Ijila 25 - O Mikanda Ikola

Muvu ua Dinhohenu

¹ Jihova uambela dingi Mozé mu mulundu ua Sinai, uixi:

² Tangela anʼa Izalaiele u a ambela, kuma: Kioso ki mu bokona mʼoxi i nga-nda ku mi bhana, oxi ienda ue ni kualuka o sabhalu iê kua Jihova.

³ Oxi u i dima katé mu mivu isamanu, díbhia dié dia mivide u di sonzola mu mivu isamanu, anga u muna kioso ki dia bhana.

⁴ O mu muvu ua kasambuadi-phe bhu kale kiá sabhalu ia kunhohesa oxi, sabhalu phala Jihova; kivuza kié kana ku ki dima, mba usonzuela o díbhia dié dia mivide.

⁵ O ngolôngo ioso ia di sabhukila mʼóbhia dié kana ku i muna, ni jiuva joso jʼima ku mivide ié, kioso ki u kamba o ku i sonzolʼeki, kana ku ji kanza; muvu uosololo ukale ua kunhohesa mavu.

⁶ Isabhukila ia sabhalu kala kiki kene ku i muna, kikale u i huka phale kudila ngó nzala, nʼeie, ni selevende ié ia diiala ni ia muhatu, ni mukalakadi ué ua kizuua, ni nzuangiza uoso uatungu-nê.

⁷ Kuene ue ku di dikila o ibhaku ié, ni iama ioso ia mukáu iala mʼoxi ié, huta iâ ikala ku ibundu ioso ienhiʼii.

Muvu ua Njubileu

⁸ Ukondala jinga ue sambuadi dia jisemana ja mivu, kifua sambuadi dia masambuadi ma mivu; kifua-phe o izuua ia sambuadi dia jisemana ja mivu i ku kale makuinhi auana nʼivua dia mivu.

⁹ Bhenhobho-phe kiá, o bhu mbeji ia sambuadi, mu kuila iabhiẋila mu kizuua kia kuinhi, ka xikise-phe kiá o koloneta ia njubileu; koloneta iii mu i xikisa mʼoxi ienu ioso bhu kizuua kia kiamenga.

¹⁰ Muvu ua makuinhi-a-tanu kolêsa-u, anga mu kola o ufuôlo phala akuaʼxi oso-lolo a tunga-mu; u mi kale muvu ua njubileu, muthu ni muthu alukile mu mikáu ia undûndu uê, muthu ni muthu ue alukile ku familia iê.

¹¹ Muvu ua makuinhi a tanu u mi kale ua njubileu; ki mu kune kima, mba mu muna-mu ue kima kioso-kioso kia di sabhukila, katé ni muvide uoso ua dʼimina sè ku u sonzuela, ki mu u kanze phala uenji.

¹² Oko bhuala kiá muvu ua njubileu, muvu-phe ua njubileu mu u kita muvu ukôla; isabhukila iaʼxi iene i muenda ni kúdia.

¹³ O bhu muvu uenhú ua njubileu muthu ni muthu alukile ku mikáu iê ia mu tokala.

¹⁴ Se mu sumbisa kima kioso-kioso kua mukuenu, mba mu sumba kima kioso-ioso ku lukuaku lua mukuenu, ki bhu kale-phe muthu u tatesa mukuâ mu kuta uenji.

¹⁵ Ki u sumba kima kua mukuenu ubhanga konda ia mivu ioso iabhiti kiá tunde ku njubileu; o muene kia ku sumbisa kima ubhanga ue konda ia mivu ioso iaxiala-ku hanji ia kubhongolola, bhene bhu tunda o suilu.

¹⁶ Mivu iaxiala-ku, se hanji iavulu, tudika-phe o suilu; o kʼikala mivu iòfele kiá iaxiala-ku, suilu-phe tununa-iu; mbata uenji muene u ku bhela-u ku suilu ia mivu ioso iaxiala-ku hanji ia kubhongolola.

¹⁷ Kana kufumba mukuenu ku uenji; inda u kala jinga ni uoma ua Nzambi ié; kuma ki ngalʼeki Eme-muene ngi Jihova Nzambi ié.

¹⁸ Endenu ni kualuka o jingonge jami, o mabatuilu mami lundenu na-u mu miẋima ienu, muende ni ku a bhanga; kienhiki kia-nda ku mi bhangesa kutunga ni kusoma mu ixi mu muala.

¹⁹ Ni oxi iene ue ia-nda kubhana o ibundu iê, mua-nda kudia jinga anga muikuta, anga mu di hola muene ku mátui mu tunga mu soma.

²⁰ O ki muila-phe: O kiki ku muvu ua sambuadi tua kà dia-hi? Oko ki tua-nda ku u dima, ki tua-nda ku u muna idima ietu?

