Ijila 20 - O Mikanda Ikola

Kioso kia kaxtikala ua te o mulonga

¹ Jihova anga uambela dingi Mozé, uixi:

² Luamukuá anʼa Izalaiele a tangele, kuila: Muthu uoso, ku anʼa Izalaiele, mba ku jinzuángiza oso ene kunhunganena mua Izalaiele, uoso ubhakula monʼê mu sata ku dihamba dia Mulôko, afue muene, sé phata; athu oso atungu-nê, a tokala mʼoxiʼomo, ene muene a mu bûba ni matadi.

³ Eme uami muthu íó ngi di lulama-nê o pholo mu kuzoka-nê anga ngi mu mona bhu-aia, katé ki nga-nda ku mu batula mu kifuẋi kiê; mukonda ua katula ku mbutu iê iu ua bhakuila Mulôko; mu kubhanga kiki-phe, uakasanesa o dibhezelu diami dikola, iu ua sebulula o dijina diami diangene.

⁴ O kʼikala-phe o mundu uatungu-nê ki kia a kuatela kima muene kia bhakula monʼê kua Mulôko, a kolokʼâ, nguâ ku mu jibha,

⁵ kiene-phe kimoxi, Eme-muène kiá ngi dilunga-nê pholo, anga ngi zoka-nê ni muene ni dibhata diê, katé ki ngi mu batula o muenhu muʼaxaxe ka povo iê, kumoxi ni ió oso kiá a di tele mu undumbu ua ku mu fikisa muene, mu kuxingidisa Mulôko.

⁶ O ki bhu kala ue muthu u bilukila mu ku ta muxima ku akua-ithutha ia kuzambula ni kubhanga, iphata, nʼende ni ku a kaiela ene, Eme-phe ngi mu ta diesu katé ki ngi mu batula muʼaxaxe ka povo iê.

⁷ Uila kiki, dizelesienu mu kale mu athu akôla, ki mu moneka kikuma, mbata Eme Jihova Nzambi ienu.

⁸ O jingonge jami endenu ni ku ji bhaka, mu ji bhange; kabasa Eme-muene Jihova, ngi tena ku mi zelesa.

⁹ Se bhu kala muthu u xinga tatʼâ, mba mamʼâ, a fue muene, sé phata; kuma ua lebhula tatʼâ, mba ua lebhula mamʼá; o manhinga mê a soke-nâ-u ku thandu diê.

¹⁰ Se bhu kala ue diiala u ta phanda ni mukaj ʼangene, mukajʼa mukuá nʼa te-nê phanda, ni habu ia diiala, ni ndumbu ia muhatu a fue muene, sé phata.

¹¹ Se bhu kala diiala u zeka muhatuʼangeneʼa phaiiʼâ, ua vungununa-phe o mukutu ua phaiiʼâ; kiiadi kiâ a fue muene, sé phata; o manhinga mâ a soke-nâ ku thandu diâ.

¹² Kiene ue kimoxi, se bhu kala diiala u zeka ni mukajiʼa monʼê; a fue muene kiiadi kiâ, sé phata; kuma a bhange kavuanza; o manhinga mâ a soke-nâ ene ku thandu diâ.

¹³ O ki bhu kala ue muthu uzeka diiala ni mukuâ, nʼa mu bhange kala muhatu, kiiadi kiâ abhange mutûta; kiókio kikôla! a fue-phe muene, sé phata. O manhinga mâ a soke-nâ ene kuthandu diâ.

¹⁴ Se bhu kala diiala u sakana o mona, anga u ta-bhu dingi o mama iene, o ioio phekalu; ni muene ni ahatu ió, mu a oha mu túbhia; mua kaie o phekalu muʼaxaxi kenu.

¹⁵ Se bhu kala ue diiala u zeka ni kibhaku, a fue muene, sé phata; o kibhaku ue jibhenu-kiu.

