Ijila 23 - O Mikanda Ikola

O Jifesa ja tokala

¹ Kienhókio Jihova uambela dingi Mozé, uixi:

² Tangela anʼa Izalaiele, u a ambela, uixi: O izokola ia Jihova, ki mu iongeka jinga, ikale ionge ikôla. Munono-phe ua izokola iami, iú:

O sabhalu

³ Ikalakalu ia tokala izuua isamanu, maji o kia sambuadi kikale jinge sabhalu ia dinhohenu, kionge kikôla; ki bhu kale midimu ia kima; ikale sabhulu iangene ia Jihova, ku madiembu menu moso-lolo.

⁴ Iene-phe o izokola ia Jihova kiabhuʼiii, o ionge ikôla, muenda ni ku i ongeka bhu thembu iê ioso ia i xinda.

O Phasu

⁵ Bhu mbeji iadianga, mu kuila iatenesa kiá kuinhi dia izuua nʼiuana, mu ngoloxi ienhoio, iene o Phasu ia Jihova kiá.

⁶ O ki kúkia mu kizuua kia kuinhi ni tanu, Fesa-phe ia jimbolo ja kambe felemendu kua Jihova; mu dia jimbolo ja kambe felemendu katé mu sambuadi dia izuua.

⁷ Mu kizuua kiadianga mu kala ni kionge kikôla; ki bhu kale kututumba ni midimu iengi ioso-ioso.

⁸ Maji mu sambuadi dioso dia izuua muenda ni kubhana ma-ujitu ma kubhakula ni túbhia kua Jihova; o mu kizuua kia sambuadi, mu kala dingi ni kionge kikôla; ki bhu kale kubhanga kikalakalu kiengi kioso-kioso.

Ibundu ia kutomona (samba-tènde)

⁹ Jihova uambela dingi Mozé, uixi:

¹⁰ Anʼa Izalaiele a tangele, u a ambela, uixi: O ki mua kà zubha kukutuka mʼoxi, i nga-nda ku mi bhana, kioso ki mua kà muna ku idima iê, katulenu-ku kita kimoxi kia mutômo ku idima ioso i mua-nda kutomona, mu ki bheka kua nganga,

¹¹ muene-phe a bhuke o kita kiki bhu pholo ia Jihova, phala Jihova a mi xikine;

¹² nganga u ki bhukila mu kizuua kia kuila sabhalu mazá kiá iabhiti. O mu kizuua kiene kia bhukila o kita kiókio mu kuata ue kambudi ka ndumbe, kala kiá mu kitala kia muvu, ka kambe dibaka, mu ka bhane mu sata ia kubhakula ni túbhia kua Jihova.

¹³ O musa ua ujitu uê, tu-inda tuiadi tua fuba iafina, iôlunge ni maji, phala sata ia kubhakula ni túbhia, ikale dizumba dinuha kiambote kua Jihova, kuie dingi tusòla tutatu tua vinhu, ene-phe o maluvu a kúnua.

¹⁴ Ki mu die-ku-phe luua mbolo, mba masa ma kuoha, mba mafelesuku, mu kinga katé mu kizuua ki mu bheka ujitu kua Nzambi ienu; kijila kiki kixalela katé ku miji ienu, mu madiembu menu moso-lolo.

O Pendekoxe

¹⁵ Tunde-phe kiá mu kizuua kia kaiela ku sabhalu iii, kizuua ki mua bhukila o kita kia mutômo ua ibundu ia samba-tènde, matekenu kiá kukondala; mu bhitisa sambuadi dia jisemana jamuvimba.

¹⁶ O kizuua ki kaiela ku sabhalu ia sambuadi, mua tenesa makuinhi atanu a kizuua; kienhokio-phe bhakulenu dingi mubhaku ua musa kua Jihova.

¹⁷ Enu-oso kiá ku madiembu menu mubheka jimbolo jiiadi ji kale ja kubhukila; ji soke tu-inda tuiadi tua fuba iafina, anga a ji kanga ni felemendu; jene-phe o mutômo ua Jihova.

¹⁸ Mu ji bhakula kumoxi ni sambuadi dia tumbudi tua jindumbe, tua kambe kisemu, tua kuata kiá muvu umoxi, ni ngalote ia ngombe, ni ilumbe iiadi ia jimbudi; iene ioso ikale sata ia kuoha phala Jihova, ni mubhaku uê ua musa, ni maluvu mê ma kúnua, ibhite ku ujitu ua kubhakula ni túbhia, kuma dizumba diambote kua Jihova.

¹⁹ Mu bhakula ue kisutu kimoxi ku kiamenga kia kituxi, ni tumbudi tuiadi ku sata ibhekela kutululuka kiambote.

²⁰ O nganga-phe a ji bhukile kuma sata ia kubhukila bhu pholo ia Jihova kumoxi ni jimbolo ja mutômo, ni tumbudi tuiadiʼoto; iii-phe iene o ima ikolʼiii ia Jihova phala o nganga.

²¹ Mu kizuua kienhokio-phe mu xika ngonge kuamba tua-nda kukala ni kionge kikôla ki bhu kale midimu ia kima kioso-kioso; kiki kijila kixialela katé ku miiji ienu, mu madiembu menu moso-lolo.

²² O kioso ki mua kà muna ue o mábhia menu mʼoxi ienu, kana kumuna katé mu jithungi ja ikombolo ia milenga ienu, o mítue ia masa moso mabhiti ni kusonojoka eie ku a bonge dingi. Ehela-u kiá o ngadiama ni nzuangiza; Eme-muène ngi Jihova Nzambi ienu.

