Ijila 17 - O Mikanda Ikola

O manhinga ma ibhaku ioso ma tokala ku ma bheka bhu muelu ua balaka

¹ Jihova anga uambela dingi Mozé, uixi:

² Tangela Alá ni anʼê a mala ni ana oso a Izalaiele, u a ambela kuila: Kizuelu kia tumina Jihova kienhiki, kuma:

³ Muthu uoso mu dibhata dia Izalaiele u jibha ngombe, mba mbudi, mba hombo bhu kibanguʼabha, mba u i jibhila ku kanga dia kibangu,

⁴ anga ufula ku ji bheka bhu muelu ua Balaka, phala kubhakula sata kua Jihova, bhu pholo kiki ia balaka, muthu ió manhinga ma mu kale mulonga; kuma ua bhubhisa manhinga; mukonda dia mulonga uenhú, a kà mu batula mu kionge kia kifuẋi kiê.

⁵ Mu ki bhanga phala anʼa Izalaiele, jisata jene kuenda ni kusatela ngó mu mukáu, ende ni ku ji bheka kua Jihova, bhu muelu ua Balaka ia kutakanena, kua nganga, a ji bhakule kuma jisata ja paze, kua Jihova.

⁶ O nganga-phe ua kà sangela manhinga ku kalatódio ka Jihova, bhu muelu ua balaka ia kutakanena, o banha a i ximika mu bhakula dizumba di nuha kiambote kua Jihova.

⁷ Ki bhua kàle dingi kuila ene abhakula jisata jâ ku madimonho, ene mu kulandukila ni kubhanga-nâ o undûmbu; kienhiki kià kale kijila kiâ ki nangenena mu miji iâ ioso.

⁸ A tangele-phe kuila muthu uoso kiá mu diembu dia Izalaiele, mba ku jinzuangiza jala kunhunganena muʼaxaxi kenu, uoso u bhakula ujitu ua kubhana ni túbhia kua Jihova, mba sata,

⁹ se ka i bheka bhu muelu ua Balaka ia kutakanena, phala ku i bhakula kua Jihova, muthu ió a mu batule mu kifuẋi kiê.

Kúdia o manhinga kikôla

¹⁰ Muthu uoso ue mu dibhata dia Izalaiele, mba ku jinzuangiza jene kunhunganena muʼaxaxi kâ, udia manhinga, muthu ió ngi mu mona bhu aia, katé ki ngi mu batula mu kifuẋi kiê.

¹¹ Mbata muenhu ua xitu uala mu manhinga; kiene ki nga mi bhela-u ku thanduʼa kalatódio mu ku mi jimuina ikuma, mienhu ienu phala ibhanduluke; mukonda o manhinga ene ngoho a tena kubhanga kiamenga ki zelesa o mienhu ia athu.

¹² Kala kiki, nga ki ambe muene kua anʼa Izalaiele kuila: Ki bhua kàle muthu mudienu u dia manhinga; nzuángiza ue uoso unhunganena muʼaxaxi kenu ka diê manhinga.

¹³ Luamukuâ ue, o uoso-uoso mu anʼa Izalaiele, mba mu jinzuangiza joso jala kunhunganena momuʼâ, anga uta unhanga ua xitu mba njila ioso i tokala ku idia, manhinga mê a ma bhubhisile bhoxi, nda a a vumbike ni mavu.

¹⁴ Mukonda o manhinga uene o muenhu ua xitu ioso-lolo; bhuoso bhuia manhinga bhuai muenhu; kiene-ze ki ngedila kua anʼa Izalaiele, ngixi: Kana kúdia manhinga ma kibhaku kioo-kioso, kuma o muenhu ua xitu ioso uene mu manhinga mê muenhomo; uoso-phe ue, u ma dia a kà mu jimisa o mbutu.

¹⁵ Muthu uoso ue kixi mukuaʼxi, kixi nzuángiza, se uedi udia xitu ia di fuila, mba a i sanujuna kuala o iama, a sukule-phe izuatu iê, muene ue a dʼiẋike mukutu ni muenha, kukasana kuê a kale na-ku kumbi dioso dia kambâmba, o ki bhiẋila ngoloxi-phe, kukasana kuê kuabhu kiua; kiene kiua kia kala ni kuzela.

¹⁶ Maji o izuatu iê kia kamba ku i sukula, ni muene kia kamba ku dʼiẋika ni menha, uala mu kikuma, o kikuma kiê uenda na-kiu kuthandu diê.