Ijila 26 - O Mikanda Ikola

Kubheza iteka a ku fudisa

¹ Kana, ki mu di iudikile mahamba, ki mu dʼimikine iteka ia kusonga mba jipholela, o mʼoxi ienu ue ki mu xikike-mu fikula ia ditadi, phala kuenda ni ku i fukamena; mbata Eme-eme ngi Jihova Nzambi ienu.

² Endenu ni kualuka o jisabhalu jami; o kididi kiami kia dibhezelu mu ki xila jinga; eme ngi Jihova.

O mabesá ejiia mu kutumaka

³ Se mukuata kuendela mu jingonge jami, ni mu aluke o ijiia iami, anga muenda ni ku i bhanga,

⁴ eme-phe ue ngenda ni ku mi bhana mvula ienu bhu thembu iê ia tokala; o ixi ienda ni kutubhula muene ima ia ubhe, o ku mikáu miẋi ia kuphapha ue ilukula muene ibundu.

⁵ O idima ioso i mu bhongolola, o ki mu zubha ku i vunda, muʼila muene o diê anga mu bhiẋila na-iu bhu tembu ia kubhongolola dingi o idima ia mukuá; O mbutu joso ji mu muna mu mábhia, ji bhiẋila muene bhu kudinji bhu tembu ia kukuna dingi o mbutu ja mukuá. O kúdia kuene, mua-nda kudia jinga, anga mu ikuta ni kúdia kua nzungule; mu tunga mu soma mʼoxi ienu.

⁶ Ngi mi bhana ue o ku di bhola ku mátui, anga mu zeka kilu kiambote u mi sasumuisa ka moneka; o iama ioso i mi talesa o hadi, ngi i zumbula ku mbandu joso; mʼoxi ienu ue ki mu tena kubhita xibhata.

⁷ Nguma jenu mu ji bhesa muene lusolo, anga jenda ni kulalumuka ku xibhata ienu.

⁸ O kitanu mudienu, kia kà kaiesa hama ia jinguma; o ki mu kala mu háma, mu kaiesa kuinhi dia midi; o jinguma jenu enda ni kulalumuka ku xibhata ienu.

⁹ Enu-phe ngi mi sakukila muene kuma mesu ami ngi a ta kokuenu, anga ngi mi bhana o ku di vuala, hé ngi mi sokolola muene, anga ngi kolesa o kikutu kiami nʼenu.

¹⁰ O ku ima i mua lunda ukulu kuene ku mu dia katé kia mi kumu, anga mu kubhinganesa iòbhe iòkulu mu i texe bhobho, muexi iatumbuluka kiá.

¹¹ Eme ue Balaka iami ngiza-na-iu muʼaxaxi kenu, o muenhu uami ki uẋikina dingi ku di kuma nʼenu.

¹² Anga ngi kuata kuzungila muʼaxaxe kenu, Eme ngi kala ngi Nzambi ienu, enu ue mu ngi kala mu mundu uami.

¹³ Eme-muene-ze ngi Jihova Nzambi ienu, nga mi katula kʼoxi ia akua-Ijitu, phala ki mu kale mu abhika a-ene; o ʼphapha ja ophi ia kexile bhu xingu ienu nga ji bukujula, eme nga mi bhetula phala mu ende kiambote o nzánza.

O kastiku ka kuxibhaka

¹⁴ Maji-phe, enu se nguenu ku ngʼivua, se nguenu kuila o ijiia ioso iii mu i bhanga,

¹⁵ o jingonge jami se mua ji te dikunda, o mabatuilu mami mua di kumu-nâ, anga mu fula o ku kumbidila ijiia iami ioso, phala ku ngi seluila o kikutu kiami,

¹⁶ kuabhu, Eme-phe ue nga-nda ku mʼila kiki; Ngi mi tuluila lenga-suama, ngiia ni uhaxi ua thulu, ni ua munza u bhinga o kuila ujikinisa o mesu, o muenhu uenu uia ni kohoha; o ki mu kuna mbutu, ki mi kala hadi ia ngoho, kuma jinguma ji mi dia-iu.