²¹ Kuabhu-phe Eme nga-nda ku mi tumikisa o dibesá diami ku muvu ua kasamanu, anga oxi ikuata kuima ibundu katé mu mivu itatu ia muvimba, sé kulalumuka.

²² O mu muvu ua kanake mu dima hé mu kuna jimbutu, maji hanji o kúdia kuenu kutunda ku kolieta iokulu, katé ki mua kà tula ku muvu ua kávua; o uenhú ue, se ki mua u munu luua kima katé bhuoso bhu mua kà bhongoluela o idima, mudia hanji muene ku idima iokulu.

O kudikula kua mukáu, ni kua mavu ni jinzu

²³ Kana kusumbisa mavu anga mendelela ku maku ma ngenji ua ma sumbu, mbata oxiʼii ixi iami-Eme ia ngi tokala; enu muala mu asonhi ngó mueza kutunga nʼEme, mu jinzuángiza.

²⁴ Kala kiki, oxi ioso-phe i nga-nda ku mi bhana o ku ivua, muenda jinga ni ku i muena o kidikulu kiê.

²⁵ Se phangʼié uadiama ua mu bokona, anga ku ixi iê ubatula-ku dikaẋi, uixi, mukuetu, sumba-ze, kienhokio-phe bhu kale uoso mukua ku i kuia, uoso ndandu iê, a kule oxi ia sumbisa phangʼiê.

²⁶ O kʼikala-phe muene ka moneka ndandu u tena ku i kula, kabasa o lukuaku luê-muène se ku pholo lua lende kioso kiasoko o ku i kula,

²⁷ kuabhu-phe, a bhange ngó o konda ia mivu i ia mu sedivila tunde bhuoso bhua i sumba, o thembu ia xiala-ku a mu bhinganesene-iu kiá, kitadi; mu kubhanga kiki-phe mikáu iê a i tambule kiá i vutukile bhu maku mê.

²⁸ O kia lémbua-phe kukuata kioso kiasoko phala ku i kula, kiene kimoxi, oxi iaxiala ku maku ma ngenji muene ua i sumbu katé bhu muvu ua njubileu; maji o bhu njubileu oxi ijituke kiá i vutukile kua ngana iê mukuaʼxi.

²⁹ Muthu-phe, se ua sumbisa inzo iê ia dibhata mua kutunga, mu diembu diòkondoluese kimbaka, a tutumbe, phala mu kaẋi ka muvu a i kule; xi, kuma kioso kiia ni kulunduka o muvu, muene uala ni disesa dia ku i kula, utena hanji ku i kula.

³⁰ Maji, se muvu uoso ua di bhuila, sé ngó ku i kula, kuabhu, inzo ioio ki ia-nda kuẋikina dingi ku i kula, ixialela kiá ni ió uoso ua i sumbu, miiji iê iende muene ni kuxialelana-iu, oko onzo iala mu diembu, diòkondoluese kimbaka; né kueza njubileu, ki i tena kujituka.

³¹ Maji o jinzo jala mu jisanzala ji kamba o imbaka ikondoloka, kiene kia uenji ua mikáu kiene ue; jikale ni kidikulu kiê, o bhu njubileu ue ji jituka.

³² O kʼikala jinzo ja jilevita mu mabhata moso ma atokala ene, o ió jinzo jâ jikala muene ni disesa diâ dia dixiala katé ku hádia ni hádia dia kuenda ni ku ji kula.

³³ O ki ki kala-phe mukua-Levi uengi ua i kula iu ua xialelana-iu, kiene ue kimoxi ni inzo iòsumbe, ni diembu diene dia undundu uê, iene ioso i tambula ufolo bhu thembu ia njubileu; mbata o jinzo ja madiembu ma jilevita uene o undundu uâ muʼaxaxe ka anʼa Izalaiele.

³⁴ Inda o mukáu uala ku mbalelu ia madiembu mâ, kana ku u sumbisa, mbata ua di bhanga ubhinganu uâ ua miáka.

O ngonge ia jingadiama

³⁵ Se phangʼié uabudika ni uadiama, o jinguzu ue ja mu bhu, eie mu tambule-phe konda, a kale nʼeie mukua ni nzuángiza ua tundu dikanga, kifua mutungani.

³⁶ Kana ku mu tambula avásu, ku sote ue ku di bhangela umoni ku mukutu uê-muene; inda kala ni uoma ua Nzambi ié, phale phangʼié ukadié-nê bhuamoxi.

³⁷ O ki u mu dievelesa o kitadi kié, kana ku mu xindila avasu; se u mu bhana kúdia, ku ki bhangele ndunge ioso-ioso.

