Ijila 15 - O Mikanda Ikola

O kukasana kua diiala

¹ Jihova anga uzuelesa dingi Mozé ni Alá, uixi;

² Ambelenu anʼa Izalaiele, mu a tangela, muexi: Uoso-uoso diiala, ubhita ni kibhubhe kia masu a uvuadi kibhubha ku xitu iê, mukonda dia kibhubhe kienhókio ua kasana-phe.

³ Kukasana kuê kua mu iza mukonda dia kibhubhe kiê; o kiela ku mukutu uê kutunda kibhubhe mba o kibhubhe ku mukutu uê ki batuka, kuenhuku-phe kuene o kukasana kuê.

⁴ Hama ioso bhu zekela o diiala di ala ni kibhubhe, ikasana ue; ima ioso muene ia bhita ni kuxikama, iakasana ue.

⁵ Muthu uoso u di bhiáuna ku hama iê, a sukule izuatu iê, o muene ue a zoue mu menha, anange ni kukasana katé mu ngoloxi.

⁶ O uoso ue uxikama bhu kibuta bhua xikamene o mukua kibhubhe, a sukule izuatu iê, a zoue ue mu menha, anange ni kukasana katé mu ngoloxi.

⁷ Uoso-phe ukuata ku mukutu ua diiala uala ni kibhubhe, a sukule izuatu iê, muene ue a zoue mu menha, anange kienhiki ni kukasana katé mu ngoloxi.

⁸ O uala ni kibhubhe-phe, se ua thuthuina mathe kua mukuá ua di zediê, o a mu te matheʼú asukule izuatu iê, muene ue a zoue mu menha, anange kienhiki ni kukasana katé mu ngoloxi.

⁹ O dikombola dioso ue dia mondalela ió u ala ni kibhubhe, dikasana ue.

¹⁰ Uoso ubabata kima kioso a ki bhadikila mu inama kua ió uala ni kibhubhe, unanga ni kukasana katé mu ngoloxi; uoso u ki ambata-phe, a sukule izuatu iê, muene ue a zoue ni menha, kuma uakasana, anange kienhiki ni kukasana katé mu ngoloxi.

¹¹ Uoso ue a mu babata kuala o muthu ió uala ni kibhubhe, o muene kua tundu maku ka tuama ku ma sukula ni menha, o a mu babatʼú a sukule izuatu iê, a zoue mu menha, a kasane kienhiki katé mu ngoloxi.

¹² O kitabhu phe kia utuma, kioso kióbabate kuala diiala di ala ni kibhubhe, a ki bule; maji hé kitutu kia muẋi, a ki sukule ngó ni menha.

¹³ Muthu iú-phe uala ni kibhubhe, se uazele kiá, kibhubhe kia mu bhu, o ku dʼiẋika kuê, bhu bhite sambuadi dia izuua, a sukule izuatu iê, muene ue a zoue mu menha ma hungulule; uazele-phe kiá.

¹⁴ O mu kizuua kia kanake a kuate tumembe tuiadi tua mukáu, mba tumembe tuiadi tua bhata, eze-na-tu bhu pholo ia Jihova, bhu muelu ua balaka ia kutakanena, a tu bhane kua nganga;

¹⁵ o nganga a mu bhele dimoxi ku kiamenga kia kituxi, o dia mukuâ phala sata ia kubhakula ni túbhia; mu kubhanga kiki-phe nganga u mu bhangela kiamenga kia kibhubhe kiê, bhu pholo ia Jihova.

¹⁶ Diiala ue, se uaiukula mbutu ia muenhu iatundu mu mukutu uê, mukutu uê uoso a u iẋike ni menha, a kale ni kukasana katé mu ngoloxi.

¹⁷ Kizuatu mba kibha kioso kia mbombena mbutu ia muenhu a ki sukule ni menha, ki nanga kienhiki ni kukasana katé mu ngoloxi.

