Ijila 14 - O Mikanda Ikola

Ngonge ia tokala mukua-dibhute, kioso kia zubha kuiluka; o ku di zelesa kua mukua dibhute

¹ Kienhókio Jihova anga uambela kiua Mozé ni Alá, uixi:

² Iii iene ikala o ngonge ia mukua-dibhute, mu kizuua kiê kia ku dʼiẋika; a mu bheke kua nganga,

³ o nganga-phe a tubhuke ku kanga dia kibangu, a tonginine o mukua-dibhute, o kia mu sanga dibhute dia mu-bhu muene,

⁴ nganga a tume kuila, o ió ua-nda kudizelesa, bhu kale o ku mu kuatela jinjila jiiadi ja muenhu, ku jinjila ja kúdia, ni muxi ua musédulu, ni ua kalumezí, ni ua hisopo.

⁵ Anga nganga u tuma phala akuatebhu njila imoxi, a i batule xingu, anga a i tula mʼombia ia mavu, iezala ni menha mambote ma hungulule,

⁶ anga u kuata njila ia mukuá iala ni muenhu, ni musedulu, ni kalumezí, ni hisopo, anga a bonda imiʼiii ni njila ia muenhu bhuamoxi mu manhinga ma njila iójibheʼoio, mu menha ma hungulule.

⁷ Anga a kuata kusangela ku thandu dia ió uoso ala ku mu ixika o dibhute, katé mu lusambuadi; muene a mu kole-phe kiá, kuamba, ueluka, o njila ia muenhuʼiii a i ehe kiá, nda i tuke iie ku mukáu.

⁸ O ió-phe uala ku dʼiẋika kiki, a sukule izuatu iê, a di konge ue kindemba kioso, a diʼiẋike ni menha; kuabhu-phe uazele kiua; o kia zubha kubhanga kiki a bokoniê kiá bhu kibangu, maji u bhanga hanji sambuadi dia izuua, ka bokona luua mu balaka iê.

⁹ Mu kizuua kia kasambuadi-phe u di konga dingi kindemba kiê kioso, ni mútue u u bhuta, ni muezu ni mikasu iê; sai ue ni kindemba kiê kia mukuá, a ki bhute ue; a sukule dingi izuatu iê, a zouese mukutu uê ni menha, ua zele ua zubha.

O ujitu ua mukua dibhute kia zubha ku di sanza ni ku di zelesa

¹⁰ O mu kizuua kia kanake, u kuata tumbudi tuiadi tua jindumbe, tua ka-mbe kisemu, ni kambudi kamoxi ka mukaji, sé ngó unema, tua muvu umoxi; ni mabhûbhu matatu ma fuba ia fina, phala kubhakula ujitu ua musa, o fuba-phe a i masana ni maji, ni ditijela dia maji.

¹¹ O nganga uoso ua-nda ku mu ixika anga u bhakula o muthu iú ni ima ioso iii kua Jihova, bhu muelu ua Balaka ia kutakanena.

¹² Nganga-phe anga u kuata-bhu kambudi kamoxi ka ndumbe, kene ka bhakula ku sata ia kuêla, kumoxi ni ditijela dia maji; anga u i bhukila phu pholo ia Jihova, iene o sata ia kubhukila.

¹³ Anga o kambudi u ka jibhila bhuoso bhuene kujibhila o sata ia kiamenga kia kusatela kituxi ni sata ia kubhakula ni túbhia, bhu kididi kikôla; mbata ni sata ia kiamenga kia tokala o kuêla ni sata ia tokala kituxi, iangenge ia nganga; kuma kima kikôla kinéne.

¹⁴ Nganga-phe u katula ku manhinga ma kiamenga kia kuêla, nganga anga u toma ku sungu ia dítui dia kadilu dia ió uoso ala ku mu zelesa, ni ku mulembu ua kikota ua lukuaku luê lua dilu, ni ku mulembu uê ua kikota ua kinama kia dilu.

¹⁵ Anga nganga u katula ue ku maji, u ma lunduluila bhu lukuaku luê-muène lua kiasu,

¹⁶ bhenhobho o nganga a bondeke mulembu uê ua dilu mu maji mala bhu lukuaku lua kiasu, a ma sangele ni mulembu uê lusambuadi bhu pholo ia Jihova.

¹⁷ O maji moso ma subhuka bhu lukuaku luê, nganga a ma tome ku dítui dia dilu dia ió uoso ala ku mu zelesa, ni ku mulembu ua kikota ua lukuaku luê lua dilu, ni ku mulembu uê ua kikota ua kinama kia dilu, kua bhitile kiá ni kutoma o manhinga ma kiamenga kia kuêla;

¹⁸ o maji moso ma subhuka hanji bhu lukuaku lua nganga, a ma te kiá mu mútue ua ió uoso ala ku mu zelesa; mu kubhanga kiki, nganga uala ku mu bhangela o kiamenga bhu pholo ia Jihova.

