Izaía 10 - O Mikanda Ikola

¹ Lamba dia ió oso a bhana jingonge ja mangonha! Lamba dia asoneki akua kusoneka jingonge ja ku talesa athu hadi!

² Mbé kubhanga o phulu mu ku fundisa o jingadiama ni kukatula o kulunga ku jiphulungu ja mundu uami; phala o kubhûnda atudi, ni kunhana o jihukunhu.

³ O kiki-phe enu mua-nda kubhanga kiebhi, mu kizuua ki nga-nda ku mi endela, anga kuiza o kibuika ki tunda makanga? Mua kà lengela kua nanhi mu sota o disuamenu? O kijingo kienu ue muanda kuá ki tula bhebhi?

⁴ Ni mu kambe ku di buila-buila muʼaxaxi ka jihutile ni kubuila ngambo muʼaxaxi ka iimbi? Ku ima ioso iii, njinda iê ki bhene bhu ia suku, maji hanji kia sunununa o lukuaku luê.

Asídia u tambula muzambu ua kibuika kiê

⁵ Asídia, lamba diê! Ua di bhanga mbasá ia njinda iami: Kuma o njinda iami mukua ni mbangala bhu maku mê.

⁶ Nga-nda ku mu tuma ku balukila muiji ua akua-mangonha, ngi mu tuma kuzoka ni mundu uami a bholomona o njinda iami, phala ku a bhûnda ioso ia tundu mu unhanga ni ku a tambula o madibhundila, ni ku a ta bhoxi pahala ku a diata-diata, mukua ni mathatha mu nzunga.

⁷ Sumbala muene Asídia ka ki fika, mba o mu muẋima uê ka ki xinganeka; mukonda muene mu muẋima uê ukana kubuikisa ni kusengulula ifuẋi ia ndumba dia miji,

⁸ kuma, uamba uixi: Abha, ilamba iami ioso ki jisobha?

⁹ O Kanó ka sokué ni Kalekemixi? O Hamate ka sokué ngó ni Alapade? Samádia ka sokué ngó ni Damasku?

¹⁰ Kuma-phe lukuaku luami lua kuata jimbanza ja akua-mahamba, sumbala iteka iâ ia kusonga ia betele kota o ia Jeluzaleme ni ia Samádia, ndenge.

¹¹ Mbé kioso ki nga bhange kua Samádia ni mahamba mê, ki nga soko-bhu ku ki bhanga ue kua Jeluzaleme ni mahamba mê?

¹² Mukonda dia kienhiki, kia kà bhita-phe kuila: Kioso Jihova kia kà zubha o kikalakalu kiê kioso ku mulundu ua Ziione, ni mu Jeluzaleme, kiene ki nga kà futa o kibundu kia muẋima ua di-zangeleka ua sobha ia Asídia, ni ku di mona o kukula kinène ku mesu mê muene-muène.

¹³ Mukonda uambe, uixi: O kiki nga ki bhange ni nguzu ia lukuaku luami, ni mu kuijiia kuami, kuma ngi muthu nga tongoloka; eme nga sondolola o jimbambe ja ifuẋi, o jimbongo jâ nga a nhana-ju, ni uzonda uami nga buikisa a xikamene ku iandu ia ungana.

¹⁴ O lukuaku luamiʼlú lua bongo o umonhi ua ifuẋi mukua ni kikalanga, kala kiene mu kubhongolola o maiaki ma uʼehelele, kiene ue eme ki ngʼongeka o ixi ioso. Ki bhua moneka uoso u zenga dibhabha, mba u bhana mu kanu, mba u longolola.

¹⁵ Kifua dikuua di ta nzabala kua ió ua di kuata bhu maku mu koka muxi? Inga o sela i di thatha kua ió u batula na-iu? Mbé o mbangala i nhikisa oso a i kuata, inga o mbasá i balumunʼé o lukuaku lua ió uala na-iu?

¹⁶ Kala kiki, O Ngana, Jihova dia Ilômbo Ieta, ua kà bheka dibhèlu kua oso a nete muʼaxaxi kâ, o bhoxi dia kizunda kiâ ua kà uikabhu túbhia kala kitumba kia uama.