O muvu uobhe

²³ Jihova anga uambela Mozé, uixi:

²⁴ Anʼa Izalaiele a tangele, uixi: Bhu mbeji ia kasambuadi, mu kizuua kiê kiadianga, mu kala ni dinhohenu dia dikota, bhu kala muene kuxika jikoloneta, mu di sakese hanji ni ngalasa, bhu kale kionge kikôla.

²⁵ Ki bhu kale kututumba ni kikalakalu kioso-kioso, inda mu bheka-bhu ujitu ua kubhakula ni túbhia kua Jihova.

Kizuua kia kiamenga

²⁶ Jihova anga uambela dingi Mozé, uixi:

²⁷ Maji o mbeji iene ia kasambuadiʼoio, mu kizuua kiê kia kuinhi, kiene-phe kikala kizuua kia kiamenga; mu kala ni kionge kikôla, anga mu jila; mu bhana-phe ujitu ua kubhakula ni tuíbhia kua Jihova.

²⁸ Mu kizuua kienhókio ki mu bhange kikalakalu kioso-kioso, mbata kiene o kizuua kia kiamenga, nʼa mi bhangela o kiamenga bhu pholo ia Jihova Nzambi ienu.

²⁹ Kuma, se bhu kala muthu, bhu kizuua kiókio, ukamba ku di huha, a mu katula muene mu kifuẋi kiê.

³⁰ Se bhu kala ue muthu, anga bhu kizuua kiókio u bhanga sedivisu ioso-ioso, muthu ió Eme ngi mu jima mbutu muʼaxaxe ka povo iê.

³¹ Bhu kizuuʼokio ki mu bhange-bhu kikalakalu; kijila kiki kixialela muene ku miiji ienu mu madiembu menu moso-lolo.

³² I mi kale sabhalu ia kunhohena; bhene-phe kiá bhu mu di huhila o mienhu ienu; muandekela mu ngoloxi ia kizuua kia kávua ku mbeji ienhoio anga mu zubhila mu ngoloxi iamukuâ iakaiela-ku, sabhalu ienu muà i imununa muene.

O Fesa ia Jifundu

³³ Jihova anga uambela Mozé, uixi:

³⁴ Anʼa Izalaiele a tangele kuamba: O mbeji ia sambuadi ienhoio, se iala kiá mu kuinhiu dia izuua nʼitanu, bhu kale kiá o fesa ia jifundu kua Jihova mu sambuadi dia izuua.

³⁵ Mu kizuua kia kuandekela bhu kala kionge kikôla; ki bhu kala-phe kututumba ni midimu ia kima.

³⁶ Sambuadi dioso dia izuua di mi bhuila muene ni kibhakula jisata ja kuoha kua Jihova; mu kizuua kia kanake bhu kala kionge kikôla, mu bhela-bhu ue ma-ujitu ma kubhakula ni túbhia kua Jihova; kizuua kienhiki ki kale kia ujitu, ki bhu kale-phe kututumba ni midimu ia kima.

³⁷ Jiji jene o jifesa ja Jihova, ji tokala o ku ji kasela ionge ikôla, anga mu ji bhelama-ujitu ma kubhakula ni túbhia kua Jihova, ni jisata ja kuoha, ni mibhaku ia musa, mu bhana jisata, maluvu, kima ni kima mu ki bhanga kala kia fuama ni kizuua kiê.

³⁸ Ku ima iii o jisabhalu ja Jihova ja di kalela, o ma-ujitu menu ue ma di kalela, ima ienu ia kufuta o hasa joso ji mua te ia di kalela, o ma-ujitu menu ma ku di fikixila, ma kubhana Jihova, ma di kalela ue.

³⁹ Maji-phe, mu kizuua kiene kià kuinhi ni itanu ku mbeji ia kasambuadi, kioso ki mua-nda kuila o ibundu iaʼxi ienu ioso mua i bhongolola kiá, mu bhanga kiá o fesa ia Jihova mu sambuadi dia izuua; mu kizuua kia dianga ni mu kizuua kia kanake, mu kala ni dinhohenu dienu dikola.

⁴⁰ O mu kizuua kia kuandekela, mu katula ibundu ia miẋi ioso iakembeʼoio, ni isalale ia maie, ni jithangu ja isasa iabuingita iii ia di zandela kiambote, ni misalakelu ia jihonga; anga mu kemba ni kusanguluka bhu pholo ia Jihova Nzambi ienu mu sambuadi dia izuua.

⁴¹ Muenda jinga ni kubhanga fesa ienhiʼii kua Jihova, kadia muvu sambuadi dia izuua; ki kale kiá kijila kixialela mu miiji ienu ioso; mu ki bhanga jinga bhu mbeji ia sambuadi.

⁴² Mu tunga jifundu ja miẋi, muene mu mu kala mu sambuadi dia izuua; akua-bhata oso a a vualela mu Izalaiele akale mu jifundu;

⁴³ phala miiji ienu ioso ʼende ni ku kʼijiia kiambote kuamba, kioso ki nga katula anʼa Izalaiele ku Ijitu, nga a bhangesele kunakina mu jifundu; Eme-muène Jihova Nzambi ienu.

⁴⁴ Kienhiki Mozé kiambela anʼa Izalaiele kuamba, o jifesa ja tokala Jihova, kiene ki ji kala jingʼiki.