Ijila 16 - O Mikanda Ikola

Ubokuenu ua Alá mu dibhezelu

¹ Kuila ana kiiadi a mala a Alá afu kiá, Jihova uzuelesa Mozé kuma ene a bhele túbhia tuengi bhu pholo ia Jihova, anga afuila bhobho.

² Jihova phe uambela Mozé, uixi: Ambela phangʼié Alá: O mu dibhezelu, mu ʼxilu dia mvéuʼomo, ka kále mu bokona-bokona-mu ngó mu thembu joso, nʼa kala mu kuimana bhu pholo ia kibhuna kia kiadiʼokio, kiala kulu dia álaka ia umbangi phala kafue; mukonda Eme ngi tukulukila mu ifuke ku thanduʼa kibhuna kia kiadi.

³ Kiela ngi bokona-mu, a bokona ni ima iii: Ngalote ia ngombe ia kiubha, phala kiamenga kia kituxi, ni kilumbe kia mbudi, phala sata ia kubhakula ni túbhia kua Jihova.

⁴ A zuate túnika ikola ia linho, uta-phe jixilola ja linho, jene jidianga ku xitu iê, u di ẋiẋika ni phonda ia linho, anga uzuata kijinga kia linho; iii iene o izuatu ikola. Ki bhinga-phe, o mu i zakela, udianga kuiẋika o xitu iê ni menha.

⁵ O ku kionge kia anʼa Izalaiele utambula-ku isutu iiadi ia jihombo phala kiamenga kia kituxi, ni kilumbe kia mbundi phala o sata ia kubhakula ni túbhia kua Jihova.

⁶ Bhenhobho-phe Alá ubhakula hanji o ngalote iê ia kiamenga kia kituxi, ku mulonga uê-muène; nʼa di zelese hanji muene ni diembu diê.

⁷ Hé u tambula ue o isutu iiadi anga u i tudila Jihova bhu muelu ua balaka ia kutakanena.

⁸ Alá u ta muondona ku thanduʼa isutu iiadʼiii; u ta muondona phala Jihova, anga u ta muondona uamukuá phala o kisutu kioso kitokala o hombo-ia-muxídika.

⁹ Kisutu kioso kia buila o muondona ua Jihova, Alá u ki tambula kiá nʼa ki bhakule sata ku kiamenga kia kituxi.

¹⁰ Maji o kisutu kioso kia buila o muondona ua hombo-ia-muxídika, u ki bhakula ni muenhu uê kua Jihova, phala a bhange na-kiu o kiamenga, a ki ehele mu kikangalakata, phala kiie ni mukáu, kuma hombo-ia-muxídika.

O sata ia kubhela nganga iadikota muene

¹¹ Kienhókio Alá uiza kiá ni ngalote ia ujitu uê ua kiamenga kia kituxi, kia kubhela ku mulonga uê-muène, a bhanga kiamenga kia ku di zelesa muene ni diembu diê; o ngalote ia ujitu ua kiamenga kia kituxi kiê-muène, a i jibhe.

¹² A kuate ue o kiómuenu kiezala ni makala ma uama, matundu ku kalatódiko, kua Jihova, o bhu maku uvuota mabhubhu ma iadi ma uasu ua dizumba dinuha kiambote, uótuzale, a bokone-na-u mu ʼxilu dia mvéu.

¹³ A lalumuine o uasu ua dizumba bhu makala a túbhia, bhu pholo ia Jihova, phala o ifuke ia uasu ua dizumba ki ienda ni kutukumuka, ivungine o kibhuna kia kiadi, kiala ku thandu dia alaka ia umbangi phala i muene ka fue.

¹⁴ A katule ku manhinga ma ngalote, a bondeke-mu o mulembu uê, a sangele ku thanduʼa kibhuna kia kiadi ku mbandu ia mutundila-kumbi; u sangela manhinga mu lusambuadi ni mulembu uê ku pholo kiki ia diluuluilu.

O sata ia kubhela o kifuẋi kioso

¹⁵ Kienhokio kiene kiua kia jibha o kisutu kia kiamenga kia sata ia kubhela o povo ioso, o manhinga mê a ma bhele mu ʻxilu dia mvéu, kala kioso kia bhange ni manhinga ma ngaloteʼoio, kiene ue kia bhanga ni manhinga iá, anga u ma sangela ku kibhuna kia kiadi ni ku pholo kunu ia kibhuna kia kiadi, kiki.

¹⁶ Mu kubhanga kiki uazelesa Onzo iangene ia dibhezelu, mukonda dia ufusa ua anʼa Izalaiele, ni kulueza kuâ, ni ku ituxi iâ ioso. Kienhiki ue kiene kia bhanga jinga mu kuzelesa o balaka ia kutakanena iala mu nanga mu kilombo kiâ-ene, ni muʼaxaxi ka maufusa mâ.