O kukasana kua muhatu

¹⁸ Muhatu ue, uoso a zeka-nê kuala diiala anga u mu lukuila mbutu ia muenhu, kiiadi kiâ a di sukule muene ni menha, a nange kienhiki mu kukasana kuê katé mu ngoloxi.

¹⁹ Maji o muhatu kia kala ni kibhubhe, anga o kibhubhe kiê kikala kia manhinga ma xitu iê, a di kalele katé mu sambuadi dia izuua; uoso-phe u mu tula lukuaku, u kasana ue kumbi dioso dia kambàmba.

²⁰ Ni ima ioso i a zala bhua zeka, mu izuua ioso ia kala mu ijiia kiki, iene ioso ikasana ue; ima ioso ue ia xikama muene ikasana ue.

²¹ Uoso-uoso u di bhiáuna ku hama iê, a sukule izuatu iê, a zoue mu menha, a kasane kumbi dioso dia kambàmba katé mu ngoloxi.

²² Uoso ue ubabata kima, a ki xikamene kua muhatu iú, a sukule izuatu iê, muene ue a zoue mu menha, a kasane kumbi dioso dia kambàmba katé mu ngoloxi.

²³ Se a tula kima ku hama iê-muène, mba a ki tula ku kima bhua xikamene muene, uoso-phe u ki babata ua di kasanesa, u kala kienhiki ni kukasana katé ku ngoloxi.

²⁴ O ki bhu kala-phe diiala uzeka-nê, o lufuku lua manhinga mê anga lu mu tula ue muene, ió ua di kasanesa, aʼmbate ue kukasana kuê mu sambuadi dia izuua; o hama bhua zekela ikasana ue.

²⁵ O muhatu ue, kioso ki mu iza kibhubhe kia manhinga mê, anga ki mu bheka bhualebha, o izuua iene kubhanga mu ijiia iê anga u i somboka, hé ku di ta, kiene kimoxi, thembu ioso ia bhanga ni kizanga kiê, muthu uakasana, mukuá ni mu izuua iê iene kubhanga mu ijiia ie.

²⁶ Hama ioso ia zekela mu izuua ioso ia kibhubhe kiê, ikale mukuâ ni muanza uê kiene mu di kalela mu kukuphala kuê; ima ioso ia xikama muene ikasana ue, kala kiasoko o kukasana kuê-muène, kioso kiene mu di kalelʼiki.

²⁷ Uoso u di bhiáuna ku izalu iê, ua di kasanesa ue; ubhinga kusukula izuatu iê, ni ku dʼiẋika ni menha, anga ukasana kienhiki kumbi dioso dia kambamba katé ku ngoloxi.

²⁸ Se muhatu ió uadisanze kiá, bhu bhite dingi sambuadi dia izuua, kiene kiua kia sanzuka kiambote, ua zele kiua.

²⁹ O mu kizuua kia kanake akuate tumembe tuiadi tua mukáu mba tumembe tua bhata, a tu bheke kua nganga, bhu muelu ua balaka ia kutakanena.

³⁰ O nganga-phe a bhakule-bhu kamoxi, ku kiamenga kia kituxi, o kamukuâ ku sata ia kubhakula ni túbhia; kifua-phe nganga ua mu bhangela o kiamenga kia kibhubhe kiê bhu pholo ia Jihova.

³¹ Bhangenu jinga kienhiki, mu tungule anʼa Izalaiele, mbe o ufusa uâ u di kalele, ka bheke lufûku ku balaka iami iala momuâ, ni kiʼa bhekela kalunga.

³² Ienhiʼii, iene o ngonge iatokala uoso ubhita ni kibhubhe, ni uoso ubhubhisa o mbutu ia luvualu, anga i mu kasanesa;

³³ kiene kimoxi ni muhatu u kuphala, ni ió uoso ukata kifumbe, kixi diiala, mba muhatu, ni diiala uoso uzeka ni muhatu uakuphala: ngonge iâ ienhiʻii.