³⁸ Eme-muene Jihova Nzambi ienu, nga mi tundisa kʼoxi ia Ijitu, mbé o ku mi bhana oxi ia Kanana, nda ngi kale ngi Nzambi ienu.

O ngonge ia abhika

³⁹ Se u mona kuila phangʼiê uatungu-nê bhuamoxi uabiluka ngadiama ia ngadiádia, anga muene uiza mʼudiumba kokué, uixi ngi sumbeʼami, eie-phe kana kumu bhikisa ni kikalakalu ki bhanga o mubhika.

⁴⁰ Mu bhanga kala ngunza ueza ku nganhu ia kizuua, u tunga-nê mbàmbe ni ngenji-a-thumba; ende ni ku ku kalakela katé ki bhiẋila o muvu ua njubileu;

⁴¹ kuabhu, mu ambule kiá, ni muene ni anʼê, ku kikalakalu kié a tunde-ku kiá aie ku ndandu jâ, a vutukile ku kimbu kia jitata jê.

⁴² Mukonda ene ala abhikʼami-Eme, kuma nga a jituna kʼoxi ia Ijitu; ki kiẋikina-phe ku a sumbisa kala kia sumbisa abhika a kabhikolo.

⁴³ O ki u mu vua ku mu tunde thulu, ku mu minhise dizu ni mahaxi, Nzambi ié mu kuatele uoma.

⁴⁴ Mubhika ua diiala mba ua muhatu, se ua mu bhindamena mu sumbe-phe ku miji iengi ia akua-fola, ió a mi kondoka,ʼó; o kua ene kuene ku mu sumba jinga abhika a mala ni a ahatu.

⁴⁵ Sai bhabha ue mu a sumba jinga ku anʼa jinzuángiza oso eza ku nhunganena muʼaxaxe kenu; ni kua ene ni ku miiji iâ ioso iàtunga nʼenu, oso a a vualela mʼoxi ienu, muende ni ku a vua a kale umvama uenu.

⁴⁶ Mu a vua muene, o ki muila mua-nda kufuenu kiá, axialele undundu ua anʼenu, a a tambule mu ubhinganu; akale muene abhika a kabhikolo; maji-phe o jiphange jenu, o anʼa Izalaiele, phange ni phange, kana ku di minhisa dizu ni mahaxi.

⁴⁷ Se bhu kala nzuángiza, mba ngenji-a-thumba, mua tunga-nê bhuamoxi, muenhú anga uta mbende ni kiphaka, o phangʼié, uadiama ua mu kuata, hé uiza kudiumba kua nzuángiza muenhú, mba kua ngenji-a-thumba, mua tunnga-nê bhuamoxi, mba u di sumbisa ku mbutu ia nzuángiza muenhú,

⁴⁸ o kia zubha ku di ta uenji, bhu kale-phe phangu ia ku mu kula, bhu kale muthu ku jipphange jê a mu kule.

⁴⁹ A mu kule lemba diê, mba monʼa lemba diê a mu kule; mba-phe muthu umoxi ku adiê, mba ndandu iê uoso-uoso ku kunda dia família iê, a mu kule; o kiʼkala-phe muene uala ni bhua nomona, a di kule-phe muene.

⁵⁰ Ngana iê ua mu sumbuʼó a bhange-nê jikonda, tunde bhu muvu uoso ua mu sumbu katé ku muvu ua njubileu, a sokese konda ia mivu ni suilu ia kitadi kia mu sumbile; suilu-phe itunde ku nganhu iatokala o kufuta o ngunza mukua-nganhu ia kizuua, anga ukala-nê kienhiki.

⁵¹ O mu bhanga o jikonda-phe, se hanji kuaxiala mivu iavulu, mu ku di kula kuê akuate-phe kitadi kiasoko ni mivuʼ ienhoio a ki vutuile o ngenji ua mu sumbile.

⁵² O ki ila-phe mivu iófele ngó ia kambele-ku kiá, kiene ue kimoxi; a i bhange o konda katé bhu njubileu, nda a i bhinganese ni kitadi, mu ku di kula kuê.

⁵³ Thembu ioso-phe ia bhanga-nê, muvu ni muvu, ikala mukuá ni muthu uejile ku nganhu ia kizuua; maji eie-phe ku ki ehele kuila mukuenu aia ni ku mu talesa hadi iavulu kuala o muthu uengi bhu mesuʼé.

⁵⁴ Maji-phe, se ku di kula ualémbua, a kinge, nda a di tundidié kiá bhu njubileu, ni muene ni anʼê bhuamoxi.

⁵⁵ Mbata anʼa Izalaiele a ngi kala ene abhikʼami-Eme; ene ala abhika ami muene, kuma nga a jituna kʼoxi ia Ijito; Eme-muène ngi Jihova Nzambi ienu.