¹⁹ Bhenhobho nganga a bhange-bhu ue o sata ia kiamenga kia kituxi, mbé a bhange ue kiamenga kia kituxi kia ió uoso ala ku mu ixika o lufuku; kiene kiua kia jibha o sata ia kubhakula ni túbhia kua Jihova.

²⁰ Anga nganga u bhakula sata ia kubhana ni túbhia, ni ujitu ua musa bhu kalatódio; mu kiki, nganga uala ku mu bhangela kiamenga bhu pholo ia Jihova, nda a zediê kiá muene.

O ujitu ua ngadiama ua di zelesa kikunzu

²¹ Maji-phe o muthu ió kia kala ngadiama, kia kuata kuku ngé, kia kuata koko ngé, a kuate ngó kambuadi kamoxi ka ndumbe, a ka bhele o kiamenga kia kuêla, ni sata ia kubhukila, nda a mu bhangele kiamenga, ni dibhûbhu dimoxi dia fuba iafina, diòmasane ni mji, phala ujitu ua musa, a te-ku kasòla ka maji;

²² ni membe maiadi ma mukáu, mba kaphomba mba kadiembe kamoxi kabhite ku ʼki kiatena kukuata o lukuaku luê, kaphomba mba kadiembe kamoxi kabhite ku kiamenga kia kituxi, kaphomba mba kadiembe kamukuâ kaie ku sata ia kubhakula ni túbhia.

²³ O mu kizuua kia kanake mu ku dʼiẋika kuê, imʼei uiza-na-iu kua nganga bhu muelu ua Balaka ia kutakanena, bhu pholo ia Jihova.

²⁴ Nganga nʼa tambula kambudi ka kiamenga kia kuêla, ni kasòla ka maji, anga ubhuka imʼei bhu pholo ia Jihova, kuma ujitu ua kubhukila.

²⁵ Kiene kiua kia batula kambudi o xingu, o kambudi katokala kiamenga kia kuêla, anga nganga u katula manhinga, ku manhinga ma kiamenga kia kubhuisa o kuêla, anga utoma ku dítui dia dilu dia ió ala ku mu ixika, ni ku mulembu uê ua kikota ua lukuaku lua dilu, ni ku mulembu uê ua kikota ua kinama kia dilu.

²⁶ Anga o nganga u katula ku maji ue, u ma lunduluila bhu lukuaku luê-muène lua kiasu;

²⁷ bhenhobho nganga u bondeka mulembu uê ua dilu bhu majiʼama, hé u ma sangela mu lusambuadi kua Jihova.

²⁸ Nganga anga u katula dingi maji mʼala bhu lukuaku luê, nʼa tome ku sungu ia dítui dia ió ala ku mu ixika, ku dítui dia dilu, ni ku mulembu ua kikota ua lukuaku luê lua dilu, ni ku mulembu uê ua kikota ua kinama kia dilu; muoso mua bhiti kiá ni kutoma o manhinga ma kiamenga kia kuêla, muene.

²⁹ O maji moso ma subhuka bhu lukuaku lua nganga, a ma lunduluile mu mútue ua ió uoso ala ku mu ixika, mbé o ku mu bhangela kiamenga bhu pholo ia Jihova.

³⁰ Anga u bhakula ujitu, kadiembe kamoxi, mba kaphomba, kioso kiá kia lende o lukuaku luê.

³¹ O ku kioso kia lende o lukuaku luê, kuene kua katula kamoxi phala sata ia kiamenga kia kubhuisa kituxi, kamukuâ phala o sata ia kubhakula ni túbhia kua Jihova, kumoxi ni ujitu ua makudia; kienhiki o nganga kia kà iudika o kiamenga bhu kididi kia ió uoso ala ku mu ixika bhu pholo ia Jihova.

³² Iii iene o ngonge ia tokala uoso uabhiti ni uhaxi ua dibhute, maji o kieza mu nomona, ua lémbua bhua katuila, bhu kale-phe kia ngó koso katokala o ku mu iẋikila.

Ngonge ia tokala o dibhute ki di tula kʼonzo

³³ Jihova anga uambela dingi Mozé ni Alá, uixi:

³⁴ Kioso ki mu bhixila mʼoxi ia Kanana, i nga-nda ku mi bhana mu ubhingano, Eme anga ngi tuma dibhebho dia dibhute ku kuata ku inzo, mʼoxi i mua-nda kúvua;

³⁵ o mukuaʼnzuʼoio-phe, eze, a kʼijidise kua nganga, kuamba; Onzo nga i mono-ze kaia ia ngi bokona dibhute.