¹⁷ Mbata mukengeji ua Izalaiele ua kà di bhanga kala túbhia, Dilemba diâ, ukituka mulengo, uene uximika hé u jikinisa o misonge iê ni ivunda iê mu kumbi dimoxi.

¹⁸ Ua-nda kujikinisa ue o fuma ia muxitu uê ni mukáu u bhana idima, uandekela ku muenhu anga uzubhila ku mukutu; anga kila kala kiene kuambuka mukua kuambata o mvela.

¹⁹ Anga o mixi ia muxitu uê, ioso ia subhuka-ku, ikala ngó iofele, ni kamona ka ndenge uasoko-bho ku i alula.

Kua Kambe ngo Kathangana a Vutuka

²⁰ Hé kia kà bhita bhu kumbiʼodio kuila, oso a subhuka mu Izalaiele, ni ió oso a bhulaka mu dibhata dia Jakobo, ka kà dielela dingi enhó a a tolola, kana; inda o kudielela kuâ kuà kala ngó mua Jihova, Dilemba dia Izalaiele mu kidi.

²¹ O masúbhu ma kà biluka; kiene muene, o masúbhu ma Jakobo ma kà biluka kua Nzambi ia Nguzu.

²² Mbata, eie Izalaiele, o mundu ué né-mbe u vula kala kisekele kia kalunga, tumbalumbalu ngó tua kà biluka mu kudiela, kuma kibuika a ki xindi kiá, kiezala, kia ẋamuka ni kubatula mu kidi.

²³ Kuma o kibuika kia xindi kiá, o Ngana, Jihova dia Ilômbo Ieta, ua kà ki bhitisa muene muʼaxaxi ka oxi ioso ienhiʼii.

²⁴ Kala kiki, o Ngana, Jihova dia Ilômbo Ieta, uambe kiki: Eie u mundu uami, ua tunga mu Ziione, ku kale ni uoma ua Asídia, kioso kia ku beta ni mbangala, kioso kia kuzengela ditombe kala kia kexe mu bhanga akua-Ijitu mʼukulu.

²⁵ Mbata kua kambe ngó kathangana kófele, o kutema kuami ni njinda iami ia-nda ku di bhanga phala ku a jimisa o mbutu.

²⁶ Kuma Jihova dia Ilômbo Ieta ua kà mu fundumuina mabhebhu a soka ni kijibha kia bhitile mu Midiiane, bhua zukama ni ndanji ia Olebe; mukuâ ni mbangala ié ku thandu dia Kalunga Kakusuka; kiene kia kà bhanga Asídia kala kia bhangele akua-Ijitu.

²⁷ Anga kia kà bhita mu kizuua kieneʼokio, kuila kimbamba kia ku xinine Asídia bhu kisuxi, a kà ku tulula-kiu, ni kànga ioso ia ku kuzuikile muene mu xingu. O kànga a kà i sasujula mukonda dia athu ami nga undu ni maji.

O Maubokuenu ma Kingumba

²⁸ Iu uiza, uazukama kiá mu Aiate, iu bhita kiá mu Mingolone, o imbamba iê ua i bhiẋika kiá mu Mikimaxi.

²⁹ Ia a bhita kiá, a te kibangu mu Jeba: Lama iù teketa kiá; Jibeia ia Saulu iu uia ni lusolo.

³⁰ Monʼa Ngalimi ua kilumba, ta nzôngo, dikole muene! Laiji eie uivuʼó! Nʼeie kalénge, Anatote!

³¹ Madimena-ze uaié kiá; o iá a tunga bhu Jebime, ia lenga kiá, ku ibuka-ibuka.

³² Mu kizuua kieneʼokio Asídia ua kà sukila mu Nobe; o mulundu ua mona-kilumba Ziione, ua kà u zengela lukuaku, o kathuthu-lundu ka Jeluzaleme.

³³ Maji talesa, Muadi Jihova dia Ilômbo Ieta, ua-nda ku mu kumbula o jithangu, ni njinda, o thangu ja lebhelelʼojo a kà ji saúna, joso ja dizangeleka ja-nda kuia bhoxi.

³⁴ O muxitu ua vundu kinène a kà u koka ni njangu, o Libano ua kà buila bhu lukuaku lua kindanda kimoxi.