Ijila 27 - O Mikanda Ikola

Jihasa ja vondadi, ni suilu iê

¹ Jihova uambela dingi Mozé, uixi:

² Anʼa Izalaiele a tangele, u a ambela, kuma: Se bhu kala muthu uta hasa iê-muène, athu-phe kua Jihova kuta kuê akale ni suilu ioso i u a xindila eie, se hasa ia tokala muenhu ua muthu.

³ Se diiala, tunde ku mukua makuinhi aiadi a mivu, katé ku mukua makuinhi asamanu, mu xindile suilu ia makuinhi atanu a xikulu ja phalata, mu xikulu iene ia dibhezelu.

⁴ Maji-phe se muhatu, mu xindile suilu iê mu makuinhi atatu a jixikulu ja phalata.

⁵ Se hasa iatokala muenhu ua munzangala, tunde ku mukua mivu itanu katé ku mukua makuinhi aiadi, kia kala diiala, mu xindile suilu iê mu makuinhi aiadi, aʼxikulu japhalata, muhatu-phe kuinhi dia ʼxikulu.

⁶ Se hasa iê ia tokala kamona ka ndenge, tunde ku kamona ka mbeje imoxi katé ku kamona ka mivu itanu, kia kala monʼa diiala mu xindile suilu iê mu ʼxikulu jitanu, o kahetu ʼxikulu jitatu ja phalata.

⁷ O kia kala-phe muthu uakuka kiá, tunde ku makuinhi asamanu a mivu katé kiá ku ukulakaji, diiala mu xindile suilu iê mu kuinhi niʼtanu dia ʼxikulu, muhatu-phe dikuinhi dia ʼxikulu, toka.

⁸ Maji-phe, kia kala ngadiama ia ngadiádia, iu ualémbua kufuta kia mu xindilʼiki, a di bheke kua nganga, nganga nda a mu tongolole, a mu xindile bhuoso bhuatena kukuata o mukua hasa iê ua budika kiki.

⁹ O kia bhana kibhaku, se kibhaku kiókio kiẋikina ku ki bhitisa ku sata ia Jihova, kioso kiá ki a bhakula kua Jihova kikôla, kuma kiangene kiá kia Ngana.

¹⁰ Kana kualuluka mba ku ki tolokala; se kiaiibha kana ku ki tolokala ni kiauabha; se kiauabha, kana ku ki tolokala ni kiaiibha. Se a ki tolokala-phe mu kibhaku kiengi, ni kibhaku kiene ni toloko iê, iene ioso ibhita kiá ku konda ia Ngana.

¹¹ O ki kikala kibhaku kia kixitu kia musalanganda, ki kiene ku tokala ku ki satela Jihova, a ki telekale-phe kua nganga,

¹² o nganga a ki xindile o suilu iê, né kiauabha mba kiaiibha; ioso o suilu iê i xinda o nganga, iene.

¹³ Maji hé ua ki kula mu kima kioso-kioso, ki bhinga-phe, ku suilu iê ubandekeza-ku avasu ia mbandu ia katanu.

¹⁴ Se ku kala muthu ulumbila inzo iê phala itokale Jihova, nganga-phe a i xinde o suilu iê, né iauabha mba iaiibha; ioso o suilu iê i xinda o nganga, iene.

¹⁵ Maji, se mukua inzo iê usola ku i kula, kiauabha, kale-phe utudika-ku dingi mbandu ia katanu ku suilu, inzu anga ikala dingi iê muène.

Hasa ia kulumbila mukáu, ni kidikùlu kiê

¹⁶ Se bhu kala muthu ulumbila dikaẋi dia mukáu kuê kua Jihova, eie-phe o ki u ta o suilu, ulekulala izongelu ia mbutu ioso isoka o ku bhuila-mu: Se mukáu ubhuila homele ia muvimba ia sevada, mukáu ió suilu iê makuinhi atanu aʼxikulu ja phalata.

¹⁷ Se mukáu ua kulumbila bhu muvu ua njubileu, ioso suilu i u ta eie, iene muene.

