Ijila 9 - O Mikanda Ikola

Alá u bhanga kiamenga kiê muene ni kia kifuẋi

¹ Anga ki bhita kuila, mu kizuua kia kanake, Mozé u ixana Alá ni anʼê, ni adiakime a Izalaiele;

² anga u ambela Alá, uixi: Kuata monʼa ngombe ia sata ia kituxi, ni kilumbe kia mbudi kia sata ia kuoha, ia di sanze kiambote sé ngó unema u i satele Jihova.

³ O anʼa Izalaiele u ambela, kuila: Enu mu kuata kisutu kia hombo kia sata ia kituxi, ni monʼa ngombe ua kiubha, ni monʼa mbudi ua kiubha, a di sanze kiambote sé ngó unema, phala sata ia kuoha;

⁴ ni ndumbe ia ngombe ni kilumbe kia mbudi kia sata ia paze, mbé kusatela bhu pholo ia Jihova; ni mubhaku ua musa uólunge ni maji; kuma lelu Jihova ua-nda ku mi tukulukila.

⁵ Bhenhobho anga a bheka kioso kia tumu Mozé bhu muelu ua balaka ia kutakanena; anga kilômbo kioso ki zukama, hé emana bhu pholo ia Jihova.

⁶ Mozé anga u a ambela, uixi: Kia mi tumu Jihova kubhanga, kienhiki: o kubenha-phe kua Jihova kua-nda ku mi tukulukila.

⁷ Bhenhobho Mozé anga u ambela Alá, uixi: Bhiẋila bhu kalatódio u bhane sata ié ia kituxi ni sata ia kuoha; u bhange kiamenga ni kié eʼmuène, ni kia kifuẋi; u bhange kiua ujitu ua kifuẋi, u a bangele ni kiamenga, kala kia tumu Jihova.

⁸ Alá anga u bhikila bhu kalatódio, hé u jibha o monʼa ngombe ua sata ia kituxi, o sata iê muene.

⁹ Anʼa Alá anga a mu bhekela o manhinga; muene u bondeka-mu mulembu uê, hé u ta manhinga ku jimbinga ja kalatódio; amukuá u a eẋikila bhoxi dia kalatódio.

¹⁰ Maji o banha-phe, ni anasonhi, ni dilânda dia banha ia vungu miẋima, ia sata ia kituxi, ua i ohela ku kalatódio, kala kia tumu Jihova kua Mozé.

¹¹ O xitu-phe ni kibha ua i oha mu túbhia ku mukáu ku kanga dia kibangu.

¹² Anga u jibha sata ia kuoha; o anʼa Alá anga a mu bhekela o manhinga, anga muene u a eẋikila mu jimbandu ja kalatódio.

¹³ Anga a mu bhana o sata ia kuoha ku idiandu, ni mútue; muene anga u i ohela ku kalatódio.

¹⁴ Mídia anga u i sukula kumoxi ni inama, hé u i ohela ue ku thandu dia sata ia kuoha ku kalatódio.

¹⁵ Anga u bhakula o ujitu ua kifuẋi, u kuata kisutu kia hombo kia sata ia kifuẋi ia kituxi, u ki jibha, u ki bhana mu sata ia kituxi, kala kia bhange kia dianga.

¹⁶ Anga u bhakula ue o sata ia kuoha, u i bhana kala kia tumu o kijila.

¹⁷ Anga u bhakula o mubhaku ua musa, u vota-ku dibhûbhu diê, u di ohela ku kalatódio, maji o sata ia kuoha ia kimene, ia di kalela.

¹⁸ Anga u jibha ue ni ndumbe ia ngombe ni kilumbe kia mbudi ia jisata ja paze, ia tokala o kifuẋi; anʼa Alá anga a mu bhekela manhinga, muene anga u a eẋikila mu jimbandu jikoso ja kalatódio,

¹⁹ a mu bhekela ue ni banha ia ngombe ni ia kilumbe, ni mukila uanete, ni banha iala ku mídia, ni ia anasonhi, ni dilânda dia banha ia vungu ku miẋima;

²⁰ o bhanha a i ta ku phetu, o Alá anga u i ohela ku kalatódio.

²¹ Maji o jiphetu-phe ni inama ia taku Alá ua i bhuka, kuma ujitu ua kubhukila bhu pholo ia Jihova; kala kia tumu Mozé.

²² Alá anga u leka maku ku alela o kifuẋi u a bhana kizediuise; anga u tuluka kia zubha kubhana o sata ia kituxi, ni sata ia kuoha, ni sata ia paze.

²³ Bhenhobho ni Mozé ni Alá anga a bokona hanji mu balaka ia kutakanena; anga a tunda, hé a bhana o dibesá ku mundu; o kubenha kua Jihova anga ku tukulukila o kifuẋi kioso.

²⁴ Kuma bhu pholo ia Jihova bhua tundu túbhia tu tua jidisa o sata ioso ia kuoha ni banha iala ku kalatódio; o kifuẋi kioso kia ki mono, a dikola ni ngalasa, hé a di bhala jipholo bhoxi, mu kudiunda.