Ijila 19 - O Mikanda Ikola

Bhituluilu dia jingonge jimoxi-mu

¹ Jihova iu ua tangela dingi Mozé, uixi:

² Ambela o kionge kioso kia anʼa Izalaiele, u a tangela kiki: Kibhinga muzela, mukonda Eme, ngi Jihova Nzambi ienu, ngazela.

³ Muthu ni muthu aẋile manhiʼâ, aẋile phaiiʼâ, ende ue ni kualuka o izuua iami ia jisabhalu; Eme-muene Jihova Nzambi ienu nga ki ambe.

⁴ Kana kulunga jipholo jenu ku mahamba, kana ku di ludikila jinzambi ja utadi ua kuzunza. Kuma Eme-eme ngi Jihova, Nzambi ienu.

⁵ O ki mu bhakula sata ia kusakidila kua Jihova, mu ki bhanga ni muxima, kikala kima kia vondadi ienu, phala Nzambi a mi ẋikine.

⁶ O satʼii, bhu kizuua kia ku i bhakula, mudia-ku, mu kizuua kia kadi ue, mudia-ku; maji ioso-phe isubhuka-ku mu kizuua kia katatu, jikatesenu-iu mu túbhia.

⁷ Se-phe mudia-ku dingi kama mu kizuua kia katatuʼiki, lufuku-phe kiabhuʼolo; ujitu ka u ẋikina dingi.

⁸ Ni muene ue uoso udia kiókio, ua bhalumuna mulonga, kikuma kiê ue-nda na-kiu, mbata o kukola kua Jihova ua ku sebulula; mukonda dia kienhiki, muenhó a kà mu batula muʼaxaxi ka povo iê.

⁹ O ki mu muna ue mábhia menu mʼoxi ienu, kana kumuna katé mu jithungi ja ikombolo mua suku o díbhia, mua zubha-mu; o masa a bhiti ni kusonojoka mu kumuna, eie ue ku ma bonge dingi.

¹⁰ Kiene ue kimoxi, kana kuangulula o mulenga ué ua mivide katé mua-bhu; kana ue kubonga o jimbundu joso jabhiti ni kusonojoka; ehela-ju o ngadiama ni nzuángiza ua tundu dikanga; Eme-muène Jihova Nzambi ié.

¹¹ Ki mu nhane jinge, ki muende ni kuta makutu, ki muende ni ku di dingila mudienu ni ku di bhanga phulu muthu ni mukuâ.

¹² Ki mu loke jinge mu dijina diami, bhua kambe o kidi, mbata o dijina dia Nzambi ienu-phe mu di sekalesa; Eme-muène Jihova.

¹³ Mukuenu kana ku mu bhondeleka, mba uenda ni ku mu nhana imbamba iê; o futu ia ngunza, kana ku i bhaka ni ikala nʼeie katé mungu ki kúkia mu kimene.

¹⁴ Kana kulebhula muthu uafu o mátui, mba o kifuôfuo u mu tela kidibhukanu mu njila; maji uenda ni kuxila jinga Jihova Nzambi ié. Eme ngi Ngana.

¹⁵ Kana kufundisa ni mangonha; o ki mu fundisa kana kuzamena ngadiama, mba kusuua muthu uonéne; mukuenu mu batuile mulonga uê kala kia fuama mu kidi.

¹⁶ Kana kukala u kitoka kia jimbuémbue muʼaxaxi ka akuenu; kana kusota kujimisa o muenhu ua mukuenu; Eme-muène Jihova.

¹⁷ Mukuenu ku mu bhakele unguma ku muxima; inda ku fule ku mu bazela, se ua mu mono kutondala; kima kiaiibha ki ua mono kua mukuenu ku di xibhe na-kiu.

¹⁸ Kana kuvutula phonzo ku muthu, o anʼa akuaʼxi ié kana ku a bhakela njinda; maji mukuenu u mu zola kala ki ua di zola eʼmuene; Eme-muène Jihova.

¹⁹ O jingonge jami lundenu-ju muene; kana kuehela ibhaku ienu ku di bunda-bunda ngó, mu kuila o kiki kibhaku kiengi, o kiná ue kibhaku kiengi; kana ue kukuata mbutu jiiadi ja idima nʼu ji kune bhuamoxi mʼóbhia dié; kana ue kuzuata izuatu ia thanga ia kuvudisa idifua.