³⁶ Nganga-phe, uila: Ka tubhule ima ioso, mʼonzo itunde-mu, phala ki i sambukile kukasana kiosuʼiki nganga kaii luua kukengelela onzo; kiene kiua kiza nganga phala ku i talesa.

³⁷ Se, o mu kukengelela, u mona tu-imòmo tua momojoka ku jiphalelu jaʼnzo, tua zeluluka, mba tu kusuka, tua zongoloka mu phalelu,

³⁸ nganga u tubhuka, anga inzuʼoio u i jika, anga ikala iòjike kienhiki katé mu sambuadi dia izuua.

³⁹ Anga nganga u vutukila-mu mu kizuua kia kasambuadi hé u i talela dingi lua mukuá; talesa-phe, hé dibhebho ku jiphalelu diaii ni kusalânha di dia zanze dingi.

⁴⁰ Nganga a tume kuila o matadi a ma sokole-bhu bhuoso bhuala o dibhebho, a ma texe dikanga ku maxilu ma sanzala, bhu kididi kia dixidilu.

⁴¹ Onzo-phe a i konge mbandu ioso ia moxi, o fufuta ue ioso i a kongo mʼoxi, a i texe ue dikanga bhu kididi kioso kia xidi.

⁴² Kienhókio kuize kiá matadi mengi a ma sokeke-bhu bhuoso bhua tundu o matadi ma diangʼomo, a tophole mavu engi a bebe na-u o inzu.

⁴³ Maji-phe, o kiela matadi mòsokole, onzo iòkonge, a i beba kiua, maji hanji o dibhebho dieza dingi lua mukuá kʼonzo,

⁴⁴ kuabhu, nganga a bokone a kengelele dingi, se ua sange dibhebhu dia di zale dingi, diódio-phe ʼbhute dia kajeja dia tula mʼonzo, onzo ioio iakasana.

⁴⁵ Kala kiki onzo mu i bula, ni matadi mê ni mabaia mê ni mavu oso aʼnzu, muangenu-u; ima ioso iii tutilenu-iu ku mbalelu ku maxilu ma sanzala katé bhu kididi kia xidi.

⁴⁶ O uoso-phe u bokona mʼonzuʼomo, izuua ia i jika kiki, unanga ni kukasana katé mu ngoloxi.

⁴⁷ Uoso ue u zekela-mu kilu, a sukule izuatu iê; o uoso ue u dila-mu kúdia, a sukule izuatu iê.

O kuzelesa inzo ia tudile dibhute

⁴⁸ Maji-phe, se o nganga kia vutuka mu kutala o inzo, kia zubha o ku i lobokala, mu kubokona-mu uasange kuila hanji kia i lobokala ia di zele, o dibhebhu ki dia sanhe dingi, nganga-phe a i jimbule kuamba inzo ia zele kiá, kuma dibhebho diaii.

⁴⁹ O mu kubhanga o kiamenga kiaʼnzo-phe, a kuata ʼnjila jiiadi, ni muẋi ua musédulu, ni mukalumezí, ni hisopo;

⁵⁰ a jibhe-bhu njila imoxi, u i jibhila mʼombia ia mavu, ku thanduʼa menha ma hungulule.

⁵¹ Anga u kuata o njila ia muenhu, ni musédulu, ni mukalumezí, ni hisopo, nʼa bondeke kumoxi mʼombia muoso muala o manhinga ma njila iójibhe, nʼa bondeka ue mu menha ma hungulule, phala a sangele onzo mu lusambuadi.

⁵² Onzuʼoio a i bonze kienhiki ni manhinga ma kanjila ni menha ma hungulule, ni kanjila ka muenhu, ni muẋi ua musedulu, ni ua hisopo ni mukalumezí.

⁵³ Bhenhobho anga ambula kiá o kanjila ka xiala ku muenhuʼoko, mu kʼambuila ku maxilu ma sanzala, mu ka lungisa ku mukáu ua hatu. Kienhiki kia bhanga o kiamenga kia kubonza o inzu phala ku i kindula muene, izele.

⁵⁴ Iii iene-phe o ngonge iatokala o dibhebhu dia dibhute ni dia ngònga,

⁵⁵ Ni dia dibhute dia izuatu, ni dia jinzo,

⁵⁶ ni dia maveve, ni dia majiji ni dia hanga-kambu.

⁵⁷ Nda mu longe athu bhu kizuua buoso bhu kasanena o ima, ni bhu kizuua bhuoso kima bhu ki kexila ni kuzela kuê. Ngonge-phe ia dibhute ienhiʼii.