Ijila 7 - O Mikanda Ikola

Ngonge ia sata ia kuêla

¹ Ngonge ia sata ia kuêla ienhiʼii: Iene i kôla kinéne.

² Bhu kididi bhuoso bhua mu jibhila o sata ia kuoha, bhene bhua jibhila o sata ia kuêla; o manhinga mê kikale a mʼeẋikila mu jimbandu joso ja kalatódio.

³ U bhakula-ku o banha iê ioso, ni mukila uê uanete, ni banha ioso iala ku mídia,

⁴ ni anasonhi aiadi ni banha iê iala ku malombo, ni banha ioso iala ku dikutu ni ia miẋima a i katuila kumoxi ni anasonhi.

⁵ Nganga anga u i ohela ku kalatódio mu ujitu ua ku bhakula kua Jihova ni túbhia; kuma sata ia kuêla.

⁶ Diiala dioso ku jinganga, ku sata iii u die-ku; a i dila-phe bhu kididi kikôla; kuma i kôla kinéne.

⁷ Kioso kia tokala sata ia kituxi, kiene kia tokala ue o sata ia kuêla; ngonge iâ iene imoxi; nganga uoso u bhanga na-iu kiamenga, muene ia mu tokala.

⁸ Nganga ue uoso u bhakula sata ia kuoha ia bheka muthu uoso-uoso, kibha ki tunda ku sata ia kuoha kiê-muène.

⁹ O ujitu ua musa ue, uoso ua kangela mu fôrno, mba a u kangela mʼombia ia mavu, mba a u kangela bhu kienga, u kala ua ngene ua nganga uoso ua u bhakula.

¹⁰ O mubhaku ua musa, uoso uólunge ni maji, ni uakukuta ua kambe maji, uangene ua anʼa Alá oso, ene oso a sokela.

Ngonge ia sata ia paze

¹¹ Ngonge ia sata ia paze ienhiʼii: Se muthu uandala kubhakula kua Jihova.

¹² Se sata iê ua i bhana mu kusakidila, kifua sata ia kusakidila, kikale u bheka, ni kibhaku kia sata iê ia kusakidila, jimbolo ja kambe felemendu; jólunge ni maji; ni jibolaxa ja kambe felemendu, jóuese ni maji, ni jimbolo jamukuá jólunge ni maji, ja fuba ia uabha kiambote, jalungana muene kiambote.

¹³ Bhu kala ue ni jimbolo ja felemendu, jʼijila kumoxi ni sata iê ia paze mu kutenesa o sata ia kusakidila.

¹⁴ Nganga-phe ku jimbolo ja kambe felemendu u katula-ku imoxi, o jala ni felemendu ue u katula-ku imoxi, kifua munomo uangene ua Jihova; ji kala-phe ja nganga uoso ueẋika o manhinga ma kibhaku kia sata ia kusakidila.

¹⁵ O xitu-phe ia sata iii ia paze, o sata ia kusakidila, kikale a i dia kizuua kiene kia bhana o ujitu uê; ka xi-ku dingi kima katé kuákie.

¹⁶ Sata iê se i kala ia kukumbidila hàsa ia te, mba ujitu ua ku di fikixila mu vondadi iê, a i dia mu kizuua kiene kia bheka o sata iê; o kioso kia subhuka-ku, a ki dia ki kúkia.

¹⁷ Mu kizuua-phe kia katatu, se ku xitu ia sata hanji kua xala, kikale a i oha mu túbhia.

¹⁸ Mukonda se xitu ia sata iê ia paze, ia xala, anga bhu kala muthu u dia-ku kizuua kia katatu, sata iê ka i ẋikina dingi; o muene ue ua sate kia mu-ie ngoho; i di bhanga lufuku, uoso u dia-ku u kala ni kuêla.

¹⁹ Xitu ue se i tula ku kima kia xidi, ka i di dingi; kikale a i oha ni túbhia. Xitu-phe ia sata se iazele, uoso ua zele u i diê.

