Izaía 1 - O Mikanda Ikola

Ituxi ia mundu ni jiphaxi jê. O milongi ni jindumu

¹ Kisuma kia muene Izaia, monʼa Amoji, kia tokala Juda ni Jeluzaleme, mu izuua ia Uziia, ni Jotamu, ni Akaze, ni Ezekiia, jisobha ja Juda.

² Ivenu, enu mu maúlu, eie ue u ixi, bhana mátui; mbata Jihova muene ua mu zuela: Nga bhange ana, nga a bhana kijingo; maji ene a ngi balukila.

³ O ngombe iejiia ngana iê, o bulu ue iejiia mu kidilu kia mu tela ngana iê; maji Izalaiele dia mundu uami ua xiti mu thulu, kifuxi kiami kʼejiia kima.

⁴ Kifuxi kiki lamba diâ, mukonda kiezala ni ituxi, mundu ua kubhuma, muiji ua isuéia, mbutu iaiibha i sambukisa kubola; Jihova a mu te dikunda. Delemba dia Izalaiele a mu tembula, ia a vutuka kuema!

⁵ Ngi mi betelaʼhi dingi, se hanji mua-nda kuẋinukenunu? Mítue ienu ioso iezala uhaxi; o miẋima ienu ioso ia botomoka.

⁶ Tundé ku makànda a inama katé ku mútue ki kuala kima kia disanze; kuala ngó jifidila, ni ijimbu, ni ilonda ia sotama, ki iótumbe, ki iókute, mba bhu kala ngó kilonda kimoxi kiózaze tumaji.

⁷ Ixi ienu ia xala ngùndu, madiembu menu ma jikata mu túbhia; o mikáu ienu enda ni ku mi dia-iu kuala athu engi, akua jixi ja makanga, enu mu ki mona mesu; kibuika-phe kia athu engi kia mi vubuka.

⁸ Monʼa kilumba mu Ziione, ua xalela mukuâ ni fundu mu mábhia a mivide, kala muionga mu mulenga ua manhungu, uedi kala ki kala o mbanza iòkondoloke ku jinguma.

⁹ Se o Jihova dia Ilombo Ieta ua kambele ku tu xila tumbalu-mbalu, eji ku tu buikisa kala Sodoma, tueji ku di fuangana ni Ngomola.

¹⁰ Enu muedi kala o ilôlo mu Sodoma, ivenu kizuelu kia Jihova; bhanenu mátui ku kitumu kia Nzambi ietu, enu muala kala o mundu ua Ngomola, tata!

¹¹ Eme Jihova, uambe, o ilunga ienu ia jisata i ngi bhandululaʼhi? Ngedi ni mibhaku ienu ia jimbudi ja kuoha, ni ia matheka ma ibhaku ia jisevadu, ia ngi kumu, manhinga ma jingalote, ni ma jiseseme ja jimbudi, ni ma isutu ia jihombo, mene moso ki mala ku ngi uabhela dingi.

¹² O ki mua mu kuiza mu kuongama bhu pholo iami, nanhi ua mi bhingi-kiu bhu makuʼenu?

¹³ Kana dingi kuiza mu titidila mu malumbu mami; kana dingi ku ngi bhekela maujitu ma kingoho; o fumasa ienu, phalʼeme, nga i kiti ufusa: ni jimbeje jathethama, ni jisabhalu ja kunhoha, ni kubhongolola o ionge; ki ngi tena kuxididikila jifesa ja ituxi, né kiá o ionge ienu ia ujitu.

¹⁴ O jimbeji jenu jathjethama, ni ionge ienu ia ujitu, muenhu uami ua di kumu-naju; ja ngi nemena kiá; ja ngi kumu kiá o ku ji xididikila.

¹⁵ Uila kiki, kioso ki mú sunununa o maku menu mu kusamba, mesu mami, kokuenu, ngi ma sueka; xi, kioso ki mu vudisa o misambu ienu eme ki ngi ivu, mukonda o makuʼenu ezala manhinga.

¹⁶ Di sukudienu, mu dizelese, phulu ioso ia ibhangelu ienu katulenu-iu, i tunde ku mesu mami, ehenu o kubhanga kiaiibha.

¹⁷ Dilongienu kubhanga o mbote; bhangenu ioso iaiuka; kudilenu uoso a mu tatesa; batuilenu monʼa difundu kioso kia iuka; atudi a bhangedienu.

¹⁸ Izenu-phe kiá, mu ngi sambulule, eme Jihova. Né-mbé ituxi ienu ia kusuka kala husu, ia-ndu zela mukuâ ni neve (o kikulakaji); né-mbé iedi nguí kala hundu, iila muene phalatatá mukuâ ni kindemba kia mbudi izela.

¹⁹ Se muandala, anga mu ngiʼvua, o mbote-phe iaʼxi iii mua-nda ku i dia muene.

²⁰ O ki mu dituna-phe, anga mu ẋinuka, muanda kudiua ku xibhata; kuma dikanu dia Jihova dia ki tange.

O Mbanza ia vulu o Ituxi

²¹ Mbonge iami ia kexe fiiele, ia biluka kiebhi kidianzunga, tata! O ki ia kexe, kuiuka kuvula! O kufundisa mu kidi kua tungile moxi diê, maji leluʼidi mueza ijibhanganga.

²² Phalata ié ia biluka makololo, vinhu ié ia di lungu kiá ni menha.

²³ Makota mé ma mbonge a bhukumuka, a di bundu kumoxi ni miii; kala muthu mudiâ, ki ua a monuʼokio, a uabhela kitadi kia kudiodia milonga, bhua mona o nganhu usanga aia lusolo; hukunhu, o ku mu batuila milonga, u a lémbua; kene kusuua dimanda dia atudi.

²⁴ Uila kiki, Jihova, Nzambi ia Ilômbo Ieta, o Dizonda dia Izalaiele, uixi: Sembele nga di-bhângela bhu pholo ia jinguma jami, ku muẋima ni ku ngi zele, o athu a ngi zembe anga ngʼa vutuila phonzo.

²⁵ Anga lukuaku luami lu ku bilukila, hé ngi ku ixika makololo mé moso, ni ngi katula o dixidilu dioso.

²⁶ Hé ngi ku vutuila dingi afundixiʼé, kala kia kexe mʼukulu; ngi ku vutuila dingi jindongixi jé, kala mu xahulu; kiene kia kà ku luka exi: Diembu dia Uiukilu, mbanza ia fiiele.

²⁷ Ziione ngà ka mu kula mu kidi, osoʼalukila kua muene mu kidi, a lunga.

²⁸ Maji atondadi, ni akua-ituxi-phe, a kà a buikisa kumoxi; ni ió oso a xisa Jihova, a kà jima mbutu.

²⁹ Kuma sonhi ja kà mi kuata, mukonda dia luimbi luenu lua mixi ia mikaluvadiu i mua kôlesa, pholo ia kà mi sonoka mukonda dia mábhia a itulu u mua solo phala kubhezela.

³⁰ Mbata mua kà soka ni muxi ua mukaluvadiu uia ni ku lalumuka o mafe, makuâ ni ditutu dia kambe o menha.

³¹ Anga o dizonda ua kà biluka kibhiaẋi, o kikalakalu kiê mukua ni soso ia túbhia, anga kiiadi kiâ a kà uamena bhuamoxi, u a jimina ka moneka.