¹⁷ Kioso-phe kia bokona kubhuisa ikuma mu dibhezelu diangene, mu balaka ia kutakanena ki mu kale muthu, katé muene kia tubhuka. Mu kiki-phe o nganga kuila uazubha kiá o ku di bhangela i muene o kiamenga kiê ni diembu diê, ni junda ioso ia Izalaiele.

¹⁸ A tunde-phe kiá, aie ue ku kalatódio, kala bhu plolo ia Jihova, anga u ka bhangela ue o kiamenga. Ukatula ku manhinga ma ngalote ni ku manhinga ma kisutu, anga u ma sangela ku jisungu ja kalatódio, kondoluese takane mu jimbandu jê joso.

¹⁹ Hé usangela dingi manhinga menhomo ku thanduʼa kalatódio lusambuadi ni mulembu uê, kifua ua kʼeẋika, nda kabhue o lufuku lua ufusa ua anʼa Izalaiele, anga u ka kindula kienhiki.

²⁰ O kia zubha-phe kukindula onzo iangene ia dibhezelu, ni balaka ia kutakanena, ni kalatódio, u sunga-phe kiá o kisutu kia hombo ia muenhu.

²¹ Anga Alá u tula maku mê maiadi ku thanduʼa mútue ua kisutu kia muenhu, kuene kua fisalela o ikuma ioso ia anʼa Izalaiele, ni itondalu iâ ioso, ni ituxi iâ ioso; anga u i lunjika ku thanduʼa mútue ua kisutuʼiki, anga u ki tumikisa mu kikangalakata, o muthu uoso uia-na-kiu, adianga ku mu kasa kiá.

²² Kienhiki o kisutu kiókio ki di tuika o ikuma iâ ioso, hé uia-naiu kʼoxi ia muendeʼubheka; anga o muthu iú ujituina o kisutuʼeki mu kikangalakata.

²³ Bhenhobho-phe Alá uvutukila kiua mu balaka ia kutakanena, anga uzula izuatu ia linho, ia zuatele kioso kia bokuene mu dibhezelu diangene, anga u i xa muenhomo.

²⁴ Anga uiẋika o mukutu uê ni menha mu kididi kiangenʼiki, anga uzuata kiua o izuatu iê; bhenhobho-phe u tunda nʼa iudika kiua o sata iê-muène ia kubhakula ni túbhia, kua Jihova, ni sata ia kubhakula ni túbhia ia kifuẋi, nʼa bhange kiamenga kia ku di kinduila muene ni ku kinduila o mundu.

²⁵ O banha ioso ia kiamenga kia kituxi u i jikatesa muene ku kalatódio.

²⁶ O muthu uoso uendele kuxinjikila o hombo-ia-muxídika, a sukule o izuatu iê, o muene ue a dʼiẋike ni menha; kiene kiua kia bokona bhu kibangu, mu kilômbo.

²⁷ Maji o ngalote ia kiamenga, ni kisutu kia kiamenga kia kituxi, ia zunzile o manhinga ele na-u mu bhanga o kiamenga mu dibhezelu diangene, aie na-iu ku maxilu ma kibangu; ni ibha ni xitu kiá ni ditobe diê, a i jikatesele kuenhoko mu túbhia.

²⁸ Uoso-phe ua i jikatesa, usukula izuatu iê, hé u dʼiẋika ni menha; kiene kiua kia bokona bhu kibangu.

Lumoxi ku muvu a bhitisa kizokola kia kudizelesa ku ituxi

²⁹ O kiki kijila ki xialela katé ku hádia; bhu mbeji ia sambuadi mu kizuua kia kakuinhi ku mbeje, huhenu o mienhu ienu, ikalakalu ehelenu-iu bhoxi enu-oso muene, ni akua-bhata, ni nzuangiza uoso ua tungu momuenu.

³⁰ Mbata mu kizuuʼokio mua-nda kubhua ituxi bhu pholo ia Jihova, kuma bhua-nda kukala o ku mi bhangela o kiamenga, phala ku mi zelesa ku ituxi ienu.

³¹ Ikale-phe sabhalu ia dinhohenu phala enu; mienhu ienu-phe kibhinga mu i nhohesa; kijila kiki ki xialela katé ku hádia.

³² O nganga ue uoso a-nda ku mu unda phala kukuata o ukunji ua unganga bhu kididi kia tatʼâ, mu kubhanga o dibhanduluilu dia kubhuisa ikuma kiki, uzuata o izuatu iii ia linho, o izuatu ikôla:

³³ anga ubhanga o kiamenga kia kuzelesa dibhezelu, uzelesa ue o Balaka ia Dibhongolokelu, ni kalatódio; kienhiki kiene ue kia zelesa kiua o jinganga ni kifuẋi kioso kiá.

³⁴ O kienhiki ki kale-phe kijila kienu ki nangenena muende ni ku bhanga jinga kiamenga kia kulàmba o ituxi ioso ia anʼa Izalaiele, ku muvu mu ki bhanga jinga lumoxi. Alá iú ua ki bhange kala kia tumine Jihova kua Mozé.