¹⁷ Pholo iami i mi kitukila, anga kisuéia ki mi buibua kuma nguma ja kà mi kuama; oso a mi zembe a kʼènda ni ku mi vua anga a kituka ngana jenu, anga mua kʼènda ni kulenga-lengenu ngó u mi kaia ka moneka.

¹⁸ O ki mu bhita ni ima kala iii, se hanji mua ẋinuka, nguenu ku nʼgivua, kuabhu-phe, Eme uami ngi mi oseka kiá muene ni ku mi bhana kibetu, o kibetuʼiki ngi ki bandekeza lusambuadi, mukonda dia ituxi ienu.

¹⁹ Kuma uzonda uenu ngi u sokomona, phala o izala i muala na-iu i mi bhue; diulu dienu dila ngé, felu mukuá, oxi ienu ue iila kala ngòndo.

²⁰ Nguzu ienu ienda ni kudibota mu kingoho. Oxi ienu ki ibhana dingi o ima iê iambote, o miẋi i mu phapha ku mavu iseluka, kubhana ibundu, lémbue.

²¹ O ki muila-phe mua jijila muene o ku di thathamesa nʼEme, o ku ngʼivua nguenu, ngi mi solomuena kiá mabhebhu makala lusambuadi dingi mu kubhinjika, kala kioso kiafuama mu ituxi ienu.

²² Mbata nga-nda ku mi thubhuila kiá iama ia mukáu anga ienda ni ku mi dia o tuana, nda mu subhukile; ibhaku ue enda ni ku mi solala-iu kuala iama anga i mi tununa mu xala mu athu òfele ngó; o ikoka ienu anga ibatukila ki i mono muthu u bhita-mu.

²³ O ku thandu dia ima iosuʼiii, se ki mua ẋikina ku ngʼivua, anga mu lémbua ku ngi zukama ni ngi mi bhangulule, maji hanji mua ẋinuka,

²⁴ eme uami ngi di ta-mu dingi, hé ngi mi bhana sambuadi dia kibetu kia tundu akuâ, mbebhu o ituxi ienu.

²⁵ Oko kuthandu dienu ngi bheka-ku kiá xibhata, iene anga i mi bhanga-kiu mu kuvutula o phonzo ia kikutu ki tua tedienu-di; anga ngi mi phopha muene kiambote hé ngi mi tula mu jisanzala jenu; kiene kiua ki ngi mi tumikisa o dibhebhu mu kaẋi kenu, anga ngi mi bhakula ue bhu maku a jinguma.

²⁶ O kioso eme ki nga-nda ku mi sondolola o huta ia kúdia, bhuala-phe o kuinhi dia muhatu mbolo iâ a i kangela forno iâ imoxi, anga i bhinga ku i uanena ku pezo; bhenhobho-phe o ki mudia ki muikuta.

²⁷ O ki muila-phe hanji mua ẋinukenunu, o ku ngʼivua nguenu,

²⁸ Eme uami ngi ẋinukina-ku kiá muene, mu ku mi bhanga kiaiibha; anga ngi mi beta dingi mu lusambuadi lua tundu akuâ, kingumba o ituxi ienu.

²⁹ Mukonda mua-nda kúdia kiá o xitu ia anʼenu a mala ni xitu ia anʼenu a ahatu, anga mu i ẋakuta muene.

³⁰ O jikalatódio jenu ngi ji lundumuna, o jiphiladi jenu ji mua tela o dikumbi, ngi ji muanga-muanga; o imbi ienu ngi i lumala kuthandu dia imbi ia jinzambi jenu; ni muenhu uami uene ki ua-nda ku mʼinda dingi.

³¹ O jisanzala jenu nga kà ji sengulula, o ididi ienu ia kubhezela nga kà i solala, o dizumba dinuha kiamboteʼokio di mu ngi tela Eme, ki nga kà di suua dingi.

³² Oxi ngi i jikinisa, katé ni jinguma jenu joso ja kà mi bhingana mu ku tunga-mu ja kà di uana-kiu muene.

³³ Enu anga ngi mi muangena muʼaxaxi ka akua jixi jengi, hé ngi mi fomuena o xibhata, ni ngi mi mono bhu muia; oxi ienu i xala kilômbo ngùndu, o madiembu menu a jikinina muene taka-tàka.

