Ijila 5 - O Mikanda Ikola

Sata ia lufuku sé ku kʼijiia

¹ Se muthu u ta kituxi kia kuila dízui dia kuta hasa ua dʼivu, o muene mbangi, kuma sai kia mono ki ejiia, maji u di xibhê hé u kamba ku dijimbula, uala ni kuêla kua dikota, ka lungu.

² Mba muthu ua kuata kima kiaxidi, mba kisasu kia kibhaku kia xidi, mba kisasu kia kibamba ki zanzala bhoxi, maji muene ka kʼijiia kiambote se kiene ki kia bhiti, se ua tambula lufuku, uala-phe ni kuêla.

³ Mba se ua babata ku dixilu dia muthu uaxidi, se ku kʼijiia, dixidilu dioso kiá muthu ió dia dikasanesa na-diu; kia-ndu zubha ku kʼijiia u kala ni kuêla.

⁴ Mba muthu se u zuela ngó lusolo mu kuloka, kixi mu kubhanga kiaiibha kixi mu kubhanga kiambote, kioso-kioso kia tange muthu ni kuloka, mu kuzuela ngó lusolo sé ku kʼijiia; o kia-ndu tambula kilunji anga u kʼijiia, u kala ni kuêla mu kima kala kiki.

⁵ Kia-ndu zubha-phe ku kʼijiia kuma uala ni kuêla, mu kima kioso kala kiki, a fisale kuma ua te kituxi;

⁶ a bheke-phe kua Jihova mu kuêla kuê, sata ia kusatela kituxi kiê kia te, kibhaku kia e mukaji, mba mbudi mba hombo, mu sata ia kituxi; nganga anga u mu bhangela kiamenga mukonda dia kituxi kiê.

⁷ Se ka lende kukuata mbudi, mukonda dia uadiama, a bheke mu sata ia kituxi kiê kia te, membe maiadi, mba tuana tuiadi tua jipomba, kua Jihova, dimoxi mu sata ia kituxi, dimoxi mu sata ia kuoha.

⁸ Anga u a bhana kua nganga, muene-phe u dianga kukuata dia sata ia kituxi, u di nionga mútue katé ua sokoka ku xingu, maji o mútue ku xingu ka u katule-ku uoso.

⁹ Ku manhinga-phe ma sata ia kituxi u sangela-ku mu jimbandu ja kalatódio, o ma mukuá u ma zunzila bhoxi dia kalatódio; kuma sata ia kituxi.

¹⁰ Dia kaiadi u di bhanga sata ia kuoha, kala kia tumu o ngonge; nganga anga u mu bhangela kiamenga mukonda dia kituxi kiê kia te, anga a mu loloka-kiu.

¹¹ Se uadiama uê uavulu, ni membe ngó maiadi, mba tuana tuiadi tua jipomba, ka tena ku tu kuata, a bheka-phe, mu ujitu ua kituxi kiê kiate, kakinda ka fuba ia fina ka tena mbandu ia kakuinhi ia efah mu sata ia kituxi; ka te-ku-phe maji, ka te-ku uasu ua dizumba; kuma sata ia kituxi.

¹² Anga uiza na-u kua nganga, nganga nʼa katule-ku dibhûbhu dia ujitu ua kulembalesa nʼa di ohela ku kalatódio, ku thandu dia maujitu ma Jihova ma kubhakula ni túbhia; kuma sata ia kituxi.

¹³ Nganga anga u mu bhangela kiamenga kia kituxi kiê kioso kia te, mu ima kala iii, muene anga a mu loloka. Ioso-phe ia xala-bhu i kale ia nganga, kala ku mubhaku ua mákudia.

Kutondala mu imbamba iangene ikola ia Nzambi

¹⁴ Jihova anga u ambela dingi Mozé, uixi:

¹⁵ Se muthu u tondala o mu kukamba ku kʼijiia nʼa te kituxi mu imbamba ia ngene ikola ia Jihova, bhenhobho mu ujitu kua Jihova a bheke kilumbe kia mbudi mu kuêla kuê, kia di sanze kiambote, sé ngó unema, kiʼósole mu kilunga; o ku ta kuê mu jixikulu ja phalata, eie-muène kiá u mona se kia te xikulu jiiadi, maji o xikulu ikala iene ia dibhezelu, mu sata ia kikuma kiê.

¹⁶ O kioso kia katula ku imbamba iangene ikola kikale u ki futa, nʼa te-ku dingi mbandu ia katanu, hé u ki bhana kua nganga; kienhokio o nganga anga u mu bhangela kiamenga ni kilumbe kia mbudi kia bhana mu sata ia kuêla kuê.

Kuêla mukonda dia kikuma, muthu muene ka kʼijiia

¹⁷ Se muthu u ta kituxi, u bhanga kima kioso-kioso ku ima ia kidika Jihova kuila kana ku i bhanga; né muene ka kʼijiia, hanji u kala ni kuêla, o kikuma kiê uenda na-kiu, ka tena kulunga.

¹⁸ Muene-phe a bheke kilumbe kia mbudi kiadisanze kiambote sé ngó unema, o kuta kuê eie muene u mona se ia te kiasoko phala sata ia kikuma kié, a i bheke kua nganga mu sata ia kuêla kuê; o nganga anga u mu bhangela kiamenga mukonda dia kikuma kia mu bhekela kuêla sumbala muene ka kʼijiia, anga a mu loloka.

¹⁹ Kifua sata ia kituxi mukonda dia kuêla, kuma ka kambe kuêla kuê bhu pholo ia Jihova.