Ijila 2 - O Mikanda Ikola

Mubhaku ua musa

¹ Se muthu u bhanga ujitu ua mubhaku ua musa kua Jihova, ujitu ué u kala ua fuba ia fina; u lunduluila-ku maji, u ta-ku ni uasu ua dizumba;

² anga u u bheka ku jinganga anʼa Alá; umoxi mudiâ anga u katula-ku dibhûbhu dia fuba ia fina, ni ku maji u katula-ku, ni uasu uê uene uoso ua dizumba. Ienhiʼii nganga anga u i ohela ku kalatódio, ujitu ua dilembalelu, ujitu ua kubhakula ni túbhia, ua dizumba diambote kua Jihova.

³ O ia subhuka-ku, kuma mubhaku ua musa, i kale kiá ia Alá ni anʼê; kuma kienhiki kima ki kôla kinéne ku jisata ja Jihova, ja kuoha ni túbhia.

⁴ O ki u bhanga ujitu ua mubhaku ua musa, uókange mu forno, ji kala; jimbolo ja kambe felemendu ja fuba iambote iolunge ni maji, ni jibolaxa ja kambe felemendu jʼokunge maji.

⁵ O ujitu-phe se u kala mubhaku ua musa ua kukanga bhu kienga, u kala ua fuba iambote ia fina ia kambe felemendu iólunge kiambote ni maji.

⁶ Jimbolo jê u ji bukujula, hé u lunduluila-ku maji; kifua mubhaku ua musa.

⁷ O ujitu ué se u kala mubhaku ua musa ua kukangula mʼombia ia mavu, u kale ue ua fuba iambote ia fina iólunge kiambote ni maji.

⁸ Mubhaku ua musa uóiudike ni ima ienhiʼii, uene u u bheka kua Jihova; hé u u bhana kua nganga, muene eze na-u bhu kalatódio.

⁹ Nganga anga u nomona ku mubhaku ua musa o dibhûbhu dia ujitu ua dilembalelu anga u u ohela ku kalatódio, ujitu ua kubhakula ni túbhia, ua dizumba diambote kua Jihova.

¹⁰ O ia subhuka-ku ku mubhaku ua musa, i kale kiá ia Alá ni anʼê; kuma kima kikôla kinéne ku jisata ja Jihova ja kuoha ni túbhia.

¹¹ Mubhaku uoso ua musa u mu bhakula kua Jihova, kana ku u lunga ni felemento; kuma né uiki, ka u ohela-ku ku kalatódio, mu sata ia kuoha ia Jihova.

¹² Se ku mubhaku ua ibundu ia kutomona, felemento ni uiki u kalê; maji mu kubhanga dizumba diambote kua Jihova ku kalatódio, kana.

¹³ Maujitu moso ma mubhaku ua musa, u ma tôua ni môngua; môngua ua kikutu kia Nzambi iê, ki u kambe dingi ku mubhaku ua musa; maujitu moso ma kubhakula kua Jihova, a a bheka ni môngua.

¹⁴ Ki uila u bheka mubhaku ua musa kua Jihova ua ibundu ia kutomona, u bheka masa a uisu a kuoha, mba ua jimbundu ja uisu jókange ku túbhia hé a ji zuka.

¹⁵ U lunduluila-ku maji, ni u tula-ku o uasu ua dizumba; uene o mubhaku ua musa.

¹⁶ Mu kienhiki, o Nganga-phe u katula-ku o dibhûbhu dia ujitu ua dilembalelu anga u di oha; uila ku jimbundu jókange ji józuke u katula-ku, ku maji u katula-ku, o isenso ia uasu ua dizumba iene ioso, u i oha; uene ujitu ua kubhakula ni túbhia kua Jihova.