Ijila 18 - O Mikanda Ikola

Kukasana kua milonga ni isunji

¹ Jihova anga uambela dingi Mozé, uixi:

² Zuelesa anʼa Izalaiele, u a tangele, kuma: Eme-muène ngi Jihova dia Nzambi ienu.

³ Enu ki mu fikise o imbamba ibhanga akua Ijito, ku muakexe; kana ue kufikisa o imbamba ibhanga akua Kanana, ku mua lungu, ku nga-nda ku mi tula; o jingonge jâ ki jene ji muenda ni kukaiela.

⁴ Enu muenda ni kubhanga ioso iala mu mabatuilu mami, o jingonge jami jene ji mu lunda ku miẋima ienu, muie jinge ni kuendela mu jingonge jami; mbata Eme Jihova Nzambi ienu.

⁵ Kala kiki o jingonge jami ni mabatuilu mami bhakenu-u; kuma enhó mu ku a bhanga muthu u kola muenhu; Eme Jihova nga ki ambe.

⁶ Ki bhu kale muthu u sungila ni muhatu a mu vuala-nê xitu imoxi, phala nʼa mu vungununa o mukutu uê; Eme-muène ngi Jihova.

⁷ Kana kuvungununa mukutu ua tatʼenu ni ua mamʼenu; Kuma mamʼenu, mamʼenu, eie kana ku mu tala o tuẋi iê.

⁸ Mukajiʼa tatʼenu eie kana ku mu vungununa o tuẋi iê; se ua mu tale o tuẋi iê, tatʼenu ua mu tale.

⁹ Pangʼié ia muhatu, akale monʼa tatʼenu, akale monʼa mamʼenu, né a mu vualela mʼonzo ienu muene, mba a mu vualela kuengi, eie kana ku mu vungununa o tuẋi iê.

¹⁰ Muhatu ua tundu mu mala dia monʼé ua diiala, mba ua tundu mu mala dia monʼé ua muhatu, eie kana ku mu zakula; eie-muène ua di zakulʼé, kuma o tuẋi ií eiʼmuène i ua mono.

¹¹ O muhatu, monʼa mukajiʼa tatʼenu, a mu vuala kuala tatʼenu, ku mu zakule nʼu mu mono o tuẋi iê.

¹² O muhatu, tiia ié, phageʼa tatʼenu, kana ku mu zakula; xinganeka-ze, kuila ió a mu vuala ni tatʼenu, ndandu ia tatʼenu.

¹³ O muhatu, phangʼia mamʼenu, eie kana ku mu zakula nʼu mu mono tuẋi iê; kuma muene a mu vuala ni manhienu, ndandu ia manhienu.

¹⁴ O diiala tiio ié, phangʼia phaienu, ku mu vungununa o tuẋi iê; o muhatuʼa sekuluʼé kana ku mu bhiẋila phala ku mu zeka ió tiia ié.

¹⁵ Mukajiʼa mona eie ku mu vungunune o tuẋi iê; o ió muhatuʼa monʼé; eie kana ku mu zakula nʼu mu mono o tuẋi iê.

¹⁶ O tuẋi ia mukajiʼa phangʼié eie kana ku i ijiia; o mukutu-ze ua phangʼié ia diiala u ua mono.

¹⁷ O tuẋi ia muhatu ni monʼê eie kana ku i ijiia; hé uia ni ku a zakula ni uidi o mama ua muijiia tuẋi, o mona ue dingi hé u muijiia; kana ue kuila o ki uasakana o mama, uta-ku ni muláula, a mu vuala kuala monʼê ua diiala, mba a mu vuala kuala monʼê ua muhatu; kiókio se uala ku ki bhanga, u mukua-phekalu, kuma ene ala jindandu muene ja di zukama kidi; kikôla-phe!

¹⁸ Kana kubhanga hongo ia phange jiiadi, mukaji ʼé ua mu tatesa, o ku mu ta ku muinha umoxi ni phangʼiê muene, eie anga uijiia o tuẋi ia dikota ni ia ndenge kioso kiala hanji ku muenhu.

Isangela ia isunji

¹⁹ Se muhatu uakuphala, iu ua di kalela, kana ku mu bhiẋila, phala ku mu vungununa ni u muijiia o tuẋi iê mu izua ia kukuphala kuê.

²⁰ Mukajiʼa mukuenu kana kuzeka-nê mu kuta phanda, koko ku di bhekela dise.

²¹ Kana kukatula muhatu ku mbutu ia tundu momuʼé phala ku mu bhakula ku sata ia lubhandu lua dihamba dia Mulôko; Kikôla! Kiókio kuselula dijina dia Nzambi ié. Eme Jihova.

²² Kana kuzeka diiala ni mukuenu, kala muhatu; kiókio kisunji kiaiibha.

²³ Kana ku di sakana ni kibhaku, anga u di kasanesa na-kiu, ki ku sekalesa; ki bhu kale ue muhatu u di bheka ku kibhaku ni ki mu zeka; koko kavuanza.

²⁴ Ki bhu kale kima ku iima iii ki mi sekalesa; kuma o ifuẋi i ngala kukaiesa bhu pholo ienu nʼa mi bhue ku mesu, o ima ioso ienhiʼii iene ia di sekalesa na-iu.

²⁵ Kiene kia sekalela oxi; Eme ue o kituxi kia kusekala kua oxʼiii hádia ngi kʼibhula, oxi-phe hé ia kà lusa oso a tungu-mu.

²⁶ Enu-phe mu aiuka o jingonge jami ni mabatuilu mami, o isunji i kala kiki ki mu i bhange jinge, né akua-bhata, né o jinzuangiza jala kunhunganena mu kaẋi kenu.

²⁷ Kuma o isunji ioso ienhiʼii, iene ia bhanga jinga kuala athu akua-xi ienhiʼii a mi diangelele kutunga-mu; oxi iii ia tambula lufuku, ia sekala.

²⁸ Enu dilangienu-phe sumba enu uenu ixi i mi lusa, kuila mua i fukuila, kala ki ia lusu o athu a mi diangelele kukala-mu.

²⁹ Mbata athu oso a bhanga ima ia isunji kala iii, athu ió a kà a batula nʼa jime o mbutu mu kifuẋi kiâ.

³⁰ Uila kiki, alukenu ki nga mi tendelelʼiki, mu fule kubhanga o ijiia ia isunji kala ia bhanga jinga ene kioso enu kiluua ngó muiza. Kana-phe ku di kasanesa na-iu; kuma Eme-muène ngi Jihova Nzambi ienu.