²⁰ Maji muthu uoso-phe uala ni kuxila nʼa die ku xitu ia sata ia paze, iangene ia Jihova, ió muthu ua ku mu batula mu junda ia povo iê.

²¹ Se muthu uoso ua babata ku kima kia xidi, kuxila kua muthu, mba kuxila kua kiama, mba kuxila kua lufuku luoso-luoso, kia tunda-ku nʼeza mu dia ku xitu ia sata ia paze, iangene ia satela Jihova, ió muthu ua ku mu batula mu kionge kia mundu uê.

Ni banha ni manhinga a a kidika

²² Jihova anga u ambela dingi Mozé, uixi.

²³ Ambela anʼa Izalaiele, kuma: Ki mu di banha ia ngombe, mba ia mbudi, mba ia hombo.

²⁴ O banha ia kibhaku kioso kia di fuila, mba kia diua ku iama, a i bhanga ufunu uengi uoso-uoso, maji ka i di, né ngó.

²⁵ Kuma uoso u dia ku banha ia kibhaku kia kuila athu ene ku ki satela Jihova, mu sata ia kubhakula túbhia, ió muthu ua ku mu batula mu kionge kia mundu uê.

²⁶ Bhuoso-bhuoso bhu mu tunga, manhinga kana ku a dia, a kale ahi oso-oso, né a njíla mba a xitu.

²⁷ Uoso u dia manhinga oso-oso, ió muthu ua ku mu batula mu kionge kia mundu uê.

Dikânda dia jinganga

²⁸ Jihova anga u ambela dingi Mozé, uixi;

²⁹ Ambela anʼa Izalaiele, kuma: Uoso uiza ni sata iê ia paze ia kubhakula kua Jihova, a bheke ujitu uê ua tokala Jihova, ua tundu ku sata iê ia paze;

³⁰ muene u bheka ni maku mê o maujitu ma Jihova ma kubhakula ni túbhia; o banha uiza na-iu kumoxi ni phetu, phala phetu a i bhukile bhu pholo ia Jihova, kuma sata ia kubhukila.

³¹ O banha nganga u i ohela ku kalatódio; phetu-phe i kala iangene ia Alá ni anʼê.

³² Ni kinama kia taku kia mbandu ia dilu, mu ki bhana ue nganga, kuma ujitu uê ua tundu mu sata jenu ja paze.

³³ Uoso ku anʼa Alá u bhakula o manhinga ma jisata ja paze, anga u oha o banha, muene mu mu bhana o kinama kia taku kia mbandu ia dilu, kuma dikânda diê.

³⁴ Mukonda ni phetu ia kubhukila, ni kinama kia taku kia mubhaku, eme-muène nga i tambula ku anʼa Izalaiele ku jisata jâ ja paze, eme nga i bhana nganga Alá ni anʼê, diene dikânda diâ ni ku hâdia ku miji iâ ioso.

³⁵ Dienhidi diene o dikandâ dia Alá, diene ue o dikânda dia anʼê ku maujitu oso a kuohela Jihova, tunde mu kizuua kia a bhakula phala kubhanga o kikalakalu kia unganga ua Jihova.

³⁶ Kuma mu kizuua kia a undu ni maji, Jihova kiene kiambela anʼa Izalaiele kuila ende ni ku a bhana; kikala kijila kiâ ku miji ioso katé ku hádia ni hádia.

³⁷ Ienhiʼii iene o ngonge ia sata ia kuoha, ni mubhaku ua musa, ni sata ia kituxi, ni sata ia kuêla, ni ia kuunda nganga, ni sata ia paze;

³⁸ kuma iene ia tumu Jihova kua Mozé ku mulundu ua Sinai, kizuua kia lekela anʼa Izalaiele kubhana maujitu kua Jihova, kioso kiala ene mu kikangalakata kia Sinai.