²⁰ Se bhu kala muthu uzeka muhatu a mu sumbisa ku ubhika, o muene kua tundu uala kiá ni diiala diê a sakana-nê, maji ka mu kula luua mba ngó ku mu bhana ufolo ni ku mu eha, kala kiene mu kubhanga bhu muvu ua, njubileu, kuabhu-phe jindumbu jene jiiadi ni diiala ni muhatu mu a bhana kibetu; maji ki mu a jibhe, kuma ió o mubhika, ka mu kula luua.

²¹ O mu kiamenga kia ku di jima o kuêla kuê, a kuate kilumbe kia mbudi, eze na-kiu kua Jihova, bhu muelu ua Balaka ia kutakanena,

²² o nganga-phe a tambule kilumbe kiókio kia kiamenga kia kuela, a luulule na-kiu Jihova bhu kaẋi ni ió uate o kituxi; phala o kituxi kiê kiate, kibhue, a mu loloke-kiu.

²³ O ki mua-nda zubha ku kutuka mu ixi ia polomesa, anga mu pha-pha-mu o miẋi ioso i mua tena kudima phala kúdia, o ki ikuata kuima, ki i kale luua ia kúdia; iime hanji ni ku di lalumukina ngó katé mu mivu itatu; ki mu die-ku luua.

²⁴ O mu muvu ua kauana-phe ibundu iê ioso ikale iangene, ia tokala mubhaku ua Jihova, ua kutanesena Nzambi, ua diximanu diê.

²⁵ O mu muvu ua tanu, dienu-phe kiá ku ibundu iê; oxi-phe ia-nda ku mi bhana kuima kuanzungule; Eme-muène Jihova Nzambi ienu.

²⁶ Ki bhu kale kima ki mudia ni manhinga mê; kana kukaiela imbanda mba mu kuata kuia ni kuzambula,

²⁷ Kana kubhuta kindemba kienu, mu kubhanga mútue kala dilola, o bhulu kindumba; kana ue kubatula muezu bhu phapha ia ditui.

²⁸ Kana ue ku di sema jiphoko ku mukutu mu kijimbuete kia kuila ua fundu; kana ue ku di ta jifuma ni jimbumba. Eme-muène ngi Jihova.

²⁹ Monʼé ua muhatu kana ku mu bongesa lusebu mu ku mu bhangesa ku kituka ndumbu; phala oxi ioso ki i sekale ni undumbu, anga oxi ioso izala ni jihabhu ejidila kubhanga ituxi.

³⁰ O jisabhalu jami endenu ni ku ji aiuka, ẋilenu o kibuta kiami kia dibhezelu; Eme-muène Jihova.

³¹ Kana kukaiela imbanda akua-kusuma; kana kulandula akua-ithutha ia kuzambula ni kubhanga iphata; kana ku a kolomona, kuma muavula ku di kasanesa-nâ; Eme Jihova Nzambi ienu.

³² Ki u mona mukua-jimvi, mu balumukine; o muadiakimi uasunga-ku kiá, u mu jingisa; Nzambi ié mu xile jinge: Eme-muene Jihova.

³³ Muthu ua tundu dikanga se u tunga nʼeie mʼoxi ienu, kana ku mu tatesa.

³⁴ Ki kala mukuaʼxi, kiene ue kikala o múlungi ua-lu nhunganena muʼaxaxi kenu; mu zole, kala ki ua di zola eie-muène, kaẋi enu uenu muakexe mu jinzuángiza mʼoxi ia Ijitu; Eme-muène Ngi Jihova Nzambi ienu.

³⁵ Kana kubhanga mangonha mu kubatula milonga, mba ku nzongo ia muẋi, mba ku pézo, ni ku kitutu kia kuzongela.

³⁶ Jipezu ji ku uabhe, matadi ma kupezalela ma ku uabhe, efa i ku uabhe, o hine ue i ku uabhe; Kuma Eme-muène Ngi Jihova Nzambi ienu, nga mi katula kʼoxi ia Ijito.

³⁷ Alukenu o jingonge jami joso, ni mabatuilu mami moso, muende ni kukumbidila o ijiia iami ioso, kala ki nga mi ambela; Eme-muène Jihova.