¹⁶ Se bhu kala muhatu u setuka ku kibhaku, phala ku di bhanga-na-kiu jindunji, jibha muhatu ni kibhaku bhuamoxi; kiiadi kiâ a fue muene, sé phata; o manhinga mâ a soke-nâ ene kuthandu diâ.

¹⁷ O ki bhu kala diiala u di bonga ni phangʼiê ia muhatu, a mu vuala kuala tatʼâ, mba a mu vuala kuala mamʼâ, anga ela o diiala ua vungununa tuẋi ia muhatu, o muhatu ua vungununa tuẋi ia diiala, o kiókio-phe kikôla kuma abhange kilaua; kala kiki mu a jibhila muene bhu pholo ia akuâ oso a a vuala-na mu kifuẋi kiâ; diialʼodio kuma ua vungununa mukutu ua phangʼiê ia muhatu, phekalu iê utala-na-iu hadi, o kikuma kiê uiana-kiu ku thandu diê.

¹⁸ Se bhu kala diiala u zeka ni muhatu uala mu kihaẋi anga u mu vungununa o tuẋi, nʼa mu tongolola kizanga kiê, o muhatu iú anga u tukulula muene o kizanga kiê kia kihaẋi, kiiadi kiâ muene a batudienu o muenhu muʼaxaxi ka povo iâ.

¹⁹ Kana kuvungununa tuẋi ia muhatu, ua dibhange phangʼia mamʼenu, mba phangʼia tatenu, uoso ubhanga kiki uazula ndandu iê ia muambeʼa kidi; kikuma kiâ aia na-kiu ku thandu diâ.

²⁰ Se bhu kala ue diiala u zeka ni mukajiʼa lemba diê, ió uazula-phe lemba diê; kituxi kiâ enda-na-kiu kuthandu diâ o kia kà fua kà ka xia mona.

²¹ Se bhu kala diiala u sakana ni mukajiʼa phangʼiê, ió ufusa u a bhange, kuma uazula phangʼiê; enhá-phe ka kà kala ni ana.

²² Bhakenu o jingonge jami joso jenhiʼji ni mabatuilu mosoʼama ku miẋima ienu, muende ni ku ji bhanga, phala oxi iná ku ngala ku mi bheka, mu kutunga ni kusoma, enu uenu ki i mi luse.

²³ Kana kukuata kukaiela o ifua ia akuaʼxi u ngala ku kaiesa bhu pholo ienu nʼa mi bhue ku mesu, mbata o isunji ioso iii iene i a bhange; ʼKí kia ngi bhekela o ku di kuma-nâ.

²⁴ Maji Eme-phe nga mi ambela enu, ngixi: Mu bhingana oxi iâ-ene, i mi kale undundu uenu, ni ngi mi bhana-iu muene, phala mu iʼvue, oxi i zunzumuka lete ni uiki; kabasa eme Jihova Nzambi ienu, nga mi uanununa muʼaxaxe ka ifuẋi ku mundu.

²⁵ Muenda jinga ni kutungula o ibhaku iazele mu iii iaxidi, ni jinjila jaxidi mu jiji jazele, o kia kúdia muila kia kúdia; o kia musekanda muila kia musekanda; kana ku di xidisa o mienhu ienu mu kukuata kúdia ngó o iama ia kioso-kioso, mba jinjila, mba tubamba tuoso tu zanzala ni kudihuha o mala bhoxi; iene ioso iii enu nga mi longoʼio kiá ku i tungula ni mu di batuka na-iu, kuma misekanda.

²⁶ Ngi kexidienu mu athuʼami azele, mukonda Eme, Ngi Jihova, nga zela, kiene Eme ki nga mi tunguila mu ifuẋi ku mundu, phala mu kale mu athu ami.

²⁷ Se bhu kala diiala mba muhatu ukala ni nzumbi ia kuxingila kilundu kia ngômbo-a-nhange, mba kithutha kia kuzambula ni kubhanga iphata, athu ió a fié muene, sé phata; mu a bûba ni matadi; o manhinga mâ a soke-nâ ene kuthandu diâ.