³⁴ Kienhokio-phe, mu izuua ioso ia kumuangana kuê anga muila muene lolô, kiene kiua oxi ki ia-ndo kala ni kutana mu jisabhalu jê, enu-phe mua kà zumbukila kiá kʼoxi ia jinguma jenu, kienhokio-phe kiene kiua oxi ki i kala ni dinhohenu diê, anga ikuata kutulumba mu jisabhalu jê.

³⁵ Mukonda mu izuua iê ioso ia kusenguluka kuê itambula dinhohenu; kuma iene ialembuele kunhoha mu ʼsabhalu jenu, kioso ki mua kexile-mu enu.

³⁶ O ió-phe oso hanji asubhuka-ku momuenu, ngi a tuika uoma uonéne mu miẋima iâ, ubhinga kuila o mʼoxi ia jinguma jâ muala, katé ni dife diala kulokosa ni kitembu, dienhidi dia a bhesa ue lusolo; anga a kà kuata muene kulenga kala ala kulenga xibhata; a kà di vunda-vunda bhoxi, sé ngó muthu uala ku a landameka.

³⁷ O bhua kambe muthu uala ku a landameka, ene aia jinga ngó ni ku di lumala íbua kulu dia akuá, ufika-phe uixi kua a tula xibhata ia kisuéia; ki mua kà tena-phe ku di fikidila bhu pholo ia jinguma jenu.

³⁸ Mua kà buikila muʼaxaxi ka matumbu, oxi ia jinguma jenu ia kà mi jikinisa hé mu jima o mbutu.

³⁹ Akuenu oso asubhúka-ku, kikote kia kà a hohesa mu jixi joso ja jinguma jenu, kia kà banza o ituxi iâ, o kia ta-ku o dibuaha dia ikuma ia jitata jâ, muthu iu bhele ngohʼú.

⁴⁰ Bhenhobho a kà di ẋikina ufusa uoso, ni uâ ene, ni ua jitata jâ, ni itondalu iâ ioso ia ngi tondalela-na-iu Eme; ni kia ngi balukila jinga mu uendelu uâ.

⁴¹ Eme uami, mu kuenda-nâ ene, nga a balukila jinga ʼte ki nga a tande mʼoxi ia jinguma jâ; bhenhobho-phe se o muxima uâ ua dibôlo u di tululula, anga o kibetuʼiki kia ikuma iâ a di ẋikina na-kiu, kuamba kia a fuama,

⁴² Eme-phe ue nga kà vutula dingi o thulu, ku kikutu ki nga tele ni Jakobo, ni kiná ki nga tele ni Izake, ni ku kikutu ki nga tele ni Mbalahamu, bhenhobho nga kà lembalala ue oxi.

⁴³ Kuma oxi ia di kuata mukondo iaxala umba, iii ia di bhange ngùndu, ia kà kuata dingi kutana mu jisabhalu jê, kuma a i sengulula mukonda dia ene; ene-phe àkela: Né! Ngana ualungué, ua tu bhe-kiu, mukonda jiphangu jami a ji tele dikunda, o muenhu uâ ua di kumine ni jingonge jami.

⁴⁴ O kia di té-ku, né-mbé-phe hanji kuene kua di texilʼoko, mʼoxi ia jinguma jâ muala, Eme ue ki ngi tena ku a ẋimbuka, ki ngi tena ku di kuma-nâ, anga ene oso ngʼa jimisa o mbutu, hé ngi selula o kikutu kiami ki nga tele ni ene, mukonda Eme-muene ngi Jihova Nzambi iâ.

⁴⁵ Sembele ngʼa kuatela henda, anga ngi lembalala o kikutu ki nga tele ni adiʼâ, u nga tundixile kʼoxi ia Ijito, o ifuẋi ku mbandu ni mbandu ia a ki muene mesu, ngixi phala ngi kale ngi Nzambi iâ; Eme Jihova.

⁴⁶ Jiji jene o jingongʼiji, ni mabatuilu, ni itumu ia bhana Jihova, ia ku di tuma na-iu bhu kaẋi kê-Muene ni anʼa Izalaiele, ua i bhela ku mulundu ua Sinai, ku lukuaku lua Mozé kuene kua i bhela.