¹⁸ Maji, se ua u lumbila kiazubha kubhita muvu ua njubileu, nganga-phe a u somale mu kitadi ku thanduʼa mivu ioso iaxiala-ku katé bhuijila o njubileu iamukuâ, a tunune-ku kia tokala o suilu iê.

¹⁹ Maji o ua lumbila mukáu kiki, o kiela ngi u kula, a fute o suilu ioso iii, a tudike-ku dingi o mbandu ia katanu ku suilu, kuabu, mukáu uê a u tambule kiá.

²⁰ Se-phe nʼa kambe ku u kula, hé a u sumbisa kuengi, kuabhu, ka u kule dingi, uendelela kiá muene.

²¹ O bhu njubileu-phe, ki jituka mukau iú, ukala kiá mukáu uolumbile kua Jihova, mukáu ukôla, oko a mu bhane-u luelu; mukáu ió uatokala Jihova u di bhanga kiá uangene ua nganga.

²² Se bhu kala muthu, o mukáu ua sumbu, anga u u lumbila Jihova, o uene ki ua tokala ku undundu uê,

²³ nganga-phe a u bhange o konda ia suilu iê, tunde bhua u lumbila katé bhu njubileu; o mu kizuua kienhokio-phe o suilu ia mukáu iú ioso ia u xinda, ikale kiá iangene ia Jihova, kuma ikôla.

²⁴ O bhu muvu-phe ua njubileu, mukáu iú uvutukile kua ió uoso mukua mukáu uê, ua u sumbixileʼó, kuma mukáu ua undundu uê.

²⁵ Suilu iê ioso-phe uenda ni ku i katula ku xikulu ia dibhezelu, ku lumbu lua Jihova; xikulu ioio ipezala makuinhi aiadi a ʼjêla.

²⁶ Maji ki bhu kale muthu ulumbila phande-kumbi ia kibhaku kua Jihova, mukonda mona uoso ua kibhaku ujikula divumu dia mamʼâ, ió uangene kiá ua Jihova; né ngombe, né hombo mba mbudi, ioio iangene kiá ia Jihova.

²⁷ O kiʼkala-phe kibhaku kia kixitu kia musalanganda a ki kule, kioso ki kiate kala ki u ki tongolola eie, anga uta-ku dingi o mbandu imoxi ia katanu; se ka ki kula, a ki sumbisa mu pelesu ioso ia ki xindila.

Sai ima ia lumbila Nzambi ki iene ni kidikulu kiê

²⁸ Sumbala kiene, maji o kima kia kilumbu, kia kulumbidila-ku, kia katula muthu nʼa ki bhana kua Jihova, kixi muthu mba kibhaku, kixi mukáu ua batula ku undundu uê, ki kiatokala ku ki sumbisa, né ku ki kula; kima kioso kia lumbila Jihova kiki, kima kikôla kinéne.

²⁹ Ima ioso muthu ia lumbila kiki kua Jihova, né muthu, kana ku mu kula dingi; kikale a mu jibha muene.

O madijimu mba o tukuinhi tua Nzambi

³⁰ Tukuinhi tuoso muene tua mábhia, ni ku idima ni ku ibundu ioso ia miẋi, tua ngene tua Jihova; tuê-Muene, kuma ima iê, ikôla.

³¹ Se-phe bhu kala muhtu usola kukula kima ku tukuinhi tuê, (o madijimu mê), o kiazubha kufuta o suilu, a tudike-ku dingi mbandu ia katanu ku suilu.

³² Ki tu tanga-phe o tukuinhi ku ibhaku ia jingombe ni jimbudi, ni ibhaku ioso kiá ia seia ni mbangala ia mubidi, mu ku i kondala, o kakuinhi koso muene katokala ku díjimu diangene dia Jihova.

³³ Kana kutungula kianete ni kiabhele, kiauabha ni kiaiibha, kana ue ku ki tolokala; uoso uteza ku ki tolokala, ua-nda kuila-phe, ni kiadianga ni kia toloko iene ioso a mu bua-iu phala Jihova, kuma ikôla kiá; katena dingi ku i kula, mbata ikôla kiá kua Jihova.

³⁴ Jene o jingongʼiji ja bhana Jihova kua Mozé, phala anʼa Izalaiele, ku mulundu ua Sinai.