.

¹⁸ O mifula iâ iene ia kà sasujula o minzangala; ni mona uala mu mala ka kà mu kuatela henda; o mesu mâ ki ma kà kala ni henda ia anandenge.

¹⁹ Babilonha, o makembu ma akua jixi, muene o fuma ni izala ia akua Kaldeia, ua kèza bhua Sodoma ni Ngomola, kioso Nzambi kia a sengulula.

²⁰ Ki mua kà kala dingi muthu u tunga-mu, ki mua kà kala u bhanga-mu dingi dibhata ku tunda muiji kuiza muiji; né mukua Alábia ka kà phapha-mu o balaka iê, mba ue kiá ngó abidi kuzekesa-mu o ilunga iâ.

²¹ Maji o iama ia mikáu ia kukuta, muene mu ia kà bhanga kibuta kiâ kia kunhohena; o jinzu jâ ja kèzala ni iama ia temanana; mueneʼomo o iminzoue ionéne, muene mu ia kà tunga; ni imbiámbidi ia kà tuka-tuka jinga mueneʼomo.

²² O iama ia makanda, idila kala imbùngu, ia kènda ni ku di-handekela nʼakuá mu mazemba mâ ma xiala ngó jingundu, o mabheku ue ma kà nanga jinga mu mazemba ma matonokenu mâ; kuma-phe o kithangana kiâ kia zukama kiá ni izuua iâ ue ki ia kà vula dingi.